Mark 9

Mien Bible (Thai Script) © Thailand Bible Society, 2007

1เยซู แอ๋ง บั๋ว นิ่น บัว, “เยีย ก๊อง เฒียน บั๋ว เม่ย บัว, โซ้ว เจี๊ยน น้าย เญย เมี่ยน ม่าย เต๋ย ฒู้ง ไม้ แก้ง ไต่ ฯฒฯ ตุ๊ ปวัด ทิน-ฮู่ง ม่าย เจี๊ยน เน่น เญย ชะ ต้าย โหฒว เฒี้ยว กุ๊น เมี่ยน.”

2ฆะฮ้า จุ๊ ฮนอย, เยซู ต้อ เจี๊ยน ปีเต, ยากอบ เหธา โยฮัน ฝาว นอม บง-ฮลัง, เล่ง เญย ต๋อง. ไซ-ก๋อ บัว หมั่ง เจี๊ยน วั้ว หฒั่น, ปวัด เยซู ทิ้ว เหฑ่ง หมี่ อ๊ะ.

3นิ่น เญย ลุย-โหว บ๊บ แปะ เญย, แฒ่งๆ วั้ว. ลู่ง เดี๊ย ไม้ ม่าย หาย เต้า ไฮ่ โหฑ ตุ๊ นิ่น เญย ลุย-โหว ด่ง หน่าย แปะ.

4วั้ว เต๋ย ปัว เต้า ไซ-ก๋อ แอ๋ง ปวัด เอลียา เหธา โมเซ หิ่น ธ้วด เยียม วั้ว เหธา เยซู ก๊อง หว่า.

5ปีเต ฯฒฯ ก๊อง บั๋ว เยซู, “ไซ-เตี๋ย อ้า! เยีย บัว เยียม น้าย เก้ง หลง ไห่. โท้ ปุน เยีย บัว โหฒว ปัว นอม ลิ่ว, โหฒว นอม ปุน เม่ย, โหฒว นอม ปุน โมเซ, แอ๋ง โหฒว นอม ปุน เอลียา.”

6ปีเต เหธา วั้ว เต๋ย ไซ-ก๋อ กั้ม เหฑีย ไห่, ฒู้ง ไม้ ฮิ้ว ตุ๊ อ๋อย หฒุ ก๊อง หาย หญู่ง.

7ม่าย ต๊อ บ๋วน ต้าย อม เจี๊ยน นิ่น บัว. แอ๋ง ม่าย เฉีย เยียม วั้ว บ๋วน ก๊อง, “น้าย เซ เยีย เญย ตอน- ฮนั้ม. หมวัง นิ่น ม่าะ!”

8ไซ-ก๋อ บัว เลี่ยม เฒ่ย หมั่ง น้าย หมั่ง วั้ว, ไม้ ปวัด หาย เต้า เหธา นิ่น บัว เยียม. ขูง ปวัด เยซู กั้น ฮนั้ง.

9เยียม บง เหฌี่ย ต้าย วั้ว หฒั่น เยซู หัด นิ่น บัว, “ไม้ ตู๋ง ก๊อง เม่ย บัว ปวัด ลิ์ว น้าย เต๋ย สี่ บั๋ว หาย เต้า. ฒั้ว เยีย, ป้าม เมี่ยน เญย ตอน, ไต่ มี่ง แอ๋ง นั่ง ต้าย หธีง ต้าย ก๊อง โอ่.”

10ไซ-ก๋อ บัว ไฮ์ ลิ์ว น้าย เต๋ย หว่า ฯฒฯ เยียม เฮญี้ยว จั๋ง เจี๊ยน, ล่าน เหธา ล่าน ก๊อง, “‘ไต่ มี่ง แอ๋ง นั่ง ต้าย’ วั้ว โจ๋ว หว่า ม่าย หาย หญู่ง เอ๋ย เล์ย?”

