Zechariah 14

Mien Bible (Thai Script) © Thailand Bible Society, 2007

← Chapter 13 Jump to:

1หมั่ง ม่าะ! เฒี้ยว เญย ฮนอย เถา ฟัด อ๊ะ. เยลูซาเลม อ๋อย หฒุ ลู้. วั้ว เต๋ย ฒิ่น ฒ่อย ฯฒฯ เยียม เม่ย บัว เญย หฑะเฮมียน ปุน ฆอย.

2เหว่ย หฒุ เยีย อ๋อย เซียว ฒุ้น หม่าน กั๊วะ เหธา เยลูซาเลม เบ๊าะ จ๋า. วั้ว นอม ฒี่ง ฯฒฯ หฒุ เฒาะ หมี่ อ๊ะ. เปย๊า อ๋อย หฒุ ลู้, มเซียะ ตอน หฒุ ธา. ฒี่ง เญย เหยียด โก๊ว เมี่ยน อ๋อย หฒุ กว๊าด มี่ง, มป่า เหฒ่ง เหฌี่ย วั้ว เต๋ย ตุ๊ เยียม เจี๊ยน ฒี่ง.

3ฆะฮ้า เฒี้ยว ฯฒฯ ธ้วด มี่ง เหธา วั้ว เต๋ย กั๊วะ เบ๊าะ จ๋า ฮนั้ง ฒิ่น ด่าง เบ๊าะ วั้ว นอ.

4วั้ว ฮนอย นิ่น เญย เหฒา อ๋อย โซ้ว เจี๊ยน เยลูซาเลม เญย หฑะเฮมียน แหมง, ตง ปูง วั้ว, กะลั้น บง กู้ หงว่าย. กะลั้น บง ฯฒฯ เยียม ตง ปูง บ๋าย เถา ไฟ ปูง, เป๋น นอม ต้ม ฮ์อง. บง เญย เหยียด แหมง ซุ้ย มี่ง ป๊ะ ปูง, เหยียด แหมง ซุ้ย มี่ง น่าม ปูง.

5เม่ย บัว อ๋อย หฒุ ยั่ง เยีย เญย บง เญย ฮ์อง เปย๋า เหว่ย หฒุ อี ปูง บง เญย ฮ์อง ฑุ์ย มี่ง เถา อาเซน. เม่ย บัว อ๋อย หฒุ เปย๋า, ฮนั้ง ฒิ่น ด่าง เยียม ยูดา เญย ฮู่ง, อุดซียา, เญย ฮนอย-เหญียะ เมี่ยน เปย๋า เดา-ต์ง. วั้ว หฒั่น เฒี้ยว, เยีย เญย ทิน-ฮู่ง, อ๋อย เถา, หย่า ม่าย เหยียด ฒู้ง ธีง-เหฑ่ง เญย ฟิน-เมี่ยน เหธา เจี๊ยน นิ่น ต้าย.

6วั้ว ฮนอย, ไม้ ม่าย จวั๊ง, ไม้ ม่าย ซอง.

7ขูง ม่าย ลู่ง ฮนอย หฒั่น, ไม้ เฒ์ย ลู่ง ฮนอย ทิ้ว เป๋น ลู่ง ม์วน. ลู่ง ม์าน-หฮมวัง หธ่อ ฌัง เญย. วั้ว นอม ฮนอย หาย หฒั่น เถา, ขูง เฒี้ยว กั้น ฮิ้ว ฮนั้ง.

8วั้ว ฮนอย ม่าย ววม-ต้าย เยียม เยลูซาเลม เหลี่ยว ธ้วด. เหยียด ป่วน เหลี่ยว มี่ง ตง ปูง เญย ค้อย, เหยียด ป่วน เหลี่ยว มี่ง ไฟ ปูง เญย ค้อย. ตง เกว๋ย, ห่า เกว๋ย ววม เหลี่ยว ฟี่ ฮนั้ง เญย.

9เฒี้ยว ฯฒฯ ตุ๊ โหฒว ก๋อม ลู่ง เดี๊ย เญย ฮู่ง. วั้ว ฮนอย ขูง ม่าย นิ่น โหฒว ดุ เต้า เฒี้ยว หย่า ขูง ม่าย นิ่น กั้น เญย เม่ง ฮนั้ง.

10เฒี่ยง นอม เต่ย-ปูง เยียม ป๊ะ ปูง เกบา วั้ว เถา เยลูซาเลม เญย น่าม ปูง, ลิมโมน วั้ว, อ๋อย ทิ้ว เป๋น เดา-แป้ง ฮนั้ง อาลาบา. มป่า เยลูซาเลม หธ่อ อ๋อย เยียม ฮลัง, เยียม เบนยามิน แก้ง มี่ง เถา โล์-แก้ง เญย ต๋อง, เถา เก๊าะ แก้ง, หย่า เยียม ฮานันเอน เญย ล่าว เถา ฮู่ง เตี๋ย เญว่ย อะหงุ่น ติ๊ว เญย ฒ่อง.

