Zechariah 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1เฒี้ยว แอ๋ง ปุน เยีย หมั่ง ปวัด โยซูวา ต้ม ไซ เมี่ยน โซ้ว เจี๊ยน เฒี้ยว เญย ฟิน-เมี่ยน เญย หฑะเฮมียน. ซาตาน หย่า โซ้ว เจี๊ยน โยซูวา เญย บย่าว ปูง กะเฮลน อ๋อย โก๋ นิ่น.

2เฒี้ยว ก๊อง บั๋ว ซาตาน, “ซาตาน อ้า! เฒี้ยว หัด เม่ย อ๊ะ. เฒี้ยว, ต้ง กิ๊น เยลูซาเลม วั้ว เต้า, หัด เม่ย อ๊ะ. น้าย เต้า เมี่ยน ฮนั้ง เยียม โต์ว-เหฑ่า แปง ธ้วด ต้าย เญย เหยียด หฆัน ฒ่าง.”

3โยซูวา ฒุ เจี๊ยน ไล่ ฮลบ เญย ลุย-โหว โซ้ว เจี๊ยน ฟิน-เมี่ยน เญย หฑะเฮมียน.

4วั้ว เต้า ฟิน-เมี่ยน ฯฒฯ บั๋ว โซ้ว กะเฮลน วั้ว เต๋ย, “ไจ๊ ฆอย นิ่น ไล่ ฮลบ เญย ลุย-โหว ม่าะ!” นิ่น แอ๋ง ก๊อง บั๋ว โยซูวา, “หมั่ง ม่าะ! เยีย เฒาะ ฆอย เม่ย เญย ฒุ์ย หมี่ อ๊ะ, หย่า อ๋อย ปุน เม่ย ฒุ เหฑว่ย ไห่ เญย ลุย-โหว.”

5เยีย ฯฒฯ ก๊อง, “เฒาะ ติ้ว ธีง-เหฑ่ง เญย มฆ้อง-เปว เปว เจี๊ยน นิ่น เญย มฆ้อง.” นิ่น บัว ฯฒฯ เฒาะ ติ้ว ธีง-เหฑ่ง เญย มฆ้อง-เปว เปว เจี๊ยน นิ่น เญย มฆ้อง. วั้ว หฒั่น เฒี้ยว เญย ฟิน-เมี่ยน โซ้ว เจี๊ยน กะเฮลน.

6เฒี้ยว เญย ฟิน-เมี่ยน ฮนั้ง น้าย นอ ขวิน โยซูวา,

7“เน่น เจี๋ย เญย เฒี้ยว ฮนั้ง น้าย นอ ก๊อง, ‘สี ก๊อง เม่ย ยั่ง เยีย เญย เจ๊า หย่า เอย เจี๊ยน เยีย พ้าย เญย หว่า, เม่ย ฯฒฯ ตุ๊ กุ๊น เยีย เญย เปย๊า, โก๋ว เยีย เญย เปย๊า เญย หลาด กะญั์ว. เยีย ฯฒฯ ปุน เม่ย ตุ๊ เยียม โซ้ว เจี๊ยน น้าย เต๋ย เมี่ยน บุด๋ง.’

8“‘โอ โยซูวา ต้ม ไซ เมี่ยน อ้า! เม่ย เหธา เฒว์ย เจี๊ยน เม่ย เญย หฑะเฮมียน เญย ต่อย, เซ โหฒว จั๋ง-โห่ หลง เญย ไซ เมี่ยน, หมวัง ม่าะ! เยีย อ๋อย ต้อ เยีย เญย โปว, ต้ง ม่าย บั๋ว เห่ว ฆว่า วั้ว เต้า ต้าย.

9หมั่ง ม่าะ! เยีย เฒาะ นอม หละเปย๊ย อัน เจี๊ยน โยซูวา เญย หฑะเฮมียน. เยียม วั้ว นอม หละเปย๊ย ม่าย เสี่ย ปูง. เยีย หย่า อ๋อย ดี้ง จั๋ง-โห่ เยียม วั้ว นอม หละเปย๊ย. ดุ ฮนอย ฮนั้ง เยีย อ๋อย เฒาะ ฆอย น้าย นอม เต่ย-ปูง โหฒว ต่อง เญย ฒุ์ย.’ น้าย เซ เน่น เจี๋ย เญย เฒี้ยว ก๊อง เญย หว่า.

10“‘เถา วั้ว ฮนอย เก๊าะ-เมี่ยน อ๋อย เห่ว เก๊าะ-เมี่ยน เญย จวั่ง ล์าง เมี่ยน ต้าย เฒว์ย เจี๊ยน นิ่น เญย อะหงุ่น เฮมย เหธา ง่ง หญอ เดี๋ยง กะเดี๊ย.’” น้าย เซ เน่น เจี๋ย เญย เฒี้ยว ก๊อง เญย หว่า.

← Chapter 2 Jump to: Chapter 4 →