11ไซ-ก๋อ บัว ฯฒฯ หน่าย เยซู, “หฌาว เล์ย เญย ฟิน-แซง เหว่ย หาย ติ่ว ก๊อง เอลียา อ๋อย หฒุ ต้าย ด่าง?”

12เยซู เตา, “เอลียา หฒะเก้ง ต้าย ด่าง, ปุน หญู่งๆ หฑวน ต้าย ฮนั้ง โล์ วั้ว นอ. มป่า กีง-โซว เหว่ย หาย ติ่ว เฟี้ย ป้าม เมี่ยน เญย ตอน อ๋อย หฒุ เสี่ยว เหฒีย หญู่ง โค้ว, หย่า หฒุ เมี่ยน เฆ่ม?

13เยีย บั๋ว เม่ย บัว, เอลียา ฒู้ง เถา ต้าย อ๊ะ. เมี่ยน หย่า เซว่ย เอ๋ย โหฒว ปุน นิ่น หมี่ อ๊ะ, ฮนั้ง กีง-โซว เฟี้ย เจี๊ยน ก๊อง นอ.”

14เยซู บัว แอ๋ง หฑวน เถา วั้ว เต๋ย ไซ-ก๋อ บัว วั้ว, ปวัด เมี่ยน ธั้ม ไห่ เว่ย ก๋อม นิ่น บัว. แอ๋ง ม่าย เต๋ย หฌาว เล์ย เญย ฟิน-แซง เยียม วั้ว เหธา นิ่น บัว แฑง.

15หฒวัง เมี่ยน เยี้ยด ปวัด เยซู, นิ่น บัว เก้ง บัวะ ฮ่อง ไห่ หย่า ถิว เจี๊ยน มี่ง ฒิบ.

16เยซู หน่าย นิ่น เญย ไซ-ก๋อ, “เม่ย บัว เหธา นิ่น บัว แฑง หาย หญู่ง?”

17เยียม หฒวัง เมี่ยน กะญั์ว, ม่าย ล่าน เมี่ยน เตา, “ฟิน-แซง อ่า, เยีย ต้อ เยีย เญย ตอน ต้าย ล์อ เม่ย เหว่ย หฒุ ม่าย เต้า เฮยี่ย ไกว๊ เมี้ยน มัวะ นิ่น ไม้ ไฮ่ ก๊อง หว่า.

18ไม้ กุ๊น เยียม หาย, เมี้ยน หย่า มัวะ นิ่น, เฒาะ นิ่น ฒง เหฌี่ย เดา. ม่าย ววม-ฑุ่ย บย์าว ธ้วด, นิ่น หย่า หงาด เจี๊ยน ญ่า, เธียว แหง่ง เหฑ่ง. เยีย โท้ เม่ย เญย ไซ-ก๋อ หฒุ่น เมี้ยน ธ้วด, มป่า นิ่น บัว ไม้ ไฮ่ หฒุ่น ไม้ ธ้วด.”

19เยซู บั๋ว นิ่น บัว, “เม่ย บัว น้าย ต่อย เมี่ยน อ้า! เม่ย บัว หฒะเก้ง ไม้ เสียน! เยีย อ๋อย หฒุ เหธา เม่ย บัว เยียม ด่ง หาย เล่า? เยีย อ๋อย หฒุ เญี์ยน เม่ย บัว เถา หาย หฒั่น? ต้อ วั้ว เต้า ตอน ต้าย เยีย น้าย ม่าะ!”

20นิ่น บัว ฯฒฯ ต้อ วั้ว เต้า ตอน ต้าย. เมี้ยน เยี้ยด ปวัด เยซู, ฯฒฯ เลี่ยม เฒ่ย มัวะ วั้ว เต้า ตอน เธียว คีง เหฌี่ย เดา มี่ง, หฌัง ทิน หฌัง เต่ย เญย, หย่า ธ้วด ววม-ฑุ่ย บย์าว.

