Mark 11

Mien Bible (Thai Script) © Thailand Bible Society, 2007

← Chapter 10 Jump to: Chapter 12 →

1เยซู เหธา นิ่น เญย ไซ-ก๋อ เถา ฟัด เต๋ย เยลูซาเลม ฒี่ง, เยียม กะลั้น บง, นิด เบดฟายี เหธา เบทานี ล์าง. เยซู ฯฒฯ พ้าย อี เต้า นิ่น เญย ไซ-ก๋อ มี่ง ด่าง,

2บั๋ว เหฒียง นิ่น บัว, “อ๋อย หฒุ มี่ง หฑะเฮมียน แหมง วั้ว นอม ล์าง. เยี้ยด เปียะ ล์าง ฯฒฯ ปวัด เต้า มาลี ตอน, เมี่ยน ไม้ แก้ง เก้ เจี๋ย, โด้ เจี๊ยน วั้ว. อ๋อย หฒุ ไจ๊ เคน ต้าย น้าย.

3สี ก๊อง หาย เต้า หน่าย เม่ย บัว, ‘เม่ย บัว ฝู่ง ฮนั้ง น้าย นอ โหฒว?’ อ๋อย หฒุ เตา นิ่น, ‘เฒี้ยว เฉียม หฒุ หล่ง. อ๊า ตั้ง ฯฒฯ ฝูง หฑวน อ๊ะ.’”

4นิ่น บัว ฯฒฯ มี่ง, หย่า ปวัด เต้า มาลี ตอน โด้ เจี๊ยน แก้ง ด่าง, เยียม วั้ว เจ๊า-เฮลน.

5ไซ-ก๋อ บัว ไจ๊ วั้ว หฒั่น, โซ้ว กะเฮลน เญย เมี่ยน หน่าย, “เม่ย บัว โหฒว หาย หญู่ง ไจ๊ มาลี ตอน?”

6นิ่น บัว ฯฒฯ เอย เยซู เญย หว่า เตา. วั้ว เต๋ย เมี่ยน ฯฒฯ ปุน นิ่น บัว เคน เจี๊ยน มี่ง อ๊ะ.

7เคน เถา เยซู วั้ว, นิ่น บัว ฯฒฯ เฒาะ นิ่น บัว เญย ต้ม ลุย ติ่ม เจี๊ยน มาลี เญย ติ ต์าน. เยซู ฯฒฯ เก้ เจี๊ยน อ๊ะ.

8เมี่ยน ธั้ม เญย หล่ง กั้น เญย ต้ม ลุย ติ่ม วั้ว เจ๊า. ม่าย เต๋ย หย่า มี่ง เด่ย แก๊ะ เดี๋ยง-น่อม เหยียด ต๊อ เหยียด ต๊อ เญย, ติ่ม เจี๊ยน เจ๊า.

9มี่ง ด่าง วั้ว เต๋ย, เหธา ฆะฮ้า กัน เจี๊ยน มี่ง วั้ว เต๋ย, ล่ม ฑ่อย เห่ว, “โฮซานา! โท้ ทิน-ฮู่ง เหธย ฟุ เต๊ง เฒี้ยว เญย บั๋ว ต้าย วั้ว เต้า.

10โท้ ทิน-ฮู่ง เหธย ฟุ ปุน เม่ย อ๋อย เหลียบ เญย กั๊วะ, เซ บัว เญย อง-ถาย, ดาวิด ฮู่ง, เญย กั๊วะ. โฮซานา! เธง เยียม ฮลัง เจี๋ย วั้ว เต้า ทิน-ฮู่ง.”

11เยซู เถา เยลูซาเลม หย่า เปียะ หฒั่ง ทิน-ฮู่ง เญย เปย๊า หมั่ง เหฑ่ง หญู่งๆ. มป่า ลู่ง อ๊า ลั่ม เต๋ย หฮมวัง อ๊ะ. นิ่น แอ๋ง เหธา นิ่น เญย เหฒียบ เหญ่ย เต้า ไซ-ก๋อ ฯฒฯ ธ้วด ฒี่ง มี่ง เบทานี ล์าง.

12ตะเหญ่ย ดอม, เยซู บัว ธ้วด เบทานี ล์าง วั้ว หฒั่น, เยซู เฮญี้ยว เซีย.

