Song of Solomon 4

Институт перевода Библии, 2022

← Chapter 3 Jump to: Chapter 5 →

1Qanday gózzalsań, súyiklim, gózzalsań! Júzińdegi perde astındaǵı kózleriń, Qumırınıń kózlerine megzeydi. Shashlarıń Gilad tawlarınan túsip kiyatırǵan, Qara eshkiler súriwindey tawlanıp turadı.

2Qırqıp, shomıldırıp shıǵarılǵan, Qoy súriwindey appaq seniń tisleriń. Hár biriniń sıńarı bar, Hesh biri jalǵız emes.

3Qırmızı sabaqtay erinleriń, Awzıń sonday ájayıp. Japqısh astındaǵı júzińniń alması, Anardıń yarımınday qıp-qızıl.

4Moynıń tik qurılǵan, Dawıttıń minarasına megzeydi, Oǵan mıń qalqan asılǵan, Hámmesi batırlar qalqanı.

5Lalazarda otlap júrgen qos suwınǵa, Egiz jeyranǵa uqsaydı qos anarıń.

6Kesh túsip, kóleńke uzayǵansha, Mirra tawına, Xosh iyisli shayırlar bar tóbege baraman.

7Súyiklim, sen sonday gózzalsań, Hesh jerińde miniń joq!

8Lebanonnan meniń menen birge kel, kelinshegim, Lebanonnan meniń menen birge kel! Amana tóbesinen, Senir, yaǵnıy Xermon tóbesinen, Arıslanlar inlerinen, Qaplanlar mákanlaǵan tawlardan asıp kel.

9Ázizim, kelinshegim, júregimdi biylep aldıń, Janarıńnıń bir qarawı, Monshaǵıńnıń bir danası menen, Júregimdi biylep aldıń.

10Muhabbatıń qanday tatlı, ázizim, kelinshegim! Muhabbatıń sharaptan, Átirińniń xosh iyisi, Barlıq xosh iyisli zatlardan lázzetli!

11Láblerińnen pal tamadı, kelinshegim, Pal menen sút bar tiliń astında. Kiyimlerińniń jaǵımlı iyisi, Lebanonnıń xosh iyisindey.

12Ázizim, kelinshegim, sen bir qapısı jabıq baǵ, Awzı jabıq qudıq, mór basılǵan bulaqsań.

13Sen – jaqsı miywe beretuǵın, Anar baǵısań. Bul baǵda qına hám nard bar.

14Awa, bul baǵda nard hám shafran, Xosh iyisli qamıs hám korica, Hár túrli xosh iyisli terekler, Mirra hám aloe, Álwan túrli, eń jaqsı xosh iyisli ósimlikler ósedi.

15Sen baǵ bulaǵısań, Taza suw qudıǵı, Lebanon tawlarınıń aǵar suwısań.

16Oyan, háy, arqa samalı! Kel, qubla samalı! Baǵımda esip, onıń xosh iyisin tarat! Súyiklim óz baǵına kelip, Onıń saylandı miywelerinen jesin.

← Chapter 3 Jump to: Chapter 5 →