Song of Solomon 7

Институт перевода Библии, 2022

← Chapter 6 Jump to: Chapter 8 →

1Qayt, shulamlı qız, izge qayt! Seni bir kóreyik, izge qayt! Qız-jigitler arasında ayaq oyınǵa túsip atırǵanday, Ne ushın meni kórejaqsız?

2Qanday sulıw sandal kiygen ayaqlarıń, Háy, hasılzadanıń qızı! Domalaq bókseleriń zergerdiń, Qolınan shıqqan gáwhar mısalı.

3Kindigiń bárqulla xosh dámli sharapqa tolı, Domalaq kese mısalı. Beliń lalalar menen oralǵan, Biyday úyindisi mısalı.

4Qos anarıń qos suwın, Egiz jeyran mısalı.

5Moynıń pil súyeginen qurılǵan minaraday, Kózleriń Bat-Rabbim dárwazası janındaǵı, Xeshbon háwizlerindey. Murnıń Damaskke qarap turǵan, Lebanon minarasınday.

6Basıń Karmel tawınday tik bolıp, Ilpildegen shashlarıń shım qızıl, Patsha shashlarıńa tutqın boldı.

7Qanday sulıwsań, qanshelli súykimliseń, Íshqım ketken súykimli jamalıńa!

8Turpatıń palma aǵashına, Qos anarıń onıń solqım-solqım jemisine megzeydi.

9Men: «Bul palmaǵa órmeleyin, Uslayın miyweli shaqaların», – dedim. Anarlarıń júzim solqımlarınday, Demiń almanıń iyisindey jupar,

10Erinleriń eń jaqsı sharapqa uqsar. Bul sharap súyiklime, Onıń uyıqlap atırǵan erinlerine qaray aqsın.

11Men súyiklimdikimen, Ol da meni qumsaydı.

12Júr súyiklim, atızǵa barayıq, Túndi qına gúlleri arasında ótkereyik.

13Erte turıp, júzimzarǵa barayıq, Kóreyik, júzim putaları búrshik jardı ma, Olardıń gúlleri ashıldı ma, Anar aǵashları da gúlledi me? Sol jerde ıshqımdı saǵan baǵıshlayman.

14Márgiya shóp xosh iyisin ańqıtpaqta, Esigimiz aldında, Álwan túrli jaqsı miyweler bar. Jańasın da, eskisin de, Sen ushın saqladım, súyiklim!

← Chapter 6 Jump to: Chapter 8 →