Mark 7

Mien Bible (Thai Script) © Thailand Bible Society, 2007

← Chapter 6 Jump to: Chapter 8 →

1ม่าย เต๋ย ฟาลิสี เมี่ยน เหธา หฌาว เล์ย เญย ฟิน-แซง เยียม เยลูซาเลม ฒี่ง ต้าย กั๊บ ฒุ้น เยซู วั้ว.

2นิ่น บัว ปวัด ม่าย เต๋ย เยซู เญย ไซ-ก๋อ หญั่น หฮนาง เญย เฒี่ยง โห่, ไม้ เอย ฟาลิสี เมี่ยน เญย เล์ย-เหญ่ย หฑาว ปั์ว ด่าง, ฯฒฯ ม่าย หวุย.

3(ฟาลิสี เมี่ยน เหธา เหยียด ฒู้ง ยิวไท เมี่ยน เอย นิ่น บัว อง-ถาย เญย เอย-โต้ว โหฒว. ไม้ เอย เล์ย-เหญ่ย หฑาว ปั์ว, นิ่น บัว ฒู้ง ไม้ หญั่น หฮนาง.

4มี่ง เฮย หฑวน ต้าย, สี ก๊อง ไม้ เอย เล์ย-เหญ่ย หฑาว ปั์ว ด่าง, นิ่น บัว ไม้ หญั่น หฮนาง. แอ๋ง ม่าย ธั้ม-หญู่ง เล์ย นิ่น บัว อ๋อย หฒุ กัน. อ๋อย หฒุ เอย เล์ย-เหญ่ย หฑาว แธง-เยี้ยน เหธา ต้ง ซิ จา-สี่.)

5ฟาลิสี เมี่ยน เหธา หฌาว เล์ย เญย ฟิน-แซง ฯฒฯ หน่าย เยซู, “เม่ย เญย ไซ-ก๋อ บัว เหว่ย หาย ติ่ว ไม้ กัน อง-ถาย บัว เญย เอย-โต้ว โหฒว? หญั่น หฮนาง เญย เฒี่ยง โห่, นิ่น บัว เญย ปั์ว ม่าย หวุย หย่า ไม้ หฑาว?”

6เยซู เตา นิ่น บัว, “โต่ว หว่า เมี่ยน, อิสะยา, ก๊อง ตุ๊ หอบ เม่ย บัว เป้ย หฒะ เฮญี้ยว ฌ้วด เญย เมี่ยน. นิ่น เฟี้ย เจี๊ยน ก๊อง, ‘น้าย เต๋ย เมี่ยน หล่ง ฑุ่ย ท่าย เยีย, มป่า นิ่น บัว เญย เฮญี้ยว เล่ย ตุ๊ เยีย โก ไห่.

7นิ่น บัว หฒั่ง เยีย เซ ไม้ ลั่ม หล่ง. นิ่น บัว เฒาะ เมี่ยน กั้น เหลียบ ต้าย เญย เล์ย ต๋อง เยีย เญย เล์ย หฌาว.

8เม่ย บัว กวั่ง ทิน-ฮู่ง เญย เล์ย-หลัด, แอ๋ง หล่ง เมี่ยน กั้น เหลียบ ต้าย เญย เอย-โต้ว.”

9เยซู แอ๋ง ก๊อง, “เม่ย บัว ไกว เบี๋ยง-หฑยาว หธีง ต้าย กวั่ง ทิน-ฮู่ง เญย เล์ย-หลัด เหว่ย เอย เจี๊ยน เม่ย บัว กั้น เญย เอย-โต้ว โหฒว.

10เหว่ย หฒุ โมเซ ก๊อง, ‘อ๋อย หฒุ ถง หนิ่ม เม่ย บัว เญย เตี๋ย หม่า.’ หย่า ก๊อง, ‘หาย เต้า เหฒียว นิ่น เญย เตีย ไฟ มา, อ๋อย หฒุ ไต๋ วั้ว เต้า กวั่ง.’

11มป่า เม่ย บัว ก๊อง, สี ก๊อง ม่าย ล่าน เมี่ยน ม่าย หาย หญู่ง กะน้าย ไฮ่ หล่ง เถง นิ่น เญย เตีย ไฟ มา มป่า นิ่น ก๊อง, ‘น้าย เซ โกลาบาน,’ (เอ๋ย เล์ย เซ ฝูง ปุน ทิน-ฮู่ง หมี่ อ๊ะ,)

12เม่ย บัว ฯฒฯ ไม้ ปุน นิ่น โหฒว หาย หญู่ง เถง นิ่น เญย เตีย ไฟ มา.

