Song of Solomon 2

Институт перевода Библии, 2022

← Chapter 1 Jump to: Chapter 3 →

1Men Sharon nargizimen, Oypatlıqlar lalasıman.

2Qızlar arasında meniń súyiklim, Tikenler arasındaǵı lalaǵa megzer.

3Jigitler arasında meniń súyiklim, Toǵay aǵashları arasındaǵı alma aǵashına megzer. Sayasında otırıw maǵan ráhát baǵıshlar, Miywesiniń dámi awzımnan ketpes.

4Ol meni zıyapat úyine alıp keldi, Meni muhabbatı menen qapladı.

5Kishmishler menen meni kúshke toltır, Almalar menen janlandır. Sebebi ıshqı dártinde janbaqtaman.

6Onıń shep qolı basım astında, Oń qolı menen meni aymalaydı.

7Erusalim qızları! Jeyran hám jabayı suwınlar haqı jalbarınaman: Muhabbattıń ózi oyanbaǵansha, Íshqını oyatpań hám qozǵamań.

8Mınaw súyiklimniń dawısı! Ol tawlardan sekirip, Tóbeshiklerden atlap kiyatır.

9Súyiklim jeyranǵa yamasa jas suwınǵa megzer. Mine, ol diywalımız artında turıp, Terezelerden úńilip, Áynektiń kózlerinen sıǵalar.

10Súyiklim maǵan bılay dedi: «Tur, súyiklim, gózzalım, Júr, birge keteyik!

11Qara, qıs ta ótti, Jawın da tındı.

12Jerde gúller ashılıp, Qosıq aytatuǵın waqıt keldi. Úlkemizde qumırınıń, Hawazı esitilip tur.

13Ánjir ǵumsha shıǵardı. Júzim shaqaları gúllep, Xosh iyisin shashıp tur. Tur, súyiklim, gózzalım, Júr, birge keteyik!»

14Jartastıń jarıǵına, Tawlardıń shıńlarına jasırınǵan qumırım! Jamalıńdı kórset, dawısıńdı esiteyin. Dawısıń jaǵımlı, jamalıń gózzal.

15Bizge túlkilerdi, Júzimzarlardı wayran etip atırǵan, Túlkisheklerdi uslap beriń. Júzim baǵlarımız gúl ashpaqta.

16Súyiklim meniki, men de onıkimen. Súriwin lala gúller arasında baǵadı ol.

17Kesh túsip, kóleńke uzayǵansha, Qaytıp kel, súyiklim, Sánli tawlardaǵı jeyranday, Yamasa jas suwınday shapqıla!

← Chapter 1 Jump to: Chapter 3 →