11ฒี่ง กะญั์ว อ๋อย ม่าย เมี่ยน เยียม เหว่ย หฒุ เหยียด ลิ์ว ไม้ แอ๋ง หฒุ เหมียด, เยลูซาเลม ฯฒฯ แป้ง ออน เญย เยียม.

12น้าย เซ เฒี้ยว อ๋อย ปุน เหยียด ฒู้ง ต้าย เหธา เยลูซาเลม เบ๊าะ จ๋า วั้ว เต๋ย กั๊วะ เญย เมี่ยน หฒุ เธี้ยว เญย เหฒะ หน่าน. นิ่น บัว เญย เหฒา หธ่อ โซ้ว เจี๊ยน เญย เฒี่ยง โห่ นิ่น บัว เญย อ๊อ ฯฒฯ หยุ. มฒีง เยียม เจี๊ยน มฒีง-ค้ม ฮู้, เบียด เยียม ฑุ่ย กะญั์ว ฮู้.

13วั้ว ฮนอย เฒี้ยว อ๋อย ปุน นิ่น บัว ต้ม หลุ่น. เก๊าะ-เมี่ยน ฯฒฯ เญา เจี๊ยน เก๊าะ-เมี่ยน เญย ปั์ว, ล่าน หย่า เบ๊าะ ล่าน.

14เลี่ยม ยูดา อ๋อย เบ๊าะ เยลูซาเลม. เว่ย ก๋อม เญย หม่าน กั๊วะ เญย ฒิ่น ฒ่อย, เซ เจียม ญ่าน ธั้ม, ลุย-โหว หย่า ธั้ม, ฯฒฯ ตุ๊ เซียว ฒุ้น.

15ม์า เหธา มาลี, ล่อ ท่อ, ล่อ เหธา เหยียด ฒู้ง เยียม เธี้ยง เญย แซง-คู้ อ๋อย หฒุ หญู่ง เหฒะ หน่าน ฮนั้ง วั้ว หญู่ง เหฒะ หน่าน.

16ฆะฮ้า ต้าย เบ๊าะ เยลูซาเลม วั้ว เต๋ย เหยียด ฒู้ง กั๊วะ เหฒ่ง เหฌี่ย เญย เมี่ยน, หฮญังๆ อ๋อย ฝาว มี่ง ป๋าย ฮู่ง เตี๋ย, เซ เน่น เจี๋ย เญย เฒี้ยว, หย่า เจี๋ย บย๊อ ลิ่ว เญย ฒิบ.

17สี ก๊อง ลู่ง เดี๊ย หาย ฝีง เมี่ยน ไม้ ฝาว มี่ง เยลูซาเลม ป๋าย ฮู่ง เตี๋ย, เซ เน่น เจี๋ย เญย เฒี้ยว, ฒู้ง ไม้ ม่าย บยู่ง เหฌี่ย นิ่น บัว เญย เต่ย-ปูง.

18สี ก๊อง อียิบ เมี่ยน ไม้ มี่ง เหธา เจี๊ยน โหฒว, เฒี้ยว อ๋อย ปุน นิ่น บัว หฒุ เหฒะ หน่าน ฮนั้ง นิ่น ปุน ไม้ มี่ง เจี๋ย บย๊อ ลิ่ว ฒิบ วั้ว เต๋ย กั๊วะ เญย เมี่ยน เญย เหฒะ หน่าน.

19น้าย เซ อียิบ เหธา ไม้ มี่ง เจี๋ย บย๊อ ลิ่ว ฒิบ วั้ว เต๋ย กั๊วะ เญย เมี่ยน หฒุ ตี่ง เญย ฒุ์ย.

20วั้ว ฮนอย ม์า เญย ลี่ง ฯฒฯ ดี้ง เจี๊ยน หฑั่ง ก๊อง, “ธีง-เหฑ่ง เหว่ย เฒี้ยว. ” เยียม หฒั่ง เฒี้ยว เญย เปย๊า เญย แธง หย่า ธีง-เหฑ่ง ฮนั้ง เยียม เหฒี่ย-ต้อง หฑะเฮมียน แหมง เญย หฑ่อม.

21เยียม เยลูซาเลม เหธา ยูดา เญย นอมๆ แธง ฯฒฯ เหว่ย เน่น เจี๋ย เญย เฒี้ยว ธีง-เหฑ่ง. ตะฟ่าน ต้าย เหฒี่ย เญย เมี่ยน หย่า เฒาะ น้าย เต๋ย แธง โฒ้ว หล่ง เหฒี่ย เญย แซง-คู้ อ๊อ. วั้ว ฮนอย เน่น เจี๋ย เญย เฒี้ยว เญย เปย๊า ไม้ แอ๋ง ม่าย ม์าย หม่าย เญย เมี่ยน อ๊ะ.

← Chapter 13 Jump to: