Mark 8

Mien Bible (Thai Script) © Thailand Bible Society, 2007

← Chapter 7 Jump to: Chapter 9 →

1เยียม วั้ว เต๋ย ฮนอย เมี่ยน ธั้ม ไห่ แอ๋ง กั๊บ ฒุ้น. โหฒว เกา, นิ่น บัว ไม้ ม่าย หาย หญู่ง หญั่น อ๊ะ. เยซู ฯฒฯ เห่ว นิ่น เญย ไซ-ก๋อ บัว ต้าย หย่า บั๋ว นิ่น บัว,

2“เยีย ค้อ-เลี่ยน ไห่ น้าย เต๋ย เมี่ยน. นิ่น บัว ต้าย เหธา เยีย เยียม ตุ๊ ปัว ฮนอย อ๊ะ. อี้ หฒั่น หย่า ไม้ ม่าย หาย หญู่ง หญั่น.

3สี ก๊อง เยีย ปุน นิ่น บัว เฮญี้ยว เซีย เจี๊ยน หฑวน เปย๊า, เฑ่า เหย เถา ด๊าม-เจ๊า เมา ไห่, ไฮ่ คีง มเปย. ม่าย เต๋ย หย่า เยียม โก เญย ต้าย.”

4นิ่น เญย ไซ-ก๋อ บัว เตา, “เยียม น้าย เต่ย-ปูง-ฮวาง, หาย เต้า ไฮ่ ล์อ ตุ๊ กะน้าย เก๋า ปุน ด่ง หน่าย ธั้ม เญย เมี่ยน หญั่น?”

5เยซู หน่าย นิ่น บัว, “เม่ย บัว ม่าย บัวะ เหฒีย นอม ฌั้ว?” นิ่น บัว เตา, “ม่าย เสี่ย นอม.”

6เยซู ฯฒฯ เห่ว หฒวัง เมี่ยน เฒว์ย เจี๊ยน วั้ว เดา. นิ่น เฒาะ วั้ว เต๋ย เสี่ย นอม ฌั้ว ต้าย แล์ง ฒี่ง ลิ์ว ทิน-ฮู่ง, แอ๋ง แมะ ฆอย ธุ้น ปุน ไซ-ก๋อ ต้อ มี่ง ปุน ฆอย หฒวัง เมี่ยน. ไซ-ก๋อ บัว ฯฒฯ ต้อ มี่ง ปุน ฆอย หฒวัง เมี่ยน อ๊ะ.

7นิ่น บัว แอ๋ง ม่าย อี เหฒีย เต้า เบย์า-ตอน. เยซู ฯฒฯ เหว่ย น้าย เต๋ย เบย์า แล์ง ฒี่ง ลิ์ว ทิน-ฮู่ง, ฯฒฯ บั๋ว ไซ-ก๋อ บัว ปุน ฆอย หฒวัง เมี่ยน.

8หฒวัง เมี่ยน หญั่น เป๊ว เหฑ่ง. ไซ-ก๋อ บัว ฯฒฯ มี่ง เซียว หญั่น เหฒ่ง วั้ว เต๋ย ต้าย ตั๊บ ปวั๊ง เสี่ย นอม ดาน.

9หญั่น เญย เมี่ยน เล่ย ไม้ โก เปยย ธิน ล่าน. เยซู เห่ว หฒวัง เมี่ยน ปุน หฑาน ลิ์ว,

10ฯฒฯ เหธา นิ่น เญย ไซ-ก๋อ เลี่ยม เฒ่ย เปียะ ฑั้ง มี่ง ดานมานูทา เต่ย.

11ม่าย เต๋ย ฟาลิสี เมี่ยน ต้าย ล์อ เยซู, ฯฒฯ เจี์ย กอน เหธา เยซู แฑง. นิ่น บัว อ๋อย เสย นิ่น หธีง ต้าย โท้ นิ่น ปุน นอม เยียม ทิน-ต้อง ต้าย เญย จั๋ง-โห่.

12เยซู เท้า เจี๊ยน ต้ม เฉีย ก๊อง, “น้าย ต่อย เมี่ยน เหว่ย หาย ติ่ว โท้ นอม จั๋ง-โห่? เยีย ก๊อง เฒียน บั๋ว เม่ย บัว, เยีย ไม้ ปุน จั๋ง-โห่ เม่ย บัว อี้ จ๋า เญย เมี่ยน หมั่ง.”

13เยซู ฯฒฯ เล่ย ฆอย นิ่น บัว หมี่ อ๊ะ. แอ๋ง เปียะ ฑั้ง แฑง เจี๊ยน มี่ง วั้ว หง่าน หฒิ ค้อย-ตอน.

