Amos 1

Icelandic 2007 (Biblían (2007))

Jump to: Chapter 2 →

1Orð Amosar, eins af fjárhirðunum í Tekóa, sem honum vitraðist um Ísrael á dögum Ússía Júdakonungs og á dögum Jeróbóams Jóassonar, Ísraelskonungs, tveimur árum fyrir jarðskjálftann.

2Hann sagði: Drottinn þrumar frá Síon, lætur rödd sína gjalla frá Jerúsalem svo að hagar hjarðmannanna visna og Karmeltindur skrælnar.

3Svo segir Drottinn: Vegna þriggja, já, vegna fjögurra glæpa Damaskus hverf ég ekki frá þessu: Af því að þeir moluðu Gíleað með þreskisleðum úr járni

4mun ég senda eld gegn húsi Hasaels og hann mun gleypa hallir Benhadads.

5Ég mun brjóta slagbrand Damaskus og tortíma þeim sem situr í hásæti í Bíkat Aven, þeim sem ber veldissprotann í Bet Eden. Aramear verða fluttir í útlegð til Kír, hefur Drottinn sagt.

6Svo segir Drottinn: Vegna þriggja, já, fjögurra glæpa Gasa hverf ég ekki frá þessu: Af því að þeir hafa flutt heil byggðarlög í útlegð til að selja þau í hendur Edóm

7mun ég senda eld gegn múrum Gasa og hann mun gleypa hallir hennar.

8Ég mun tortíma þeim sem situr í hásæti í Asdód, þeim sem ber veldissprotann í Askalon. Því næst beini ég hendi minni gegn Ekron svo að þeim sem eftir eru af Filisteum verði eytt, hefur Drottinn Guð sagt.

9Svo segir Drottinn: Vegna þriggja, já, vegna fjögurra glæpa Týrusar hverf ég ekki frá þessu: Af því að þeir sendu heil byggðarlög í útlegð til Edóms og virtu ekki bræðrasáttmálann

10mun ég senda eld gegn múrum Týrusar og hann mun gleypa hallir hennar.

11Svo segir Drottinn: Vegna þriggja, já, vegna fjögurra glæpa Edóms hverf ég ekki frá þessu: Af því að þeir ofsóttu bræður sína með sverði og kæfðu alla samúð með þeim, af því að þeir rændu í óslökkvandi reiði sinni og héldu heift sinni sífellt vakandi

12þá mun ég senda eld til Teman og hann mun gleypa hallirnar í Bosra.

13Svo segir Drottinn: Vegna þriggja, já, vegna fjögurra glæpa Ammóníta hverf ég ekki frá þessu: Af því að þeir ristu þungaðar konur í Gíleað á kvið, þegar þeir ætluðu að stækka land sitt,

14mun ég kveikja eld í múrum Rabba og hann mun gleypa hallirnar þar þegar heróp kveður við orrustudaginn, þegar fárviðri geisar óveðursdaginn.

15Konungur þeirra verður að fara í útlegð, hann og allir hirðmenn hans, segir Drottinn.

Jump to: Chapter 2 →