Song of Solomon 6

Институт перевода Библии, 2022

← Chapter 5 Jump to: Chapter 7 →

1Súyikliń qayda ketti, Háy, gózzallar gózzalı? Ol qay tárepke ketti? Onı seniń menen birge izleyik.

2Súyiklim óz baǵına, Jupar iyisli gúl baǵına, Baǵda súriwin baǵıwǵa, Lala gúller teriwge ketti.

3Men súyiklimdiki, súyiklim meniki. Súriwin lala gúller arasında baǵadı ol.

4Súyiklim, sen Tirsa qalasınday gózzalsań, Erusalimdey súykimliseń, Bayraq kótergen láshkerlerdey aybatlısań.

5Kózlerińdi alıp qash mennen, Olar meni bende qılmaqta. Shashlarıń Gilad tawlarınan túsip kiyatırǵan, Qara eshkiler súriwine uqsaydı.

6Qırqıp, shomıldırıp shıǵarılǵan, Qoy súriwindey appaq seniń tisleriń. Hár biriniń sıńarı bar, Hesh biri jalǵız emes.

7Japqısh astındaǵı júzińniń alması, Anardıń yarımınday qıp-qızıl.

8Patshanıń alpıs hayalı, seksen toqalı, Sansız jas qızları bar.

9Biraq meniń qumırım, minsiz sulıwım – teńsiz. Ol anasınıń jalǵızı, Onı tuwǵannıń erkesi. Qızlar onı kórip, baxıtlı deydi, Hayallar hám toqallar onı maqtaydı.

10Tańday atqan, Ayday sulıw, kúndey jarqıraǵan, Bayraq kótergen láshkerlerdey aybatlı, Kim eken bul?

11Oypatlıqtaǵı kóklemzardı kóriw ushın, Hám de júzim putaları búrtik jardı ma, Anar aǵashları gúlledi me dep, Usılardı kóriw ushın, men ǵoza toǵayına bardım.

12Bilmedim, qálbim meni biylep alıp, Xalqımnıń aqsúyekleriniń arbasına mindirdi.

← Chapter 5 Jump to: Chapter 7 →