14ไซ- ก๋อ บัว หละคุ ไม้ ต้อ ฌั้ว มี่ง. นิ่น บัว เยียม วั้ว ฑั้ง ขูง ม่าย ดุ นอม ฌั้ว ฮนั้ง.

15เยซู บั๋ว นิ่น บัว, “อ๋อย หฒุ ไฝ ฟิม, บู้ง เจี๊ยน ฟาลิสี เมี่ยน เญย ปี๊ง เหธา เฮโล้ด ฮู่ง เญย ปี๊ง.”

16ไซ-ก๋อ บัว, ล่าน เหธา ล่าน ก๊อง, “ไซ-เตี๋ย ฮนั้ง น้าย นอ ก๊อง เหว่ย หฒุ บัว ไม้ ม่าย ฌั้ว มเปย?”

17เยซู ฮิ้ว ตุ๊ นิ่น บัว ฮนั้ง หาย นอ ก๊อง, นิ่น ฯฒฯ หน่าย นิ่น บัว, “เม่ย บัว เหว่ย หาย ติ่ว ธ่าง ล่าง ก๊อง ไม้ ม่าย ฌั้ว? เม่ย บัว หธ่อ ไม้ เม่ง แปะ, ไม้ เปียะ เฮญี้ยว ไฟ? เม่ย บัว หฒะเก้ง ด่ง หน่าย หฮงง?

18เม่ย บัว ม่าย มฒีง หย่า หมั่ง ไม้ ปวัด? ม่าย มน่อม หย่า หมวัง ไม้ ไฮ์? เม่ย บัว ไม้ จั๋ง ไฟ?

19เยีย แมะ ฆอย ปยา นอม ฌั้ว ปุน ปยา ธิน ล่าน เมี่ยน หญั่น วั้ว หฒั่น, เม่ย บัว เซียว หญั่น เหฒ่ง เญย, ตุ๊ บัวะ เหฒีย ดาน ปวั๊ง?” นิ่น บัว เตา, “ตุ๊ เหฒียบ เหญ่ย ดาน.”

20เยซู แอ๋ง หน่าย, “เยีย แมะ ฆอย เสี่ย นอม ฌั้ว ปุน เปยย ธิน ล่าน เมี่ยน หญั่น วั้ว หฑุ่น, เม่ย บัว เซียว หญั่น เหฒ่ง วั้ว เต๋ย ตุ๊ บัวะ เหฒีย ดาน?” นิ่น บัว เตา, “ตุ๊ เสี่ย ดาน.”

21เยซู แอ๋ง หน่าย, “ฮนั้ง หน่าย, เม่ย บัว หธ่อ ไม้ แก้ง เม่ง แปะ ไฟ?”

22เยซู บัว ต้าย เถา เบดไซดา ล์าง, ม่าย เต๋ย เมี่ยน เคน เต้า มฒีง แม่ง เญย เมี่ยน ต้าย ล์อ เยซู, โท้ เยซู มาน นิ่น.

23เยซู เคน เจี๊ยน วั้ว เต้า มฒีง แม่ง เญย เมี่ยน ธ้วด กะเหญี่ย หฒิ ล์าง ฯฒฯ ทุ้ย ววม-ฑุ่ย ฒ่า เจี๊ยน นิ่น เญย มฒีง, หย่า หล่ง ปั์ว มาน เจี๊ยน หน่าย นิ่น, “เม่ย หมั่ง ตุ๊ ปวัด เต๋ย หาย หญู่ง ไฟ?”

24วั้ว เต้า เมี่ยน เธา เฮมียน ต้าย หมั่ง หย่า ก๊อง, “เยีย ปวัด เมี่ยน มป่า ปวัด นิ่น บัว ฮนั้ง เดี๋ยง นอ, ยั่ง มี่ง ยั่ง ต้าย.”

25เยซู แอ๋ง มาน หฑุ่น นิ่น เญย มฒีง. นิ่น ฯฒฯ ชะ หมั่ง. น้าย หฑุ่น ฯฒฯ หมั่ง ตุ๊ ปวัด อ๊ะ. หาย หญู่ง หย่า ปวัด ตุ๊ เฒียน.

26เยซู เห่ว นิ่น หฑวน เปย๊า แอ๋ง หัด นิ่น, “ไม้ ตู๋ง แอ๋ง เปียะ ล์าง อ๊ะ โอ่.”

27เจี๋ย มี่ง, เยซู เหธา นิ่น เญย ไซ-ก๋อ บัว มี่ง ซีซาลียา ฟีลิบพอย ฒี่ง เญย ฟิ้ว-ล์าง. กัน เจ๊า มี่ง วั้ว หฒั่น, เยซู หน่าย ไซ-ก๋อ บัว, “เมี่ยน ก๊อง เยีย ต้ง หาย เต้า?”

