1 Timothy 2

Kamba (Mbivilia) 1956

← Chapter 1 Jump to: Chapter 3 →

1Ĩndĩ, mbee wa maũndũ onthe, nĩngwĩsũva kana kwĩsũvana, na kũvoya, na kũvoyea, na kũtũnga mũvea, kwĩkawe kwondũ wa andũ onthe;

2kwondũ wa asumbĩ na onthe me na ũnene; nĩ kana twĩthĩwe na thayũ mũuu na mũuo katĩ wa kũmũkĩa Ngai kw’onthe na mwĩkalo mũseo.

3Ũndũ ũũ nĩ ũseo na nĩwĩtĩkĩlawa kwa Ngai Mũtangĩĩi waitũ;

4ũla wendaa andũ onthe matangĩĩwe, na moke mamanye ũla w’o.

5Nũndũ Ngai no ũmwe, na mwĩw’anĩthya katĩ wa Ngai na andũ no ũmwe, nake nĩ mũndũ, Klĩsto Yesũ,

6ũla wenenganie ethĩwe mbovosya ya andũ onthe; ũkũsĩ ũkaumĩlwa mavindanĩ maw’o;

7naw’o kwondũ waw’o nyie niĩtwe nĩthĩwe mũtavan’ya na mũtũmwa (nĩneena w’o, ndiũneena ũvũngũ), mũmanyĩsya wa Andũ‐ma‐mbaĩ‐ingĩ nthĩnĩ wa mũĩkĩĩo na wa ũla w’o.

8Kwondũ wa ũu, nĩenda aũme mavoyae kĩla vandũ, makyũkĩlya moko matheu, vate ũthatu na ngananĩo.

9Na aka no ta ũu, meyanakavye na kwĩvw’ĩka ngũa imaĩle, vamwe na wĩnyivyo na kĩlĩko; ti na nzw’ĩĩ mbokothe, na thaavu kana lũlũ kana ngũa sya thooa mũnene;

10ĩndĩ mevw’ĩke meko maseo (o ũndũ ũmaĩle aka ala maumbũlaa kũmũkĩa Ngai).

11Mũndũ mũka emanyĩsye auĩtye na wĩnyivyo w’onthe.

12Ĩndĩ ndĩũmũnenga mũndũ mũka ũthei wa kũmanyĩsya, kana kũsumbĩka mũndũ mũũme, ĩndĩ nĩethĩwe auĩtye.

13Nũndũ Atamu oombiwe mbee, na Eva ĩtina;

14na Atamu ndaakengwa, ĩndĩ mũka akengwa nĩwavalũkile ĩvĩtyonĩ:

15ĩndĩ akatangĩĩwa aisyaa syana, ethĩwa makekala mũĩkĩĩonĩ na wendonĩ na ũtheunĩ vamwe na kilĩko.

← Chapter 1 Jump to: Chapter 3 →