13เม่ย บัว ฮนั้ง หน่าย กัน เม่ย บัว เญย เอย-โต้ว โหฒว ฯฒฯ ปุน ทิน-ฮู่ง เญย หว่า ไม้ ลั่ม หล่ง. แอ๋ง ม่าย ธั้ม-ติ่ว เจ๊า เม่ย บัว หย่า ฟี่ ฮนั้ง เญย โหฒว.”

14เยซู แอ๋ง เห่ว หฒวัง เมี่ยน ต้าย ฒุ้น ฯฒฯ บั๋ว นิ่น บัว, “เม่ย บัว เหยียด ฒู้ง หมวัง เยีย โอ่, หย่า อ๋อย หฒุ เม่ง แปะ.

15ไม้ ม่าย หาย หญู่ง หญั่น เปียะ ฑุ่ย เญย กะน้าย ไฮ่ ปุน เมี่ยน ม่าย หวุย. ขูง เยียม เมี่ยน เญย เฮญี้ยว ฮนั้ม ธ้วด ต้าย เญย, ไฮ่ ปุน เมี่ยน ม่าย หวุย ฮนั้ง.

16หาย เต้า ม่าย มน่อม อ๋อย หฒุ แปง มน่อม หมวัง หลง โอ่.”

17เยซู เล่ย หฒวัง เมี่ยน เปียะ เปย๊า วั้ว หฒั่น, นิ่น เญย ไซ-ก๋อ โท้ นิ่น พ้อ เม่ง น้าย โจ๋ว หว่า-เป๊ย, เป๊ย หาย หญู่ง.

18เยซู บั๋ว นิ่น บัว, “เม่ย บัว หฒะเก้ง ฮนั้ง นิ่น บัว นอ, ไม้ เปียะ เฮญี้ยว ไฟ? เม่ย บัว ไม้ ฮิ้ว ไฟ? ไม้ ม่าย หาย หญู่ง หญั่น เปียะ ฑุ่ย เญย กะน้าย ไฮ่ ปุน เมี่ยน ม่าย หวุย.

19หญั่น เญย กะน้าย ไม้ เฒ์ย เปียะ เฮญี้ยว, ขูง เปียะ กะเซีย-บัวะ ฮนั้ง ฯฒฯ ปู๋ง ธ้วด หมี่ อ๊ะ.” (เยซู ฮนั้ง น้าย นอ ก๊อง นิ่น ปุน ธีง หญู่งๆ หญั่น เญย กะน้าย ไม้ ม่าย หวุย.)

20เยซู แอ๋ง ก๊อง, “เซ เยียม เมี่ยน เญย เฮญี้ยว ฮนั้ม ธ้วด เญย เจ๊า ปุน เมี่ยน ม่าย หวุย.

21เหว่ย หฒุ เมี่ยน เยียม เฮญี้ยว กะญั์ว ฮนั้ม ธ้วด หว่าย สี่, เหฮยียน เซียะ เหฮยียน ตอน, โหฒว หฒะ, ไต๋ เมี่ยน, เหฮยียน เอ๊า เหฮยียน โหฆ,

22เม้า กะน้าย, โหฒว หว่าย สี่, ดั๊ว เมี่ยน, โหฒว ไม้ หลวน ห่อง, เหมว่ย เจี๊ยะ, ก๊อง หว่า-ฮู้, เธง-โฮล, ไม้ กุ๊น ฒิ่น โฮ์.

23น้าย เต๋ย เหยียด ฒู้ง หว่าย สี่ เซ เยียม เมี่ยน เญย เฮญี้ยว ฮนั้ม ธ้วด ต้าย ปุน เมี่ยน ม่าย หวุย.”

24เยซู เล่ย วั้ว นอม ต๋อง แอ๋ง มี่ง เถา ไทละ เหธา ไซดอน ฒี่ง เญย เต่ย, เปียะ นอม เปย๊า. นิ่น ไม้ อ๋อย เมี่ยน ฮิ้ว ตุ๊ นิ่น เยียม หน่าย มป่า ปี๋ง ไม้ เบว์ย อ๊ะ.