21เยซู หน่าย วั้ว เต้า ตอน เญย เตีย, “นิ่น ฮนั้ง น้าย นอ เป๋น ต้าย ด่ง หาย เล่า?” วั้ว เต้า เตีย เตา, “เยียม ไฝ เญย เฒี่ยง โห่ เป๋น ต้าย อ๊ะ.

22เหฒีย หฑุ่น วั้ว เต้า เฮยี่ย ไกว๊ เมี้ยน มัวะ นิ่น คีง เปียะ โต์ว-เหฑ่า ไฟ ด๊อด ววม, อ๋อย ปุน นิ่น ไต่. สี ก๊อง ฟิน-แซง ไฮ่ นอ, โท้ ค้อ-เลี่ยน เยีย บัว, เถง เยีย บัว ม่าะ!”

23เยซู ก๊อง, “เม่ย หน่าย, ‘สี ก๊อง เม่ย ไฮ่?’ ตะฟ่าน หาย เต้า เสียน, นิ่น หญู่งๆ โหฒว ตุ๊ เญย.”

24วั้ว เต้า ตอน เญย เตีย เลี่ยม เฒ่ย เห่ว เจี๊ยน ก๊อง, “เยีย เสียน เญย, มป่า ต้ง เยีย เสียน ไม้ เถา เญย, โท้ เม่ย เถง เยีย ไฮ่ เสียน.”

25เยซู ปวัด หฒวัง เมี่ยน เบ๋ง เจี๊ยน ต้าย ฟัด ไห่ ฯฒฯ หัด วั้ว เต้า เฮยี่ย ไกว๊ เมี้ยน. นิ่น ก๊อง, “เม่ย หน่าย เต้า มน่อม ดูง, กะน้าย-หฮงง เมี้ยน อ้า! เยีย หัด เม่ย ธ้วด น้าย เต้า ตอน ต้าย, เหยียด ลิ์ว ไม้ ตู๋ง มัวะ นิ่น อ๊ะ.”

26เมี้ยน ไว์ๆ เญย เห่ว, แอ๋ง มัวะ วั้ว เต้า ตอน เธียว โค้ว ไห่, เฒียง หน่าย ธ้วด หมี่ อ๊ะ. ปวัด วั้ว เต้า ตอน ฮนั้ง จั๋น-ไต่ นอ. เมี่ยน ธั้ม ฯฒฯ ก๊อง, “นิ่น ไต่ หมี่ อ๊ะ โล่ะ!”

27มป่า เยซู นั้น เจี๊ยน นิ่น เญย ปั์ว, เคน เจี์ย ซิน ต้าย. นิ่น ฯฒฯ โซ้ว เจี๊ยน อ๊ะ.

28ฆะฮ้า เยซู เปียะ เปย๊า, ไซ-ก๋อ บัว ปี๋ง เจี๊ยน หน่าย นิ่น, “เยีย บัว เหว่ย หาย ติ่ว หฒุ่น วั้ว เต้า เมี้ยน ไม้ ธ้วด?”

29เยซู เตา, “อ๋อย หฒุ เต๋า เก๋า หธีง ต้าย ไฮ่ หฒุ่น ตุ๊ น้าย หญู่ง เมี้ยน ธ้วด. ไม้ ม่าย กั้น หญู่ง หฒะเอ๋ย อ๊ะ.”

30เยซู บัว เล่ย ฆอย วั้ว นอม ต๋อง แอ๋ง เจี๋ย กาลิลี แซ้ง. เยซู ไม้ อ๋อย หาย เต้า ฮิ้ว ตุ๊ นิ่น เยียม หาย,

31เหว่ย หฒุ นิ่น หฌาว เจี๊ยน นิ่น เญย ไซ-ก๋อ. นิ่น ก๊อง บั๋ว ไซ-ก๋อ บัว, “เยีย, ป้าม เมี่ยน เญย ตอน, ฒู้ง อ๋อย หฒุ จิว ปุน เมี่ยน. นิ่น บัว อ๋อย ไต๋ เยีย มป่า ฆะฮ้า ปัว ฮนอย เยีย อ๋อย นั่ง ต้าย.”

