Mark 15

Mien Bible (Thai Script) © Thailand Bible Society, 2007

1ตะเหญ่ย ดอม เฑี้ยว เญย, ไซ เมี่ยน เปย๊ย เหธา เมี่ยน โก๋ เหธา หฌาว เล์ย เญย ฟิน-แซง, แอ๋ง เหธา กุ๊น สี่ หวุ่ย เญย หฒวัง เมี่ยน กั๊บ ฒุ้น ธ่าง ล่าง หอบ, ฯฒฯ โด้ เยซู, เคน มี่ง จิว ปุน ปีล้าด.

2ปีล้าด หน่าย นิ่น, “เม่ย โหฒว ยิวไท เมี่ยน เญย ฮู่ง?” เยซู เตา, “เซ ฮนั้ง เม่ย ก๊อง นอ.”

3ไซ เมี่ยน เปย๊ย หย่า โก๋ ธั้ม-หญู่ง สี่ เยซู.

4ปีล้าด ฯฒฯ หน่าย นิ่น, “หมวัง ก๋า! นิ่น บัว โก๋ เม่ย ด่ง หน่าย ธั้ม. เม่ย ไม้ เตา นิ่น บัว ไฟ?”

5มป่า เยซู ไม้ เตา เหยียด โจ๋ว. ปีล้าด ฯฒฯ บัวะ ฮ่อง ไห่.

6หฮญังๆ เถา เสีย แหม่ง ฒิบ, ปีล้าด ม่าย เล์ย ปู๋ง เต้า ฒุ์ย-เมี่ยน หฒิว แปะ ฝีง โท้ ปู๋ง หาย เต้า.

7ม่าย เต้า หฒุ หววน เจี๊ยน โล่, บั๋ว เห่ว บาลับบัด, ต้ง เหธว หลุ่น เต่ย-ปูง, ไต๋ เมี่ยน วั้ว กวั้น เญย เหยียด เต้า.

8หฒวัง เมี่ยน ต้าย โท้ ปีล้าด โหฒว ฮนั้ง นิ่น เหยียด เกา โหฒว นอ.

9ปีล้าด ฯฒฯ หน่าย, “เม่ย บัว อ๋อย เยีย ปู๋ง ยิวไท เมี่ยน เญย ฮู่ง ปุน เม่ย บัว ไฟ?”

10ปีล้าด ฮิ้ว ตุ๊ ไซ เมี่ยน เปย๊ย เหมว่ย เจี๊ยะ เยซู หธีง ต้าย เฒาะ จิว ปุน นิ่น.

11มป่า ไซ เมี่ยน เปย๊ย โธะ หฒวัง เมี่ยน โท้ ปู๋ง บาลับบัด ตี๊ เยซู.

12ปีล้าด แอ๋ง หน่าย หฑุ่น หฒวัง เมี่ยน, “วั้ว หญู่ง, ต้ง เม่ย บัว เห่ว ยิวไท เมี่ยน เญย ฮู่ง วั้ว เต้า, เม่ย บัว อ๋อย เยีย ฮนั้ง หาย นอ โหฒว?”

13นิ่น บัว เหน่า เจี๊ยน ก๊อง, “เฒาะ นิ่น ตีง เจี๊ยน เหฒียบ หฑั่ง จ๋า.”

14ปีล้าด หน่าย, “วั้ว หญู่ง, นิ่น โหฒว ต่อง หาย หญู่ง ฒุ์ย?” มป่า หฒวัง เมี่ยน จา เห่ว เก้า บุย, “เฒาะ นิ่น ตีง เจี๊ยน เหฒียบ หฑั่ง จ๋า ม่าะ!”

15ปีล้าด อ๋อย ปุน หฒวัง เมี่ยน อะเฮน้ย ฯฒฯ เอย นิ่น บัว โท้ เญย หว่า ปู๋ง บาลับบัด. นิ่น แอ๋ง เห่ว แปง หล่ง ปย๊า-ปิน เบ๊าะ เยซู, ฯฒฯ จิว ปุน แปง ต้อ มี่ง ตีง เหฒียบ หฑั่ง จ๋า.

16แปง ฯฒฯ ต้อ เยซู เปียะ หฒูง เญย ติ่น กะญั์ว, แอ๋ง เห่ว วั้ว กวั้น แปง เหยียด ฒู้ง ต้าย ฑ่อย.

17นิ่น บัว เฒาะ เต๋ย ลุย-ด๊าว เซ้ด หลัวะ เถง เยซู ปุ๋ย เจี๊ยน, แอ๋ง หล่ง ฌิ้ม ธิ นอม ฮู่ง นี้ง ด๋ง เจี๊ยน นิ่น เญย มฆ้อง.

18แปง เฒาะ เยียะ ปุน เยซู หย่า ก๊อง, “ยิวไท เมี่ยน เญย ฮู่ง อ้า! เฒี่ยง ตุ๊ หม่าน ฝุย อ๊ะ.”