25ม่าย เต้า จั๋น- มวั์ง, นิ่น เญย เซียะ หฒุ เฮยี่ย ไกว๊ เมี้ยน มัวะ. วั้ว เต้า จั๋น- มวั์ง ไฮ์ เมี่ยน ก๊อง เยซู โหฒว เญย สี่, ฯฒฯ เลี่ยม เฒ่ย ต้าย เถา, บ๊าบ เหฌี่ย เยซู เญย เหฒา-เฮลน.

26น้าย เต้า มเซียะ ตอน เซ จั๋น, เยียม ซีเลีย แซ้ง เญย ฟีนีเซีย เต่ย ธ้วด เสย. นิ่น โท้ เยซู หฒุ่น มัวะ นิ่น เญย เซียะ วั้ว เต้า เมี้ยน ธ้วด.

27มป่า เยซู เตา, “อ๋อย หฒุ ปุน ฝุเจว๊ย หญั่น เป๊ว ด่าง. ไม้ หอบ หฒุ เฒาะ ฝุเจว๊ย เญย หฮนาง ฒอย ปุน จู๊ หญั่น.”

28น้าย เต้า จั๋น- มวั์ง ก๊อง, “ต้ม ก๋อ อ่า, จู๊ มต้าย เยียม เตี้ย เดี๊ย เฑ์า ฝุเจว๊ย เญย หฮนาง-เฮม้ย-ด๊อด หญั่น.”

29เยซู ฯฒฯ บั๋ว นิ่น, “เหว่ย หฒุ เม่ย เตา วั้ว โจ๋ว หว่า, กุ๊น หฑวน เปย๊า อ๊ะ. เมี้ยน ฒู้ง ธ้วด เม่ย เญย เซียะ เญย ซิน หมี่ อ๊ะ.”

30วั้ว เต้า จั๋น- มวั์ง ฯฒฯ หฑวน เปย๊า, ปวัด นิ่น เญย ฝุเจว๊ย เปว๋ย เจี๊ยน วั้ว โหธว. เมี้ยน หฒะเก้ง ธ้วด หมี่ อ๊ะ.

31เยซู ฯฒฯ เล่ย ฆอย ไทละ เต่ย เจี๋ย ไซดอน ฒี่ง, ยั่ง โท้ดบุลี แซ้ง มี่ง กาลิลี ค้อย-ตอน.

32ม่าย เต๋ย เมี่ยน ต้อ เต้า มน่อม ดูง, เบียด โหล่ว เญย เมี่ยน ต้าย โท้ เยซู มาน เจี๊ยน นิ่น.

33เยซู ฯฒฯ ต้อ วั้ว เต้า เมี่ยน ธ้วด มี่ง เล่ง เญย ต๋อง, เล่ย ฆอย หฒวัง เมี่ยน. นิ่น หล่ง ปั์ว-โด๊ะ โธะ เจี๊ยน วั้ว เต้า เญย อี ปูง มน่อม ค้วด. แอ๋ง ทุ้ย ววม-ฑุ่ย ต้าย ฒ่า เจี๊ยน วั้ว เต้า เญย เบียด.

34เยซู ฯฒฯ เธา เฮมียน หมั่ง กู้ หงว่าย ลู่ง, เท้า ต้ม เฉีย, แอ๋ง ก๊อง บั๋ว วั้ว เต้า เมี่ยน, “เอฟาทา!” (เอ๋ย เล์ย เซ, “คอย ฆอย ม่าะ!”)

35วั้ว เต้า เมี่ยน เลี่ยม เฒ่ย ไฮ่ หมวัง ตุ๊ ไฮ์. เบียด หย่า หลง หมี่ อ๊ะ. ก๊อง ตุ๊ หว่า จุ้น อ๊ะ.

36เยซู หัด หฒวัง เมี่ยน ไม้ ตู๋ง ก๊อง บั๋ว หาย เต้า. มป่า นิ่น เหยียด เฒย หัด, นิ่น บัว เหยียด เฒย ก๊อง บั๋ว เมี่ยน ธั้ม.

37ตุ๊ ไฮ์ เญย เมี่ยน หฒะเก้ง! บัวะ ฮ่อง ไห่. นิ่น บัว ก๊อง, “เยซู โหฒว หาย หญู่ง หฒะเก้ง โหฒว ตุ๊ หลง ไห่! เลี่ยม มน่อม ดูง เญย เมี่ยน นิ่น หฒ่อ หลง, ไฮ่ หมวัง ตุ๊ ไฮ์. กะน้าย-หฮงง หย่า ไฮ่ ก๊อง หว่า.”

← Chapter 6 Jump to: Chapter 8 →