Hosea 14

Институт перевода Библии, 2022

← Chapter 13 Jump to:

1Samariya óz Qudayına qarsı bas kóterdi, Endi olar gúnasınıń jazasın tartıp, qılıshtan óledi. Dushpanlar jerge urıp óltiredi bópelerin, Júkli hayallarınıń qarınların jaradı.

2Qudayıń Jaratqan Iyege qayt, háy Izrail, Óytkeni gúnań sebepli quladıń.

3Táwbe etip, Jaratqan Iyege qayt, Oǵan ayt: «Barlıq gúnalarımızdı keshir, Duwamızdı qabıl et. Buǵalardı qurbanlıq qılǵanday, Saǵan alǵıs-maqtaw usınamız.

4Assiriya bizlerdi qutqara almaydı, Minbeymiz sawash atlarına. Endi qoldan soǵılǵan butlardı „qudayımız“, demeymiz. Sebebi jetim Sennen rehim tabadı».

5Jaratqan Iye bılay deydi: «Shıpa berip xalqıma, opasızlıqtan qaytaraman, Súyemen shın kewilden olardı. Sebebi olarǵa degen ǵázebim qayttı.

6Shıq sıyaqlı bolaman Izrailǵa, Sonda Izrail lala gúldey ashıladı, Lebanon kedri sıyaqlı tamır jayadı.

7Olardıń shaqaları jayılıp, Záytún aǵashınday kórkem boladı. Lebanondaǵı kedr aǵashınday xosh iyis taratadı.

8Olardıń sayasında jáne xalıqlar jasaydı, Olar mol biyday jetistirip, júzimdey gúlleydi. Lebanon sharabınday belgili boladı.

9Efrayım bılay desin: „Butlar maǵan kerek emes! Qudaydıń dawısına qulaq salaman, Názerimdi Oǵan qarataman, Men jasıl sárwi aǵashınday bolaman“. Men sen alǵan mol zúráátińniń bulaǵıman».

10Kim dana bolsa, usı jazılǵan sózlerdi túsinedi, Kim aqıl-parasatlı bolsa, bulardıń barlıǵın ańlaydı. Jaratqan Iyeniń jolları tuwrı, Bul joldan júredi haq adamlar, Biraq gúnakarlar bul jollarda súrnigip jıǵıladı.

← Chapter 13 Jump to: