Zechariah 2

Ilokano (Ti Biblia (1973))

← Chapter 1 Jump to: Chapter 3 →

1Ket siac intangadco dagiti matac, ket kimmitaac, ket, adtoy, ti maysa a lalaki agraman pagrucod a tali iti imana.

2Idin kinunac, Sadino aya ti papanam? Ket isu kinunana caniac, Innac rucuden ti Jerusalem, tapno makitac ti caacabana, ken caatiddugna.

3Ket, adtoy, ti angel a nakisarita caniac rimmuar idi, ket sabali nga angel rimmuar a simmabet kencuana,

4Ket kinunana kencuana, Agtarayca, agsaoca itoy agtutubo a lalaki, a cunaem, Ti Jerusalem mapagnaedanto a cas la cadagiti purpuroc nga awanan bacud, a gapu iti caadu dagiti lallaki ken an-animal kencuana.

5Ta siac, cuna ni Jehova, siacto kencuana ti maysa a bacud nga apuy iti aglicmut, ket siacto ti dayag iti nagtengngaanna.

6O, O, agtalawca manipud iti daga ti amianan, cuna ni Jehova; ta siac isacnapcayo iti ruar a cas cadagiti uppat nga angin iti langit, cuna ni Jehova.

7O Sion, agtalawca, sica a makitaeng iti anac a babai ti Babilonia.

8Ta castoy ti cuna ni Jehova dagiti buybuyot: Maipaay iti dayag isu imbaonnac cadagiti nasnacion a nagsamsam kenca; ta daydiay a mangsagid kenca sagidenna ti bukel ti matana.

9Ta, adtoy, wagwagecto ti imac iti ngatoenda, ket isudanto ti samsam cadagidiay nagservi cadacuada; ket dacayo mabigbigyonto a ni Jehova dagiti buybuyot imbaonnac.

10Agcantaca ken agragsacca, O babai nga anac ti Sion; ta adtoy, siac umayac, ket agtaengacto iti nagtengngaam, cuna ni Jehova.

11Ket adu a nasnacion tumipondanto ken Jehova iti daydiay nga aldaw, ket isudanto ti ilic; ket agnaedacto iti nagtengngaam, ket sica mabigbigmonto a ni Jehova dagiti buybuyot imbaonnac kenca.

12Ket ni Jehova tawidennanto ti Juda a cas apagna iti daga a nasantoan, ket piliennanto manen ti Jerusalem,

13Agulimeccayo, amin a lasag, iti saclang ni Jehova; ta isu nagriingen iti nasantoan a taengna.

← Chapter 1 Jump to: Chapter 3 →