19นิ่น บัว แอ๋ง หล่ง หลัวะ ติ แกว๊ง เบ๊าะ นิ่น เญย มฆ้อง, ทุ้ย ววม-ฑุ่ย แน้ด นิ่น, หย่า เกว่ย เหฌี่ย ป๋าย.

20กวัด โตะ จั๊ด ลิ์ว, นิ่น บัว ไจ๊ ฆอย วั้ว เต๋ย ลุย-ด๊าว-หลัวะ แอ๋ง เฒาะ นิ่น กั้น เญย ลุย เถง นิ่น ฒุ เจี๊ยน. นิ่น บัว ฯฒฯ ต้อ นิ่น ธ้วด มี่ง ตีง เหฒียบ หฑั่ง จ๋า.

21มี่ง เกา, นิ่น บัว ปวั้ง หฒุ เต้า ไซลีน เมี่ยน, บั๋ว เห่ว ซีโมน, ต้ง อาเล้กซานเด เหธา ลูฟัด เญย เตีย. นิ่น เยียม วั้ว น่า ต้าย อ๋อย เปียะ ฒี่ง, แปง ฯฒฯ อ๊าบ นิ่น ดาม เยซู เญย เหฒียบ หฑั่ง จ๋า.

22นิ่น บัว ต้อ เยซู มี่ง เถา นอม ต๋อง, บั๋ว เห่ว โกนโกทา. เอ๋ย เล์ย เซ มฆ้อง-เคาะ ต๋อง.

23เยียม วั้ว นิ่น บัว เฒาะ อะหงุ่น ติ๊ว เผว เจี๊ยน มูหย่อ เดีย ปุน เยซู ฮบ, มป่า นิ่น ไม้ ฮบ.

24ฆะฮ้า แปง เฒาะ เยซู ตีง เจี๊ยน เหฒียบ หฑั่ง จ๋า. นิ่น บัว เฒาะ นิ่น เญย ลุย-โหว ปุน ฆอย, โด๊ว หมั่ง ก๋า หาย เต้า ตุ๊ หาย หญู่ง.

25เฒาะ เยซู ตีง เหฒียบ หฑั่ง จ๋า วั้ว หฒั่น เซ ลู่ง ดอม ดั้ว นอม เฒี่ยง โห่.

26โก๋ เยซู วั้ว เต๋ย หว่า หย่า เฟี้ย เจี๊ยน ก๊อง, “ยิวไท เมี่ยน เญย ฮู่ง.”

27นิ่น บัว แอ๋ง ตีง อี เต้า หฒะ แปง เยียม เยซู เญย กะเฮลน. ม่าย เต้า เยียม บย่าว แหมง. ม่าย เต้า เยียม หฒาย แหมง.

28ฮนั้ง หน่าย, กีง-โซว เฟี้ย เจี๊ยน ก๊อง, “นิ่น หฒุ เหธา ฒุ์ย-เมี่ยน ตี่ง ฒุ์ย,” วั้ว โจ๋ว หว่า หฒะเก้ง ธ้วด ต้าย เฒียน เญย.

29เจี๋ย เจ๊า เญย เมี่ยน คี นิ่น, หฮวัง เจี๊ยน มฆ้อง ก๊อง, “อ๊า, เม่ย อ๋อย แธะ หฒั่ง ทิน-ฮู่ง เญย เปย๊า. ฆะฮ้า ปัว ฮนอย แอ๋ง กั้น เหธย เจี์ย ต้าย นี!

30เหฌียว เม่ย กั้น อ๊ะ. เหฌี่ย เหฒียบ หฑั่ง จ๋า ต้าย ม่าะ!”

31ไซ เมี่ยน เปย๊ย เหธา หฌาว เล์ย เญย ฟิน-แซง ฟี่ ฮนั้ง เญย จั๊ด นิ่น. ล่าน ก๊อง บั๋ว ล่าน, “นิ่น เหฌียว ตุ๊ เมี่ยน มป่า ไม้ ไฮ่ เหฌียว นิ่น กั้น เอาะ!

32อิสะลาเอน เญย ฮู่ง, กีตู่ อ้า! อี้ หฒั่น เหฌี่ย เหฒียบ หฑั่ง จ๋า ต้าย ปุน เยีย บัว ตุ๊ ปวัด ฯฒฯ เสียน.” ตีง เจี๊ยน เยซู เญย กะเฮลน วั้ว เต๋ย อี เต้า หฒะ แปง ฟี่ ฮนั้ง เญย คี นิ่น.

33ลู่ง เหฒียง อ๋าน, วั้ว นอม เต่ย-ปูง หฮมวัง เหฑ่ง, เถา เหฌี่ย อ๋าน ปัว นอม เฒี่ยง โห่.

34เหฌี่ย อ๋าน ปัว นอม เฒี่ยง โห่, เยซู เห่ว เฉีย โฮล เญย ก๊อง, “เอโลอี, เอโลอี, ลามาซาบักทานี!” เอ๋ย เล์ย เซ, “เยีย เญย ทิน-ฮู่ง! เยีย เญย ทิน-ฮู่ง! เม่ย เหว่ย หาย ติ่ว กวั่ง เยีย?”

