Zechariah 14

Ilokano (Ti Biblia (1973))

← Chapter 13 Jump to:

1Adtoy, umay ti aldaw ni Jehova intono ti sinamsammo mabingbingay iti nagtengngaam.

2Ta urnongecto amin dagiti nasnacion a maibusor iti Jerusalem iti pananggubat; ket ti ili maalanto, ket dagiti balbalay matacawdanto, ket dagiti babbai mapilitdanto; ket ti cagudua ti ili mapanto iti pannacacayaw, ket ti matda cadagiti tattao saanto a mapucaw iti ili.

3Iti casta ni Jehova mapanto, ket makigubatto a maibusor cadagidiay a nasnacion, a cas pannakigubatna idi aldaw ti bacal.

4Ket dagiti sacana agtacderto iti daydiay nga aldaw iti rabaw ti Bantay dagiti Olivo, nga adda iti sango ti Jerusalem iti daya; ket ti Bantay dagiti Olivo agpisinto iti nagtengngaanna iti agpadaya ken agpalaud ket addanto maysa a nalawa a lobong; ket ti cagudua ti bantay umalisto nga agpaamianan, ket ti caguduana agpaabagatan.

5Ket agtalawcayto iti lobong dagiti bantayco, ta ti lobong dagiti bantay dumanonto agingga iti Hasal; wen, dacayo agtalawcayto, a cas iti panagtalawyo iti gingined cadagiti al-aldaw ni Uzias nga ari ti Juda; ket ni Jehova a Diosco umayto, ken amin dagiti Sasanto a cumuyog kenca.

6Ket maaramidto iti daydiay nga aldaw, nga awanto ti lawag; dagiti nasilnag pumanawdanto:

7Ngem isunto ti maysa nga aldaw a maammoan ken ni Jehova; saan nga aldaw, ket saan a rabii; ngem mapasamacto, nga iti rumabi-i addanto lawag.

8Ket maaramidto iti daydiay nga aldaw, a nabiag a dandanum rumuardanto nga aggapu ti Jerusalem; ti cagudua dagidiay agpa-baybay iti daya, ket ti cagudua dagidiay agpa-baybay iti laud; castanto iti pannawen ti pudot ken lam-ec.

9Ket ni Jehova isunto ti Ari iti rabaw ti amin a daga: iti daydiay nga aldaw ni Jehova maymaysanto, ken ti naganna maymaysa.

10Amin ti daga maaramidto a cas iti Araba, manipud iti Gabaa aginggana iti Rimon iti abagatan ti Jerusalem; ket isu maingatonto, ken agtaengto iti dissona, manipud iti ruangan ni Benjamin agingga iti disso ti umuna a ruangan, agingga iti ruangan ti suli, ken manipud iti torre ni Hananeel agingga cadagiti pagpespesan ti uvas ti ari.

11Ket dagiti tattao agtaengdanto kencuana, ket awanton ti lunod; ket ti Jerusalem agtaengto a sitatalged unay.

12Ket daytoy isunto ti didigra a pangsaplit ni Jehova cadagiti amin nga il-ili a nakigubat a maibusor iti Jerusalem: ti lasagda aggibusto iti bayat nga isuda agtatacderda ket dagiti matada aggibusdanto cadagiti abutda, ket ti dilada aggibusdanto iti ngiwatda.

13Ket maaramidto iti daydiay nga aldaw, a ti natbag nga ariwawa manipud ken Jehova addanto iti tengngada; ket isuda cumpetdanto tunggal maysa iti ima ti caarubana, ket ti imana mayunnatto a maibusor iti ima caarubanna.

14Ket ni Juda met gumubatto a maibusor iti Jerusalem; ket ti sanicua dagiti amin a nasnacion maurnongdanto a matiptipon, ti balitoc, ken ti pirac, ken dagiti pagananay, iti nawadwad unay.

15Ket iti casta addanto didigra cadagiti cabcabayo, ti mulo, ti camello ken ti asno, ken dagiti amin nga an-animal nga addadanto cadagidiay a pacpacarso, caslanto iti daydiay a didigra.

16Ket maaramidto, a tunggal maysa a matda cadagiti amin a nasnacion nga immay a maibusor iti Jerusalem sumang-atto iti tinawentawen tapno agdayaw iti Ari, a ni Jehova dagiti buybuyot, ken mangngilin iti fiesta dagiti tabernaculo.

17Ket maaramidto, a ti siasinoman cadagiti amin a familia ti daga a saan a sumang-at iti Jerusalem tapno agdayaw iti Ari, a ni Jehova dagiti buybuyot, awanto ti tudo cadacuada.

18Ket no ti familia ti Egipto saan a sumang-at, ken saan nga umay, awanto met cadacuada addanto didigra a pangsaplit ni Jehova cadagiti nasnacion a saan a sumang-at tapno mangngilin iti fiesta dagiti tabernaculo.

19Daytoy isunto ti dusa ti Egipto, ken dusa dagiti amin a nasnacion a saan a sumang-at tapno mangngilin iti fiesta dagiti tabernaculo.

20Iti daydiay nga aldaw maisuratto cadagiti barongbarong dagiti cabayo, NASANTOAN KEN JEHOVA; ket dagiti bangbanga idiay balay ni Jehova casdanto la malmalucong iti sango ti altar.

21Wen, tumunggal banga idiay Jerusalem ken Juda nasantoanto ken Jehova dagiti buybuyot; ken amin nga agidaton umaydanto ken mangaladanto cadacuada, ken aglutodanto kencuana: ket iti daydiay nga aldaw awanton ti Cananeo iti balay ni Jehova dagiti buybuyot.

← Chapter 13 Jump to: