Song of Solomon 8

Институт перевода Библии, 2022

← Chapter 7 Jump to:

1Qánekey, tuwısqanımday bolsań edi, Anamnıń emshegin birge emgen! Kóshede kórgenimde, súyer edim, Hesh kim meni ayıplamas edi.

2Aldıńa túsip, Turmısqa tayarlaǵan, Anamnıń úyine alıp keler edim. Xosh iyisli sharaptan, Anarlarımnıń suwınan ishkizer edim saǵan.

3Seniń shep qolıń basım astında, Oń qolıń menen meni aymalaydı.

4Erusalim qızları, sizlerge jalbarınaman: Muhabbattıń ózi oyanbaǵansha, Íshqını oyatpań hám qozǵamań.

5Súyiklisine súyenip, Shólden shıǵıp kiyatırǵan kim eken? Alma aǵashınıń astında, Anań saǵan hámiledar bolǵan jerde, Ol tolǵatıp, seni tuwǵan jerde, Men seni oyatıp aldım.

6Sal meni júregińe mórdey qılıp, Qolıńa mórli júziktey qılıp. Óytkeni muhabbat ólimdey qúdiretli, Qumarlıq ájeldey kúshli. Íshqınıń otı otlı jalınday janar, Lawlap janǵan jalın kibi.

7Suwlar da muhabbattı óshire almas, Dáryalar da onı aǵızıp kete almas. Eger adam muhabbat ushın barı-joǵın berse de, Ol jek kórinishli bolıp, mazaq qılınar edi.

8Bizlerdiń kishkene qarındasımız bar, Onıń ele kókiregi de shıqpaǵan. Onı ayttırıp kelgen kúni, Qarındasımız ushın ne qıla alamız?

9Eger ol diywal bolsa, Ústine gúmis minara qurar edik, Eger ol qapı bolsa, Onı kedr taxtalar menen jawıp taslar edik.

10Men ózim diywalman, Qos anarım minara mısalı, Sol sebepli onıń kózine, Baxıtlı kórindim.

11Sulaymannıń Baal-Hamonda, Júzim baǵı bar eken, Ol baǵdı saqshılarǵa tapsırıptı. Hár biri onıń jemisi ushın, Mıń shekel gúmis tólewi kerek eken.

12Mıń gúmis teńge seniki bolsın, háy, Sulayman, Eki júzi jemisin qorıǵandiki bolsın. Al meniń júzimzarım ózimdiki, ózime tiyisli.

13Háy, baǵlarǵa mákan basqan! Joldaslarım dawısıńdı esitip tur, Dawısıńdı tek men esitetuǵın bolayın.

14Asıq súyiklim! Jupar iyisi ańqıǵan tawlardaǵı, Jeyranday yamasa jas suwınday shapqıla.

← Chapter 7 Jump to: