Hosea 6

Институт перевода Библии, 2022

← Chapter 5 Jump to: Chapter 7 →

1Bul xalıq bılay deydi: «Kelińler, Jaratqan Iyege qaytayıq! Ol bizlerdi tilkimlep, maydalap tasladı, Shıpanı da Ózi beredi. Bizlerdi jaradar qıldı, Jaralarımızdı Ózi tańadı.

2Eki kúnde bizlerdi ómirge qaytaradı, Úshinshi kúni ayaqqa turǵızadı, Onıń dárgayında jasaymız.

3Kelińler, Jaratqan Iyeni biliwge umtılayıq, Onı biliwge ǵayrat salayıq. Ol tań atıwınday sózsiz keledi, Jerdi suwǵaratuǵın jawın sıyaqlı, Awa, báhár jawınınday bizlerge keledi».

4Quday bılay deydi: «Saǵan ne qılayın, háy Efrayım? Saǵan ne qılayın, háy Yahuda? Súyispenshiligińiz tańdaǵı dumanday tez joq boladı, Erte azanǵı shıq sıyaqlı parlanıp ketedi.

5Sonıń ushın, sizlerdi payǵambarlarım arqalı shawıp tasladım, Awzımnan shıqqan sózlerim menen óltirdim, Tań nurınıń shıǵatuǵınınday, Shıǵarǵan húkimim sózsiz júzege asadı.

6Óytkeni Men qurbanlıq emes, Miyrim-shápáát qáleymen, Jandırılatuǵın qurbanlıqlardı emes, Meni, Qudaydı tanıp, biliwińizdi qáleymen.

7Xalqım Adam-ata sıyaqlı kelisimdi buzdı, Awa, ol jerde Maǵan opasızlıq qıldı.

8Gilad – jawızlardıń qalası, Kósheleri qan izlerine tolı.

9Qaraqshılar buqqıda jatıp, qurbanın ańlıydı, Ruwxaniyler toparı da olarǵa uqsaydı. Shexem qalasına baratuǵın jolda adam óltiredi, Awa, olar jerkenishli jınayatqa qol uradı.

10Men Izrailda qorqınıshlı hádiyseni kórdim: Efrayım buzıqshılıq qıldı, Izrail ózin haramladı.

11Men xalqımdı jáne abadanshılıqqa eristirmekshi bolǵanımda, Háy, Yahuda, seniń de jaza kúniń belgilendi.

← Chapter 5 Jump to: Chapter 7 →