1 Timothy 1

Kamba (Mbivilia) 1956

Jump to: Chapter 2 →

1Vaulo, mũtũmwa wa Klĩsto Yesũ kwĩanana na mwĩao wa Ngai Mũtangĩĩi waitũ, na Klĩsto Yesũ wĩkwatyo witũ;

2valũa ũũ wakwa ũmũvikĩe Timotheo, mwana wakwa wa w’o nthĩnĩ wa mũĩkĩĩo: Mũmo, na tei, na mũuo, kuma kwa Ngai Asa na Klĩsto Yesũ Mwĩaĩi waitũ.

3O tondũ nakwĩsũvie wĩkale Eveso, yĩla naendete Masetonia, nĩ kana ũtonye kwĩaĩa andũ amwe maikamanyĩsye ũmanyĩsyo wa mũthemba ũngĩ,

4o na maikethukĩĩsye mbano na ũsyaanĩo ũte na mũminũkĩlyo, namo maetae mokũlangyo, na ti walan’yo wa Ngai ũla wĩ kwondũ wa mũĩkĩĩo; na yu nĩkwĩaĩa o ũũ.

5Ĩndĩ mũminũkĩlyo wa wĩaĩi ũsu nĩ wendo ũla wumaa ngoonĩ ntheu na wasyanĩ mũseo wa ngoo na mũĩkĩĩo ũte na wangangan’yo:

6na amwe makĩvĩtya maũndũnĩ asu nĩmathũkĩte ũtee kũvika kũneena mana;

7makyenda kwĩthĩwa amanyĩsya ma ĩla mĩao, o na kau maiũmanya maũndũ asu ala maneenaa, o na kĩtina kya maũndũ ala maneenaa ta mamesĩ vyũ.

8Ĩndĩ ithyĩ nĩtwĩsĩ kana ĩla mĩao nĩ mĩseo, ethĩwa mũndũ ekaa nayo ũndũ ũmyaĩle.

9Akĩmanya ũũ, kana ĩla mĩao ti kwondũ wa mũndũ mũlũngalu, ĩndĩ nĩ kwondũ wa ala maleaa mĩao na ala ang’endu, nũndũ wa ala mateũmũkĩa Ngai na ala athe, nũndũ wa ala mate atheu na ala avuku, nũndũ wa ala moaa aaĩthe na ala moaa aainyia, na nũndũ wa oai,

10nũndũ wa ilaalai, na aũme ala mekaa naĩ na aũme angĩ, nũndũ wa ala moyaa andũ, nũndũ wa aneeni ma ũvũngũ, nũndũ wa ala mevĩtaa ũvũngũ, na ethĩwa ve ũndũ ũngĩ ũtosana na momanyĩsyo ala ma w’o;

11kwĩanana na ũvoo mũseo wa ũtheu mũtisu wa Ngai ũla mũtaĩwa, ũvoo ũla naĩkĩĩiwe nĩsũvĩe.

12Nĩmũtũngĩa mũvea ũla wandonyethisye, nake nĩ Klĩsto Yesũ Mwĩaĩi waitũ, nũndũ nĩwandalile kwĩthĩwa na kĩthito akĩndw’a wa kũmũthũkũma;

13o na kau na vu tene naĩ mũumi wa Ngai, na mũthĩn’ya wa andũ, na kũmeka naĩ: ĩndĩ nĩneew’ĩwe tei, nũndũ nĩneekie ndesĩ ndanamba kwĩtĩkĩla;

14na mumo wa Mwĩaĩi waitũ waingĩvie mũno vamwe na mũĩkĩĩo na wendo ũla wĩ nthĩnĩ wa Klĩsto Yesũ.

15Nĩ ndeto ya kũĩkĩĩwa, na nĩyaĩlwe nĩ kwĩtĩkĩlwa nĩ andũ onthe, kana Klĩsto Yesũ ookie kũũ nthĩ kũmatangĩĩa andũ athe; na ũla wa mbee woo, ninyie:

16ĩndĩ kwondũ wa ũu nĩneew’ĩwe tei, kana nthĩnĩ wakwa, nyie ũla mũthũku mbee, Yesũ Klĩsto atonye kumĩlya wũmĩĩsyo wake w’onthe, kwondũ wa ngelekan’yo kwa ala makamwĩtĩkĩla ĩtina methĩwe na thayũ ũtathela.

17Na yu kwa Mũsumbĩ wa tene na tene, ũla ũtanangĩkaa, na ũtonekaa, Ngai ũla wĩ weka, kwĩthĩwe nguma na ndaĩa tene na tene. Ameni.

18Wĩaĩi ũũ nĩngũtia naku, mwana wakwa Timotheo, kwianana na ndeto sya athani ila syatongoisye mbee waku, nĩ kana kwondũ wasyo ũtonye kũkita kaũ ũla mũseo;

19ũikwata mũĩkĩĩo na wasya mũseo wa ngoo; ũla amwe maluutĩte kũasa namo na makaa mũĩkĩĩonĩ woo, tondũ andũ maaa ngalawa yaanangĩka:

20amwe ma asu nĩ Aimenaio na Alesanda; nao namũnengie Satani, nĩ kana mamanyĩw’e maikamũume Ngai.

Jump to: Chapter 2 →