32มป่า ไซ-ก๋อ บัว ไม้ เม่ง แปะ น้าย โจ๋ว หว่า เญย เอ๋ย เล์ย หย่า กั้ม เหฑีย ไม้ หน่าย เยซู.

33นิ่น บัว มี่ง เถา คาเปนาอุม มู้ง. เปียะ เปย๊า มี่ง, เยซู ฯฒฯ หน่าย นิ่น เญย ไซ-ก๋อ บัว, “กัน เจ๊า ต้าย วั้ว หฒั่น, เม่ย บัว แฑง หาย หญู่ง?”

34มป่า นิ่น บัว ไม้ โค โล เหว่ย หฒุ กัน เจ๊า ต้าย วั้ว หฒั่น นิ่น บัว แฑง หาย เต้า โหฒว เก้า โฮล เจี๋ย.

35เยซู ฯฒฯ เฒว์ย เหฌี่ย, เห่ว นิ่น เญย เหฒียบ เหญ่ย เต้า ไซ-ก๋อ ต้าย ฒุ้น ฯฒฯ บั๋ว นิ่น บัว, “หาย เต้า อ๋อย โหฒว โฮล เจี๋ย, วั้ว เต้า อ๋อย หฒุ ปุน กั้น โหฒว ไฝ เจี๋ย หย่า โหฒว หฒวัง เมี่ยน เญย โปว.”

36เยซู แอ๋ง เคน เต้า ฝุเจว๊ย ต้าย โซ้ว เจี๊ยน นิ่น บัว บุด๋ง หย่า ฮล้อบ เจี๊ยน บั๋ว ไซ-ก๋อ บัว,

37“หาย เต้า เต๊ง เยีย เญย บั๋ว ฒิบ เต้า น้าย เต๋ย ไฝ เญย ฝุเจว๊ย, วั้ว เต้า หย่า ฒิบ เยีย. หาย เต้า ฒิบ เยีย, ไม้ ตาน ฒิบ เยีย, นิ่น หย่า ฒิบ พ้าย เยีย ต้าย วั้ว เต้า.”

38โยฮัน บั๋ว เยซู, “ไซ-เตี๋ย อ้า! เยีย บัว ปวัด เต้า เมี่ยน หล่ง เม่ย เญย บั๋ว หฒุ่น เมี้ยน ธ้วด. เยีย บัว ฯฒฯ ล่าน นิ่น, ไม้ ปุน โหฒว, เหว่ย หฒุ นิ่น ไม้ เฒ์ย โหฒว บัว เญย กวั้น.”

39เยซู บั๋ว นิ่น บัว, “ไม้ ตู๋ง ล่าน นิ่น, เหว่ย หฒุ ไม้ ม่าย หาย เต้า ไฮ่ หล่ง เยีย เญย บั๋ว โหฒว ลิ์ว บัวะ ฮ่อง เญย สี่, ดุ ตั้ง ฮนั้ง ต๋าว หฑวน ต้าย ก๊อง โตะ เยีย.

40เหว่ย หฒุ หาย เต้า ไม้ เหธา บัว ต๋อย-เตก, วั้ว เต้า เซ เถง บัว อ๊ะ.

41เยีย บั๋ว เฒียน เม่ย บัว, หาย เต้า ปุน ฒ้าน ววม เม่ย บัว ฮบ เหว่ย หฒุ เม่ย บัว เกวย กีตู่, วั้ว เต้า เญย ฒี่ง เหญ่ย ไม้ ไฮ่ ด๊อด.”

