Hosea 10

Институт перевода Библии, 2022

← Chapter 9 Jump to: Chapter 11 →

1Izrail jayılıp ósken júzim aǵashına megzeydi, Mol miywesin berdi, Biraq miywesi kóbeygen sayın, Butqa arnap kóp qurbanlıq orın qurdı. Eli gúllep jasnaǵan sayın, kiyeli taslardı bezedi.

2Kewilleri ekige bólingen bul xalıq endi ayıbı ushın jazasın aladı, Jaratqan Iye butqa arnalǵan qurbanlıq orınların qulatadı, Kiyeli tasların sındırıp taslaydı.

3Sonnan soń olar bılay deydi: «Bizlerdiń patshamız joq, Óytkeni Jaratqan Iyeden qorqpadıq. Patshamız bolǵanı menen, Ne keler edi onıń qolınan?»

4Olar aytıp atır mánissiz sózlerdi, Jalǵan ant iship, kelisim dúzip atır. Sonıń ushın, atızdıń qarıqlarındaǵı záhárli shóp sıyaqlı, Ádilsizlik kóbeyip barmaqta.

5Samariyada jasaytuǵınlar, Beyt-Awendegi qashar butınan qáweter alar, Xalqı onıń ushın jas tóger. Buttıń ruwxaniyleri de dad salar, Sebebi buttıń saltanatı alıp taslanadı.

6But sıy retinde ullı patshaǵa, Assiriyaǵa alıp ketiledi, Efrayım shermende boladı, Izrail óz jobası sebepli uyatqa qaladı.

7Suwdaǵı ıǵıp ketken tayaq sıyaqlı, Samariya patshası joq bolıp ketedi.

8Izraildıń gúnasına sebep bolǵan, Awendegi sıyınıw orınları joq qılınadı. Qurbanlıq orınlardı jantaq hám sheńgeller basadı. Sonda adamlar tawlarǵa: «Bizlerdi jerleń!» Tóbeshiklerge: «Ústimizge qulań!» dep jalınadı.

9Jaratqan Iye bılay deydi: «Háy, Izrail, sen Gibada bolǵan kúnnen baslap gúna islediń, Sol jerde ózgermesten qaldıń. Gibadaǵı jınayatshılarǵa qarsı sawash bolmadı ma?

10Men qálegen waqtımda jazańdı beremen, Saǵan qarsı xalıqlardı birlestiremen. Eki jınayatıń ushın, Dushpanlar saǵan kisen saladı.

11Efrayım túyek aydawdı jaqsı kóretuǵın, Úyretilgen qasharǵa uqsaydı. Biraq moyıntırıq taǵaman, Efrayımnıń sulıw moynına. Efrayımdı ertleymen, Yahudaǵa qos aydataman, Yaqıpqa mala bastıraman.

12Háy, Izrail, ózińiz ushın ádillik egiń, Súyispenshilik jemisin orıp alıń. Ózlerińiz ushın súrilmegen jerińizdi súriń, Sebebi Jaratqan Iyeniń aldına keletuǵın waqtıńız boldı, Ol kelgen waqıtta, Ústińizge ádalatlıqtı jawınday jawdırsın.

13Biraq sizler jawızlıq egip, Ádilsizlikti orıp aldıńız, Jalǵannıń miywesinen jedińiz, Óytkeni tutqan óz jolıńızǵa súyenip, Batır jawıngerlerińizge isendińiz.

14Sonıń ushın, xalqıńızdıń basına sawash apatı dónip tur, Shalmannıń sawash kúninde Beyt-Arbeldi qulatqanınday, Hayallardı balaları menen birge jerge urıp óltirgenindey, Qulaydı seniń barlıq qorǵanlarıń.

15Háy Beyt-El, jawızlıqlarıńnıń kópligi ushın, Usı kúnler basıńa túsedi. Tań atqanda, Izrail patshası nabıt boladı».

← Chapter 9 Jump to: Chapter 11 →