13นิ่น ปวัด ม่าย ฒู่ง ง่ง หญอ เดี๋ยง เยียม โก เต๋ย เญย, ม่าย น่อม เญี์ยม เญย. นิ่น ฯฒฯ มี่ง เถา เดี๋ยง-กอน หมั่ง ก๋า, ม่าย เปี๊ยว ไฟ ไม้ ม่าย. มป่า ขูง ปวัด น่อม ฮนั้ง, ไม้ ม่าย เปี๊ยว, เหว่ย หฒุ ไม้ แก้ง เถา เฒี่ยง เปี๊ยว เญย เฒี่ยง โห่.

14เยซู บั๋ว วั้ว ฒู่ง ง่ง หญอ เดี๋ยง, “ยั่ง น้าย เจี๋ย, ไม้ ม่าย หาย เต้า ตุ๊ หญั่น เม่ย เญย เปี๊ยว อ๊ะ.” เยซู ก๊อง น้าย โจ๋ว หว่า, นิ่น เญย ไซ-ก๋อ บัว หย่า ไฮ์ เญย.

15มี่ง เถา เยลูซาเลม ฒี่ง, เยซู เปียะ หฒั่ง ทิน-ฮู่ง เญย เปย๊า ฯฒฯ หฒุ่น ม์าย หม่าย วั้ว เต๋ย เมี่ยน ธ้วด มี่ง. นิ่น ปู๋ง คีง ทิ้ว ญ่าน วั้ว เต๋ย เมี่ยน เญย เตี้ย เหธา หม่าย แปะ ก๊บ วั้ว เต๋ย เมี่ยน เญย ตั๋ง.

16นิ่น หย่า ไม้ ปุน หาย เต้า เปี้ยน หาย หญู่ง ยั่ง หฒั่ง ทิน-ฮู่ง เญย เปย๊า เญย หลาด กะญั์ว เจี๋ย.

17เยซู หฌาว หฒวัง เมี่ยน, “กีง-โซว เฟี้ย เจี๊ยน ทิน-ฮู่ง เญย หว่า ก๊อง, ‘เยีย เญย เปย๊า, เมี่ยน อ๋อย เห่ว โหฒว เต๋า เก๋า เญย เปย๊า, เหว่ย ปุน หม่าน ฝีง มี่ง วั้ว เต๋า เก๋า.’ มป่า เม่ย บัว หล่ง โหฒว ‘จั๋น-หฒะ ปี๋ง เญย ค้วด.’”

18ไซ เมี่ยน เปย๊ย เหธา หฌาว เล์ย เญย ฟิน-แซง ไฮ์ ลิ์ว น้าย เต๋ย สี่, นิ่น บัว ฯฒฯ ฮนั้ม อ๋อย ต๊า หาย ติ่ว หฒะเอ๋ย ไฮ่ ไต๋ เยซู, โหย่ว ไฮ์ กั้ม เหฑีย นิ่น, เหว่ย หฒุ หฒวัง เมี่ยน บัวะ ฮ่อง นิ่น หฌาว เญย หว่า.

19ลู่ง ม์าน-หฮมวัง เต๋ย, เยซู เหธา นิ่น เญย ไซ-ก๋อ ธ้วด ฒี่ง หมี่ อ๊ะ.

20ตะเหญ่ย ดอม เฑี้ยว เญย, เยซู เหธา ไซ-ก๋อ บัว เจี๋ย เจ๊า ปวัด วั้ว ฒู่ง ง่ง หญอ เดี๋ยง ฆาย เถา กะเดี๊ย กอน, ไต่ หมี่ อ๊ะ.

21ปีเต จั๋ง หฒุ เยซู เญย หว่า ฯฒฯ บั๋ว นิ่น, “ไซ-เตี๋ย อ้า! หมั่ง ก๋า! เม่ย โฮ้ว น้าย ฒู่ง ง่ง หญอ เดี๋ยง อี้ หฒั่น โคว ฆาย เหฑ่ง หมี่ อ๊ะ!”

22เยซู เตา นิ่น บัว, “อ๋อย หฒุ เสียน เขา ทิน-ฮู่ง.

