1 Timothy 6

Kamba (Mbivilia) 1956

← Chapter 5 Jump to:

1Ngombo o na syĩva ila syĩ ĩsokinĩ nitale mavwana masyo nĩmaĩle ndaĩa yonthe, nĩ kana syĩtwa ya Ngai na ũla ũmanyĩsyo maikaumwe.

2Na ala me na mavwana metĩkĩlĩte, maikamavũthye, nũndũ nĩ ana‐a‐ĩthe; ĩndĩ kavaa mamathũkũme, nũndũ ala monaa ũtethyo wa wĩa woo nĩ etĩkĩli na endwa. Maũndũ aa manyĩsya, noitaa.

3Ethĩwa mũndũ o na wĩva amanyĩasya ũmanyĩsyo ũngĩ, na ndeũsyĩtĩkĩla ndeto syĩ na waĩlo, nasyo nĩ ndeto sya Mwĩaĩi waitũ Yesũ Klĩsto, na ũmanyĩsyo wĩanene na kũmũkĩa Ngai;

4e na ngathĩĩo, na nde ũndũ wĩsĩ, ĩndĩ mwĩkalo wake nĩ wa ũwau wa kũkũlangya na kũkananĩa ndeto, vala vaumaa kĩwĩu, na ĩteta, na kũumana, na kũtalĩlya ũthũku,

5na motũngĩthan’yo ma andũ ala manangĩkĩte kĩlĩkonĩ kyoo, na ala mevetee ũla w’o, makĩtalĩlya kũmũkĩa Ngai nĩ nzĩa ya kwona ũtandĩthyo.

6Ĩndĩ kũmũkĩa Ngai vamwe na kwĩanĩwa nĩ kĩla twĩ nakyo nĩ ũtandĩthyo mũnene:

7nũndũ tũtyaaũka kũũ nthĩ twĩ na kĩndũ, o na tũitonya kuma na kĩndũ;

8ĩndĩ tweethĩwa na kya ũya na kya kwĩvw’ika, syĩndũ isu ikatwĩanĩa.

9Ĩndĩ ala mekwenda kwĩthĩwa athwii nĩmavalũkaa na kũlika kũtatwanĩ na mũkwanĩ na mĩmeonĩ mingĩ ya ũtumanu na ya kũthũkya, ta ĩla ĩthikaa andũ makaa na kwanangĩka.

10Nũndũ wendi wa mbesa nĩ kĩtina kya mĩthemba yonthe ya ũthũku: namo andũ amwe makĩsyenda mũno, nĩmaĩtw’e na kũtia ũla mũĩkĩĩo, na kwĩtonya ene na mawoo maingĩ.

11Ĩndĩ we, mũndũ wa Ngai, kĩa maũndũ asu; noiatĩĩa ũlũngalu, na kũmũkĩa Ngai, na mũĩkĩĩo, na wendo, na wũmĩĩsyo, na ũuu.

12Ĩlũlũmĩlye kũkita kaũ ũla mũseo wa ũla mũĩkĩĩo, lũmya ũla thayũ wa tene na tene, ũla weetĩwe wĩthĩwe naw’o, na wakũsĩĩe ũkũsĩ mũseo ngũsĩ nyingĩ syene.

13Nĩngũkwĩaĩa mbee wa Ngai, ũla ũnengae syĩndũ syonthe thayũ, na mbee wa Klĩsto Yesũ, ũla wakũsĩĩe ũkũsĩ mũseo yĩla waĩ mbee wa Vondio Vilato;

14kana ũsũvĩae mwĩao ũũ, ũte ĩlanga, ũtaweteka ũthũku, kũvika kumĩla kwa Mwĩaĩi waitũ Yesũ Klĩsto:

15mavindanĩ makw’o we mwene nũkonan’ya, ũla Mũtonyi mũtaĩwa e weka, Mũsumbĩ wa asumbĩ, na Mwĩaĩi wa eaĩi;

16ũla e we weka ũtakwatawa nĩ kĩkw’ũ, ũtwĩe kyeninĩ kĩtathengeeka; o na vai mũndũ waamwona, o na ndatonya ũmwona; nĩwe mwene ndaĩa na vinya tene na tene. Ameni.

17Meaĩe ala me na ũthwii wa nthĩ ĩno, maikekathĩĩe, o na maikekwatye ũthwii ũla wanangĩkaa, ĩndĩ mekwatye Ngai, ũla ũtũnengae syĩndũ syonthe na wingĩ, tũtanaw’e nĩsyo;

18kana mekae nesa, kana methĩwe athwii ma kwĩkaa nesa, methĩwe meyũmbanĩtye kumya syĩndũ syoo, methĩwe me na mũamba wa ngoo na ala angĩ;

19meyiĩe ene mwambĩlĩlyo mũseo wa ĩvinda yĩla yũkite, nĩ kana makwate ũla thayũ wa tene na tene, naw’o nĩ thayũ wa w’o.

20Naku Timotheo, sũvĩa kĩla kyaiiwe kwaku, wĩvathane na ndeto sya mana na sya ngananĩo sya kĩla kĩtwa ũmanyi na tiw’o;

21amwe nĩmekwitĩkĩla ũu na nĩmavĩtĩtye ũla mũĩkĩĩo. Mumo nĩwĩthĩwe naku.

← Chapter 5 Jump to: