Zechariah 11

Mien Bible (Thai Script) © Thailand Bible Society, 2007

← Chapter 10 Jump to: Chapter 12 →

1โอ เลบานอน อ้า! คอย ฆอย เม่ย เญย แก้ง, โต์ว ฯฒฯ ปั๊ว ชุย เม่ย เญย สีดา ฒ่ง เดี๋ยง.

2โอ ฒ่ง เดี๋ยง อ้า! อ๋อย หฒุ เญี้ยม อ๊ะ. เหว่ย หฒุ สีดา ฒ่ง เดี๋ยง บาง หมี่ อ๊ะ, หลง ไห่, เหฑว่ย ไห่ เญย เดี๋ยง ป่าย เหฑ่ง. บาซาน เญย บะอง เฒวย เดี๋ยง อ้า! อ๋อย หฒุ เญี้ยม, เหว่ย หฒุ โฮ์ ไห่ เญย เก้ม ก๋อย เหฑ่ง หมี่ อ๊ะ.

3หมวัง ม่าะ! โก๋ว ปะกี ยู่ง เญย เมี่ยน เญี้ยม, เหว่ย หฒุ นิ่น บัว ฌัง-หล่าง เญย เมี้ย-เธี้ยง หฒุ เหมียด เหฑ่ง หมี่ อ๊ะ. หมวัง ม่าะ! เซี่ยน ฌุ่น เญย เฉีย บุย เหว่ย หฒุ จอแดน ด้าย เฮลน เญย เดี๋ยง-หล่ม หฒุ ป่าย ฮวาง.

4เฒี้ยว, เยีย เญย ทิน-ฮู่ง, ฮนั้ง น้าย ก๊อง, “เม่ย อ๋อย หฒุ โหฒว ฮนั้ง เต้า โก๋ว ปะกี ยู่ง เญย เมี่ยน โก๋ว น้าย กวั้น อ๋อย หฒุ ไต๋ เญย ปะกี ยู่ง.

5ม์าย นิ่น บัว วั้ว เต๋ย ไต๋ นิ่น บัว หย่า ไม้ หฒุ ตี่ง ฒุ์ย. หม่าย ปะกี ยู่ง วั้ว เต๋ย ก๊อง, ‘เธง เฒี้ยว เหว่ย หฒุ เยีย ปุ๊ด ฒ่อย หมี่ อ๊ะ.’ โก๋ว นิ่น บัว วั้ว เต๋ย โก๋ว ปะกี ยู่ง เมี่ยน หย่า ไม้ ค้อ-เลี่ยน นิ่น บัว.”

6เฒี้ยว ก๊อง, “เยียม น้าย มี่ง เยีย ไม้ ค้อ-เลี่ยน น้าย นอม เต่ย-ปูง เญย เมี่ยน. หมั่ง ม่าะ! เยีย อ๋อย ปุน นิ่น บัว เก๊าะ-เมี่ยน หฒุ เยียม เก๊าะ-เมี่ยน เญย จวั่ง ล์าง เมี่ยน เญย ปั์ว-เดี๊ย, หย่า หฒุ เยียม นิ่น บัว เญย ฮู่ง เตี๋ย เญย ปั์ว-เดี๊ย. นิ่น บัว อ๋อย ป่าย หว่าย น้าย นอม เต่ย-ปูง. เยีย หย่า ไม้ เหฌียว หาย เต้า เปย๋า ดุ๊ด นิ่น บัว เญย ปั์ว-เดี๊ย.”

7เยีย ฯฒฯ โหฒว โก๋ว ปะกี ยู่ง เญย เมี่ยน โก๋ว อ๋อย หฒุ ไต๋ ไต่ เญย ปะกี ยู่ง. เยีย แอ๋ง เฒาะ อี ติ้ว ปย๊า-บย่า. ม่าย ติ้ว เห่ว “ฮู่ง เอน,” ม่าย ติ้ว เห่ว “กั๊บ เจี๊ยน.” เยีย หย่า โก๋ว ปะกี ยู่ง.

8เหยียด หฮลา เหญียะ กะญั์ว เยีย หฒุ่น ธ้วด ปัว เต้า โก๋ว ปะกี ยู่ง เญย เมี่ยน เหว่ย หฒุ เยีย ไม้ หน่อย ฟ่าน นิ่น บัว. นิ่น บัว หย่า ฑอง เยีย.

