Zechariah 3

Ilokano (Ti Biblia (1973))

← Chapter 2 Jump to: Chapter 4 →

1Ket isu imparangna caniac ni Josue a cangatoan a padi a sitatacder iti sango ti angel ni Jehova, ket ni Satan sitatacder iti macanawanna tapno isu busurenna.

2Ket ni Jehova kinunana ken Satan, Ni Jehova babalawennaca coma O Satan; wen, ni Jehova a nangpili iti Jerusalem babalawennaca coma; saan nga isu daytoy aya ti aluten a naala iti apuy?

3Ket ni Josue adda idi a sicacawes cadagiti narugit a pagpagan-anay, ket adda a sitatacder iti sango ti angel.

4Ket isu simmungbat ket nagsao cadagiti sitatacder iti sangona, a cunana, Iccatenyo dagiti narugit a pagpagan-anay kencuana, ket kinunana kencuana, Adtoy, siac pinayadayuc kenca ti kinadakesmo, ket cawesancanto iti nabacnang a pagan-anay.

5Ket kinunac, Isaadda coma ti nadalus a mitra iti olona. Iti casta nangisaadda iti maysa a nadalus a mitra iti olona, ket isu kinawesanda cadagiti pagan-anay; ket ti angel ni Jehova adda idi a sitatacder iti asideg.

6Ket ti angel ni Jehova impatalgedna ken Josue, a cunana,

7Castoy ti cuna ni Jehova dagiti buybuyot: No sica magnacanto cadagiti daldalanco, ken no sica aywanamto ti italecco, iti casta sica met agocomcanto iti balayco, ket aywanamto met dagiti pangocomac, ket itedconto kenca ti disso a pagsercan iti tengnga dagiti adda a sitatacder iti asideg.

8Timudem ita, O Josue a cangatoan a padi, sica ken dagiti caduam nga agtutugaw iti sangom; ta isuda dagiti lallaki a maipaay a pagilasinan: ta adtoy, yegconto ni adipenco a Saringit.

9Ta, adtoy, ti bato nga incabilco iti sango ni Josue; iti maysa a bato adda ti pito a mata: adtoy, siac kitikitacto ti pagkitikitanna, cuna ni Jehova dagiti buybuyot, ket alisecto ti kinadakes daydiay a daga iti maysa laeng nga aldaw.

10Iti daydiay nga aldaw, cuna ni Jehova dagiti buybuyot, dacayo agawiscayto tunggal maysa ti caarubana iti siroc ti uvas ken iti siroc ti higos.

← Chapter 2 Jump to: Chapter 4 →