1 Timothy 4

Kamba (Mbivilia) 1956

← Chapter 3 Jump to: Chapter 5 →

1Ĩndĩ Veva eneena vyũ, kana mavinda ma mũminũkĩlyo amwe makatia ũla mũikĩio, makĩthukĩĩsya maveva ala makenganaa, na momanyĩsyo ma ndaimoni.

2Nũndũ wa wangangan’yo wa andũ ala maneenaa movũngũ, wasya woo wa ngoo ene ũkyowa ta kwowa na kyoo kyauma mwakinĩ;

3maivata andũ kũtwaana, na kũmeaĩa mevathane na lĩu, ũla Ngai wombie wosawe na mũvea nĩ ala metĩkĩlaa na mesĩ ũla w’o.

4Nũndũ kĩla kyũmbe kya Ngai nĩ kĩseo, na vai kya ũlewa, kethĩwa kĩkooswa na mũvea:

5nũndũ nĩ kĩvathan’ye kĩthĩwe kĩtheu kwondũ wa ndeto ya Ngai na kũvoya.

6Ethĩwa ũkamalilikan’ya ana‐a‐asa maũndũ asu, ũkeethĩwa wĩ mũthũkũmi mũseo wa Klĩsto Yesũ, wĩkĩĩtwe vinya ndetonĩ sya ũla mũĩkĩĩo, na momanyĩsyonĩ maseo ala ũatĩĩaa:

7ĩndĩ lea mbano mbuku na sya iveti ngũũ. Ĩthangaasye mwene kũmũkĩa Ngai:

8nũndũ kwĩthangaasya kwa mwĩĩ kwaĩlaa vanini; ĩndĩ kũmũkĩa Ngai kwaĩlaa maũndũnĩ onthe, kwĩ na watho wa thayũ wa ĩvinda yĩĩ, na wa ũla ũkoka.

9Ndeto nĩ ya kũĩkĩĩwa, na nĩyaĩle kwĩtĩkĩlwa.

10Kwondũ wa ũu nĩtũũtethya wĩa na kwĩthing’ĩĩsya, nĩkwĩthĩwa twiĩte wĩkwatyo wĩtũ kwa Ngai ũla wĩ thayũ, nake nĩ Mũtangĩĩi wa andũ onthe, na mbee mũno wa ala metĩkĩlaa.

11Maũndũ aa meaĩe na mamanyĩsye.

12Mũndũ o na wĩva ndakavũthye wana waku; ĩndĩ ĩthĩwa wĩ ngelekan’yo kwa ala metĩkĩlaa, nthĩnĩ wa ndeto, na mwĩkalĩle wa thayũ, na wendo, na mũĩkĩĩo, na ũtheu.

13Ĩthĩwa wĩ mũthangaau kũsoma, kũtaa, na kũmanyĩsya, mũvaka nooka.

14Ndũkethĩwe ũteũsũvĩa mũthĩnzĩo ũla wĩ nthĩnĩ waku, ũla wanengiwe kwondũ wa wathani, vamwe na kwilĩĩlwa moko ma atumĩa.

15Ĩthĩwa na ũthangaau maũndũnĩ aa; ĩnengane kwamo vyũ; nĩ kana kũendeea na mbee kwaku kwĩthĩwe kwĩ kwoneku kwa onthe.

16Ĩsũvĩe mwene, vamwe na momanyĩsyo maku. Ĩkalaa maũndũnĩ asu; nũndũ kwa kwĩka ũu ũkeetangĩĩa mwene na asu nao ala makakwĩw’aa.

← Chapter 3 Jump to: Chapter 5 →