23เยีย บั๋ว เฒียน เม่ย บัว, หาย เต้า บั๋ว น้าย นอม บง, ‘ซุ้ย ธ้วด, เหฌี่ย ค้อย ม่าะ!’ วั้ว เต้า เญย เฮญี้ยว หย่า ไม้ บู้ง เบี๊ยน, หฒะเก้ง เสียน อ๋อย ธ้วด ต้าย เอย นิ่น ก๊อง เญย หว่า นอ, ฯฒฯ หฒะเก้ง อ๋อย ธ้วด ต้าย ฮนั้ง วั้ว นอ.

24เหว่ย น้าย, เยีย บั๋ว เม่ย บัว, เม่ย บัว เต๋า เก๋า โท้ หาย หญู่ง, อ๋อย หฒุ เสียน เม่ย บัว ตุ๊ วั้ว หญู่ง, ฯฒฯ หฒะเก้ง ตุ๊ อ๊ะ.

25เม่ย บัว โซ้ว เจี๊ยน เต๋า เก๋า เญย เฒี่ยง โห่, สี ก๊อง เม่ย จั๋ง หฒุ ม่าย หาย เต้า โหฒว ต่อง เม่ย, อ๋อย หฒุ กวั่ง ปุน นิ่น, เม่ย เญย ทิน-ต้อง เตี๋ย หธีง ต้าย กวั่ง เม่ย โหฒว ต่อง เญย ฒุ์ย.

26สี ก๊อง เมี่ยน โหฒว ต่อง เม่ย บัว, เม่ย บัว หย่า ไม้ กวั่ง, เม่ย บัว เญย ทิน-ต้อง เตี๋ย ฟี่ ฮนั้ง เญย ไม้ กวั่ง เม่ย บัว โหฒว เญย ฒุ์ย.”

27เยซู บัว แอ๋ง หฑวน เถา เยลูซาเลม ฒี่ง. เยซู เยียม หฒั่ง ทิน-ฮู่ง เญย เปย๊า เญย หลาด กะญั์ว ยั่ง เจ๊า วั้ว หฒั่น, ไซ เมี่ยน เปย๊ย เหธา หฌาว เล์ย เญย ฟิน-แซง, แอ๋ง เหธา เมี่ยน โก๋ ต้าย

28หน่าย นิ่น, “เม่ย ม่าย หาย หญู่ง เล์ย โหฒว น้าย เต๋ย สี่? น้าย หญู่ง เล์ย หาย เต้า ปุน เม่ย?”

29เยซู เตา นิ่น บัว, “เยีย มป่า อ๋อย หน่าย โจ๋ว หว่า เม่ย บัว. เม่ย บัว เตา เยีย นอ, เยีย ฯฒฯ บั๋ว เม่ย บัว เยีย ม่าย หาย หญู่ง เล์ย โหฒว น้าย เต๋ย สี่.

30เตา เยีย โอ่. หาย เต้า ปุน โยฮัน ม่าย เล์ย เถง เมี่ยน เจี๋ย ววม เญย เล์ย, ทิน-ฮู่ง ไฟ ป้าม เมี่ยน?”

31นิ่น บัว ฯฒฯ ล่าน เหธา ล่าน ธ่าง ล่าง, “บัว หอบ หฒุ ฮนั้ง หาย นอ ก๊อง? สี ก๊อง บัว ก๊อง, ‘ทิน-ฮู่ง ปุน ต้าย,’ นิ่น อ๋อย ก๊อง, ‘วั้ว หญู่ง, เม่ย บัว เหว่ย หาย ติ่ว ไม้ เสียน โยฮัน?’

32มป่า, สี ก๊อง บัว ก๊อง, ‘เมี่ยน ปุน ต้าย,’” (นิ่น บัว กั้ม เหฑีย หฒวัง เมี่ยน เหว่ย หฒุ หฒวัง เมี่ยน ฝุน ตี่ง โยฮัน เซ หฒะเก้ง เป๋น เต้า โต่ว หว่า เมี่ยน.)

33นิ่น บัว ฯฒฯ เตา เยซู, “เยีย บัว ไม้ ฮิ้ว ตุ๊.” เยซู บั๋ว นิ่น บัว, “ฮนั้ง หน่าย, เยีย หย่า ไม้ บั๋ว เม่ย บัว เยีย ม่าย หาย หญู่ง เล์ย โหฒว น้าย เต๋ย สี่.”

← Chapter 10 Jump to: Chapter 12 →