35ม่าย เต๋ย โซ้ว กะเฮลน เญย เมี่ยน ไฮ์ นิ่น เห่ว ฯฒฯ ก๊อง, “หมวัง ก๋า! นิ่น เห่ว เอลียา.”

36ม่าย เต้า เมี่ยน ถิว มี่ง เฒาะ ไล-เหฑย-ซ้อด, เหฒียม เจี๊ยน อะหงุ่น ติ๊ว-ซุย, หล่ง หลัวะ ติ แกว๊ง ป๊ะ เจี๊ยน ธุ้น ปุน เยซู ฮบ. นิ่น หย่า ก๊อง, “บัว ฒั้ว หมั่ง ก๋า, เอลียา เก้ง ต้าย ปู๋ง นิ่น เหฌี่ย ไฟ?”

37เยซู แอ๋ง เห่ว หฑุ่น เฉีย โฮล เญย, ฯฒฯ ตั๋ง เฉีย หมี่ อ๊ะ.

38เยียม หฒั่ง ทิน-ฮู่ง เญย เปย๊า กะญั์ว วั้ว คว้าย แบะ แก้ง เดีย เยียม กู้ หงว่าย บ๋าย ตอง กะเดี๊ย โหฒว อี แหมง หมี่ อ๊ะ.

39โซ้ว เจี๊ยน เหฒียบ หฑั่ง จ๋า หฑะเฮมียน แหมง วั้ว เต้า แปง-เปย๊ย ปวัด เยซู ฮนั้ง น้าย นอ ไต่ ฯฒฯ ก๊อง, “น้าย เต้า หฒะเก้ง ทิน-ฮู่ง เญย ตอน อ๊ะ!”

40ม่าย เต๋ย มเซียะ ตอน หย่า เยียม วั้ว โก เต๋ย เญย หมั่ง เจี๊ยน. วั้ว เต๋ย มเซียะ ตอน ม่าย เต้า มักดาลา มู้ง เญย มาลียา, แอ๋ง ม่าย ยากอบ ไฝ เหธา โยเสด เญย มา, มาลียา, แอ๋ง ม่าย สะโลเม.

41เยซู เยียม กาลิลี วั้ว หฒั่น, น้าย เต๋ย มเซียะ ตอน กัน เจี๊ยน นิ่น มี่ง หย่า ฟู-สู นิ่น. แอ๋ง ม่าย เหธา เยซู มี่ง เยลูซาเลม วั้ว เต๋ย มเซียะ ตอน ธั้ม เญย หย่า เยียม วั้ว.

42ลู่ง ม์าน-หฮมวัง อ๊ะ, อาลิมาเทีย มู้ง วั้ว เต้า โยเซ้บ ต้าย เถา. นิ่น เซ เหยียด เต้า กุ๊น สี่ หวุ่ย เญย เมี่ยน, เมี่ยน หย่า ท่าย ไห่ นิ่น. โยเซ้บ หย่า ฒั้ว เจี๊ยน ทิน-ฮู่ง ต้าย โหฒว เฒี้ยว กุ๊น เมี่ยน เญย เฒี่ยง โห่ เถา. เยซู ไต่ วั้ว นอม ฮนอย เซ ต้ง หลิ่ว เล์ย เจี๋ย ตี้ง กง ฮนอย วั้ว นอม ฮนอย, โยเซ้บ หธีง ต้าย ปู๋ง หล่าง เญย มี่ง ล์อ ปีล้าด, โท้ เยซู เญย เซย.

44ปีล้าด ไฮ์ ก๊อง เยซู ไต่ หมี่ อ๊ะ, ฯฒฯ บัวะ ฮ่อง ไห่. นิ่น เห่ว แปง-เปย๊ย ต้าย หน่าย นิ่น, “เยซู ไต่ หมี่ อ๊ะ ไฟ?”

45แปง-เปย๊ย บั๋ว ลิ์ว ปีล้าด, ปีล้าด ฯฒฯ ฆอย ฑุ่ย ปุน เยซู เญย เซย โยเซ้บ.

46โยเซ้บ ม์าย คว้าย ล่าม่า เดีย ต้าย ฯฒฯ มี่ง เฒาะ เยซู เญย เซย เหฌี่ย, หล่ง ล่าม่า เดีย เปว เจี๊ยน หย่า ต้อ มี่ง หฒัง นอม หฒุ ต้าย เญย หละเปย๊ย-โฒ้ว. หฒัง ลิ์ว, นิ่น ฯฒฯ แอ๋ง ทุย คว้าย หละเปย๊ย แบะ เจี๊ยน โฒ้ว-แก้ง.

47มักดาลา มู้ง เญย มาลียา เหธา โยเสด เญย มา, มาลียา, หมั่ง เจี๊ยน โยเซ้บ หฒัง เยซู เญย เซย เยียม หาย.

← Chapter 14 Jump to: Chapter 16 →