Song of Solomon 1

Институт перевода Библии, 2022

Jump to: Chapter 2 →

1Sulaymannıń eń jaqsı qosıǵı. Súy meni, erinleriń menen súy! Muhabbatıń sharaptan da tatlı!

2Átir mayıń qanday xosh iyisli! Atıń da tógilgen átir kibi, Sonıń ushın qızlar súyedi seni!

3Meni óziń menen alıp ket, asıǵayıq, Shahzadam meni otawına aparsın! Seniń menen quwanıp, shadlanamız, Muhabbatıńdı sharaptan da zıyada dep táriyipleymiz. Minásipseń sen qızlardıń muhabbatına.

4Erusalim qızları, Men qara torıdan kelgen sulıwman. Kedar shatırlarınday qaraman, Sulaymannıń perdelerindey gózzalman.

5Qara torı bolǵanıma qaramań, Quyash qarayttı meni. Aǵa-inilerim maǵan ashıwlanıp, Meni júzimzarǵa qarawıl qılıp qoydı. Ózimniń júzimzarıma qaray almadım.

6Súyiklim, aytshı, súriwińdi qay jerde baǵasań? Túste onı qay jerde tınıqtırasań? Nege seniń doslarıńnıń súriwleri arasınan, Betine perde jamılǵan buzıqlarday, Seni izlep, sergizdan bolıwım kerek?

7Háy, gózzallar gózzalı! Bilmeseń, súriwlerdiń izi menen júr, Shopanlardıń shatırlarınıń janında, Ílaqlarıńdı baq.

8Faraonnıń arbasına jegilgen, Baytalǵa megzetemen seni, súyiklim!

9Taǵınshaqlar bet álpetińe, Monshaqlar moynıńa qanday jarasqan!

10Saǵan gúmis penen áshekóylengen, Altın taǵınshaq soǵıp beremiz.

11Shahzadam óz dasturxanı átirapında otırǵanda, Nard átirim xosh iyisin tarattı.

12Súyiklim men ushın, Kókireklerim ortasında jatırǵan, Mirra tolı qaltashaǵa megzeydi.

13Súyiklim men ushın, En-Gediydegi júzim baǵındaǵı, Qına gúliniń dástesine megzeydi.

14Qanday gózzalsań, súyiklim! Gózzalsań, qumırı kózlim.

15Qanday sımbatlısań, súyiklim! Júdá súykimliseń! Jataǵımız jasıl maysazar.

16Kedrler úyimizdiń tóbesi bolsa, Sárwi aǵashları shertegimiz.

Jump to: Chapter 2 →