1 Timothy 5

Kamba (Mbivilia) 1956

← Chapter 4 Jump to: Chapter 6 →

1Ndũkakan’ye mũtumĩa, ĩndĩ mũtae ta au; na aũme mate akũũ ta ana‐a‐au:

2aka akũũ ta amwenyu; na ala anini ma mũika ta eĩtu‐a‐mwenyu, na ũtheu w’onthe.

3Taĩa iveti ndiwa, ila ndiwa sya w’o.

4Ĩndĩ ethĩwa ndiwa yĩ na syana kana nzũkũlũ, syĩmanyĩsye mbee kwĩka maũndũ maĩle kwa andũ ma nyũmba yoo ene, na kũmaiva asyai moo: nũndũ ũũ nĩwendeeasya mbee wa Ngai.

5Na ĩndĩ we ũla ndiwa w’o, na e weka, ekwatasya Ngai, na ekalaa akĩsũva na kũvoya ũtukũ na mũthenya.

6Ĩndĩ ndiwa ĩla ĩnenganae kwĩka mawendi mayo nĩ ngw’ũ ĩ o thayũ.

7Maũndũ asu nao ĩae, nĩ kana methĩwe mataweteka ũthũku.

8Ĩndĩ mũndũ o na wĩva ũtamasũvĩaa ala make, na mbee mũno ala ma nyũmba yake, nũkaĩĩte ũla mũĩkĩĩo, na nĩ mũthũku mbee wa ũla ũtetĩkilĩte.

9Ndiwa ndĩkaandĩkwe ĩtavikĩtye myaka mĩongo thanthatũ, yaĩ mũndũ mũka wa mũũme o ũmwe,

10ũwetawa kwĩthĩwa na meko maseo; ethĩwa nĩwaeie syana, ethĩwa nĩwathokisye aeni, ethĩwa nĩwathambisye maũũ ma ala atheu, ethĩwa nĩwamatethisye ala mathĩnaa, ethĩwa nĩwaatĩĩe kĩla wĩa mũseo na ũthangaau.

11Ĩndĩ ndiwa sya mũika mũnini ndũkaiandĩke: nũndũ yĩla syĩkwatwa nĩ mĩmeo ya ũmũtia Klĩsto, ikenda kũtwawa;

12nasyo syĩ na ũsilĩlo, nũndũ nĩsyaekie mũĩkĩĩo wasyo wa mbee.

13Na vamwe na ũu nĩsyĩmanyĩasya ũtulu, na kwanganga nyũmba na nyũmba; nasyo ti kũtula kw’oka, ĩndĩ nĩ aei ma ngewa na kwĩlikya maũndũnĩ ma andũ angĩ, ikĩneena ndeto itaĩle kũneenwa.

14Nĩngwenda ĩndĩ ndiwa sya mũika mũnini itwawe, isyaae syana, iũngamĩe nyũmba syoo, itikamũnenge mũmaitha ũthei kwiweta naĩ:

15nũndũ o na yu imwe nĩsyathũkĩte kũmũatĩĩa Satani.

16Ethiwa mũndũ mũka wĩtĩkĩlĩte e na aka ndiwa, naitethye, ĩkanisa yĩtikakue mũio ũsu; nĩ kana yĩtethye ndiwa ila sya w’o.

17Atumĩa ala masilaa nesa nĩmatalwe kwĩthĩwa maĩle kũnengwa ndaĩa nene, na mbee mũno nĩ asu ala matethasya wĩa wa ĩla ndeto na wa kũmanyĩsya.

18Nũndũ maandĩko maĩtye atĩĩ, Ndũkamyove ng’ombe kanyw’a ĩkĩvũa isyo. Na, Mũtethya wa wĩa nĩwaĩlwe nĩ ĩtuvi yake.

19Ndũketĩkĩle ũvingan’yo iũlũ wa mũtumĩa, vate ngũsĩ itĩ kana itatũ.

20Ala mekaa naĩ makanĩasye mbee wa andũ onthe, nĩ kana ala angĩ nao methĩwe na w’ĩa.

21Nĩkwĩaĩa mbee wa Ngai, na Klĩsto Yesũ, na alaĩka anyuve, nĩ kana wĩkae maũndũ asu onthe ũtekũtw’a na mĩtũkĩ, ndũkeke ũndũ na wendeesyo.

22Ndũkailĩĩle mũndũ o na wĩva moko na mĩtũkĩ, o na ndũkethĩwe na mũamba na nai sya andũ angĩ: ĩyĩkalye mwene wĩ mũtheu.

23Kuma yu ndũkanyusae manzĩ me oka, ĩndĩ nyusaa mbinyu nini nũndũ wa ĩvu yaku na nũndũ wa mowau ala maũkwataa mavinda maingĩ.

24Naĩ sya andũ amwe nĩsyenekee, syĩmatongoesye kũvika ũsilĩlonĩ; na andũ amwe naĩ syoo imavikĩlaa ĩtina.

25No ta ũu kwĩ mawĩa maseo ala menekee; na ala mate maseo maitonyeka kũvithwa.

← Chapter 4 Jump to: Chapter 6 →