42“สี ก๊อง หาย เต้า ดั๊ว เหยียด เต้า น้าย เต๋ย เสียน เยีย เญย ฝุเจว๊ย-ไฝ ป์าม ฒุ์ย, เฒาะ ต้ม หม่อ ดิ๋ว เจี๊ยน วั้ว เต้า เญย จาง, ปู๋ง เหฌี่ย ค้อย เก้า หลง.

43“สี ก๊อง เม่ย เญย ปั์ว ดั๊ว เม่ย ป์าม ฒุ์ย, อ๋อย หฒุ ฮงะ กวั่ง. โหฒะ เจี๊ยะ ปั์ว มป่า ตุ๊ เหยียด ลิ์ว เญย แหม่ง หธ่อ เก้า หลง ม่าย อี เจี๊ยะ ปั์ว มป่า ด๊อด เต่ย หญัวะ, เปียะ เหยียด ลิ์ว เหฒียะ เจี๊ยน เญย โต์ว.

44เยียม วั้ว หญั่น นิ่น บัว วั้ว เต๋ย แกง-เมา เหยียด ลิ์ว ไม้ ไต่. ปั๊ว นิ่น บัว วั้ว หญู่ง โต์ว หย่า เหยียด ลิ์ว เหฒียะ เจี๊ยน เญย.

45“สี ก๊อง เม่ย เญย เหฒา ดั๊ว เม่ย ป์าม ฒุ์ย, อ๋อย หฒุ ฮงะ กวั่ง. โหฒะ เจี๊ยะ เหฒา มป่า ตุ๊ เหยียด ลิ์ว เญย แหม่ง หธ่อ เก้า หลง ม่าย อี เจี๊ยะ เหฒา มป่า หฒุ ฒอย เหฌี่ย เต่ย หญัวะ.

46เยียม วั้ว หญั่น นิ่น บัว วั้ว เต๋ย แกง-เมา เหยียด ลิ์ว ไม้ ไต่. ปั๊ว นิ่น บัว วั้ว หญู่ง โต์ว หย่า เหยียด ลิ์ว เหฒียะ เจี๊ยน เญย.

47“สี ก๊อง เม่ย เญย มฒีง ดั๊ว เม่ย ป์าม ฒุ์ย อ๋อย หฒุ เกว๋ย กวั่ง มี่ง. โหฒะ นอม มฒีง มป่า ตุ๊ เปียะ ทิน-ฮู่ง เญย กั๊วะ หธ่อ เก้า หลง ม่าย อี นอม มฒีง หย่า หฒุ ฒอย เหฌี่ย เต่ย หญัวะ.

48เยียม วั้ว หญั่น นิ่น บัว วั้ว เต๋ย แกง-เมา เหยียด ลิ์ว ไม้ ไต่. ปั๊ว นิ่น บัว วั้ว หญู่ง โต์ว หย่า เหยียด ลิ์ว เหฒียะ เจี๊ยน เญย.

49“ทิน-ฮู่ง อ๋อย หล่ง โต์ว ปุน เต้าๆ เมี่ยน ธีง-เหฑ่ง, ฮนั้ง เมี่ยน เฒาะ เฑ้า อัน เหฒี่ย เญย กะน้าย เหว่ย ปุน วั้ว หญู่ง กะน้าย ธีง-เหฑ่ง, ไม้ ม่าย หวุย นอ.

50“เฑ้า เซ หลง เญย. มป่า สี ก๊อง เฑ้า เญย เหมวย ถุย ฒ้าม มี่ง, ฮนั้ง หาย นอ หน่อย ตุ๊ ฑ่าย ต้าย? เฑ้า ฮนั้ง หาย นอ ปุน หญั่น ฮบ ม่าย เหมวย, เม่ย บัว หย่า อ๋อย หฒุ ฮนั้ง วั้ว นอ ล่าน เหธา ล่าน โหฒว หอบ, ล่าน เหธา ล่าน หอบ ฟิม ต้ง เอ๋ย เญย เยียม.”

← Chapter 8 Jump to: Chapter 10 →