28นิ่น บัว เตา, “ม่าย เต๋ย ก๊อง เม่ย ต้ง เถง เมี่ยน เจี๋ย ววม เญย เล์ย วั้ว เต้า โยฮัน. ม่าย เต๋ย ก๊อง, เอลียา. แอ๋ง ม่าย เต๋ย ก๊อง, เป๋น เต้า โต่ว หว่า เมี่ยน.”

29เยซู แอ๋ง หน่าย นิ่น บัว, “เม่ย บัว นี? เม่ย บัว ก๊อง เยีย ต้ง หาย เต้า?” ปีเต เตา, “เม่ย ต้ง กีตู่ วั้ว เต้า.”

30เยซู ฯฒฯ หัด นิ่น บัว, “ธิน-หม่าน ไม้ ตู๋ง บั๋ว เมี่ยน เยีย ต้ง หาย เต้า.”

31เยียม หน่าย ต้าย เยซู เจี์ย กอน หฌาว นิ่น เญย ไซ-ก๋อ บัว, “เยีย, ป้าม เมี่ยน เญย ตอน, อ๋อย หฒุ เสี่ยว ธั้ม-หญู่ง โค้ว. เมี่ยน โก๋ เหธา ไซ เมี่ยน เปย๊ย เหธา หฌาว เล์ย เญย ฟิน-แซง อ๋อย เฆ่ม เยีย. เยีย หย่า อ๋อย หฒุ เมี่ยน ไต๋ ไต่ มป่า ตะฟาม ฮนอย เยีย แอ๋ง นั่ง ต้าย.”

32นิ่น ก๊อง น้าย เต๋ย สี่ เม่ง เญย. ปีเต ฯฒฯ เคน เยซู มี่ง เพียน เต๋ย ขวิน นิ่น.

33มป่า เยซู ฮวิน หฑวน หมั่ง เจี๊ยน ไซ-ก๋อ บัว, หย่า ก๊อง ปีเต, “ซาตาน อ้า! เปย๋า ฆอย ม่าะ! เม่ย ฮนั้ม เญย สี่ เซ ไม้ เฒ์ย ฮนั้ง ทิน-ฮู่ง ฮนั้ม. เซ ฮนั้ง ป้าม เมี่ยน ฮนั้ม ธ้วด เญย สี่ ฮนั้ง.”

34เยซู ฯฒฯ เห่ว หฒวัง เมี่ยน เหธา นิ่น เญย ไซ-ก๋อ บัว ต้าย ฒุ้น หย่า บั๋ว นิ่น บัว, “หาย เต้า อ๋อย กัน เยีย มี่ง อ๋อย หฒุ เซี้ย เจี๊ยน นิ่น กั้น, ดาม เจี๊ยน นิ่น เญย เหฒียบ หฑั่ง จ๋า, กัน เยีย มี่ง.

35หาย เต้า ขูง ฮนั้ม เหฌียว นิ่น กั้น เญย แหม่ง ฮนั้ง, วั้ว เต้า เญย แหม่ง ฯฒฯ หฒุ กวั่ง. มป่า หาย เต้า เหว่ย เยีย หย่า เหว่ย คู้ เฝียน กวั่ง นิ่น เญย แหม่ง, วั้ว เต้า ฯฒฯ เหฌียว ตุ๊ นิ่น เญย แหม่ง.

36หาย เต้า ตุ๊ เหฑ่ง ลู่ง เดี๊ย เญย กะน้าย มป่า หฒุ กวั่ง นิ่น เญย แหม่ง, วั้ว เต้า ตุ๊ หาย หญู่ง ม่าย ลั่ม หล่ง?

37นิ่น ม่าย หาย หญู่ง ไฮ่ ทิ้ว ตุ๊ นิ่น เญย แหม่ง หฑวน?

38เยียม น้าย ต่อย เอ๊าะ ไห่, เฮยี่ย เฮญี้ยว เญย เมี่ยน, สี ก๊อง หาย เต้า ไญ้ เยีย หย่า ไญ้ เยีย หฌาว เญย หว่า, เยีย, ป้าม เมี่ยน เญย ตอน, เยียม เยีย เญย เตีย เญย ฌัง-หล่าง, หย่า เหธา ธีง-เหฑ่ง เญย ฟิน-เมี่ยน ต้าย วั้ว หฒั่น, ฯฒฯ ไญ้ วั้ว เต้า อ๊ะ.”

← Chapter 7 Jump to: Chapter 9 →