9เยีย ฯฒฯ ก๊อง บั๋ว ปะกี ยู่ง กวั้น, “เยีย ไม้ โหฒว เม่ย บัว เญย โก๋ว ปะกี ยู่ง เมี่ยน อ๊ะ. อ๋อย หฒุ ไต่, เซว่ย นิ่น ไต่ อ๊ะ. อ๋อย หฒุ เหมียด เญย, เซว่ย นิ่น หฒุ เหมียด อ๊ะ. เหฒ่ง เหฌี่ย เญย, เซว่ย นิ่น บัว ล่าน หญั่น ล่าน.”

10เยีย แอ๋ง เฒาะ เยีย เญย ปย๊า-บย่า, เห่ว “ฮู่ง เอน” วั้ว ติ้ว, ว้วด เน้า ปุน ธีง เยีย เหธา หม่าน ฝีง เหลียบ เญย แหง่ง หว่า เจี๋ย หมี่ อ๊ะ.

11ต้ง วั้ว ฮนอย วั้ว เต๋ย เหลียบ เญย แหง่ง หว่า เจี๋ย หมี่ อ๊ะ. ม์าย หม่าย ปะกี ยู่ง เญย เมี่ยน หมั่ง เจี๊ยน เยีย ฯฒฯ ฮิ้ว ตุ๊ น้าย เซ เฒี้ยว กั้น ก๊อง เญย หว่า.

12เยีย ฯฒฯ ก๊อง บั๋ว นิ่น บัว, “สี ก๊อง เม่ย บัว ปวัด หอบ นอ, โท้ เฒาะ เยีย เญย กง-ฒิ่น ปุน เยีย. สี ก๊อง ปวัด ไม้ หอบ นอ, ไม้ หฒุ ปุน อ๊ะ.” นิ่น บัว ฯฒฯ เฒาะ ฟ่า เหฒียบ นอม ฒิ่น ปุน เยีย โหฒว กง-ฒิ่น.

13เฒี้ยว ก๊อง บั๋ว เยีย, “ต้อ น้าย เต๋ย ฒิ่น แกว๋ง ปุน นั้น เนีย-มอ หฒั่ง.” เซ ต้ง นิ่น บัว ฝุน เยีย ผุย ตุ๊ ฒิบ เญย, หลง ไห่ เญย จ๋า-ฒิ่น. เยีย ฯฒฯ ต้อ วั้ว เต๋ย ฟ่า เหฒียบ นอม ฒิ่น มี่ง หฒั่ง เฒี้ยว เญย เปย๊า แกว๋ง ปุน นั้น เนีย-มอ หฒั่ง.

14เยีย แอ๋ง ว้วด เน้า เยีย เญย ตะเหญ่ย ติ้ว ปย๊า-บย่า, ต้ง ม่าย บั๋ว เห่ว “กั๊บ เจี๊ยน” วั้ว ติ้ว, ฯฒฯ แธะ ฆอย, ปุน ยูดา เหธา อิสะลาเอน โหฒว ก๋อ-โย์ว จิว ทง เญย เจ๊า ตั๋ง.

15เฒี้ยว แอ๋ง ก๊อง บั๋ว เยีย, “อ๋อย หฒุ แอ๋ง เฒาะ หฑุ่น ไม้ ลั่ม หล่ง เญย โก๋ว ปะกี ยู่ง เมี่ยน เญย จา-สี่,

16เหว่ย หฒุ เยีย อ๋อย เยียม น้าย นอม เต่ย-ปูง เหลียบ เต้า โก๋ว ปะกี ยู่ง เญย เมี่ยน. นิ่น ไม้ กุ๊น อ๋อย หฒุ ไต่ เญย, ไฟ ล์อ ตี๋ง ล่าย วั้ว เต๋ย. นิ่น หย่า ไม้ หฒ่อ หฒุ มุน เญย หย่า ไม้ ยู์ง หลง เฮ้น เญย วั้ว เต๋ย. ต๋าว หฑวน นิ่น อ๋อย หญั่น ปะกี ยู่ง จุ่น เญย อ๊อ, เลี่ยม เต้ย ฒู้ง เป๊ด เหฑ่ง.

17ไม้ ลั่ม หล่ง เญย โก๋ว ปะกี ยู่ง เมี่ยน, ต้ง กวั่ง นิ่น เญย ยู่ง กวั้น วั้ว เต้า อ๋อย หฒุ โค้ว อ๊ะ. โท้ ปุน หฑุ ด๊าว ฮงะ นิ่น เญย ปั์ว เหธา นิ่น เญย บย่าว ปูง มฒีง. โท้ ปุน นิ่น เญย บย่าว เจี๊ยะ ปั์ว เหญา ฆาย เหฑ่ง, ปุน นิ่น เญย บย่าว ปูง มฒีง แม่ง มี่ง.”

← Chapter 10 Jump to: Chapter 12 →