1 Timothy 3

Kamba (Mbivilia) 1956

← Chapter 2 Jump to: Chapter 4 →

1Ndeto nĩ ya kwĩtĩkĩlwa, Ethĩwa mũndũ eenda wĩa wa mũsyaĩĩsya wa ĩkanisa, eenda wĩa mũseo.

2Mũsyaĩĩsya ĩndĩ mũvaka ethĩwe ataweteka ũthũku, mũũme wa kĩveti o kĩmwe, mwĩting’u, wĩ na kĩlĩko, mwaĩlu, mũthokya wa aeni, wĩ na ũtonyi wa kũmanyĩsya;

3ndakethiwe mũnywi wa ũkĩ, kana mũkũni wa andũ; ĩndĩ ethĩwe e mũuu, ti mũndũ wa kũtetan’ya, na ti mwendi wa mbesa;

4mũndũ ũla ũũngamĩaa nyũmba yake nesa, mũndũ wĩ na syana syĩ na winyivyo vamwe na kĩkĩo kyonthe;

5(ĩndĩ ethĩwa mũndũ ndesĩ kũũngamĩa nyũmba yake, akasũvĩa ata ĩkanisa ya Ngai?)

6Ti mũndũ ũla wĩtĩkĩlĩte mĩtũkĩ, nĩkwĩthiwa eekathĩĩa akavalũka ũsilĩlonĩ wa Satani.

7Na ĩngĩ mũvaka ala me ũtee methĩwe na ũkũsĩ kana nĩ mũseo; ndakavalũke na kũwetwa ũthũku na kũlika mũkwanĩ wa Satani.

8No ta ũu athũkũmi mũvaka methĩwe andũ me kĩkĩo, ti andũ me na nĩmĩ ilĩ, ti anywi ma mbinyu mbingĩ, ti mwendi wa kũunwa nĩ syĩndũ itamwaĩle;

9nĩmethĩwe makĩkwata nzama ya ũla mũĩkĩĩo na wasya mũtheu wa ngoo.

10Na asu nao mambe kũow’a; na ĩtina nĩmathũkũme, ethĩwa matiũweteka ũthũku.

11Aka nao, no ta ũu, methĩwe na kĩkĩo, na ti ailĩanĩli, ĩndĩ eting’u, ala me na kĩthito maũndũnĩ onthe.

12Athũkũmi methĩwe kĩla ũmwe mũũme wa kĩveti o kĩmwe, maiũngamĩa syana syoo na nyũmba syoo nesa.

13Nũndũ ala mathũkũmĩte nesa, wĩa wa ũtumĩa wa ĩkanisa, meyoneaa nguma nzeo, na ũkũmbaũ mũnene mũĩkĩĩonĩ ũla wĩ nthĩnĩ wa Klĩsto Yesũ.

14Nakũandĩkĩa maũndũ aa, ngĩkwatya kũka kwaku mĩtũkĩ;

15ĩndĩ ethĩwa nĩĩkala mũno, naandĩka nĩ kana ũmanye ũndũ andũ maĩle kwĩyĩkalya nyũmbanĩ ya Ngai, nayo nĩ ĩkanisa ya Ngai ũla wĩ thayũ, kĩtuĩ na wambĩlĩlyo wa ũla w’o.

16Na vate ngananĩo nzama ya kũmũkĩa Ngai nĩ nene; We ũla wonaniw’e e na mwĩĩ, Atalĩlwa ũlũngalu vevanĩ, Ooneka nĩ alaĩka, Atavanw’a kwa Andũ‐ma‐mbaĩ‐ingĩ, Eetĩkĩlwa kũũ nthĩ Atwawa ĩũlũ ũtheunĩ mũtisu.

← Chapter 2 Jump to: Chapter 4 →