Ephesians 1

Kamba (Mbivilia) 1956

Jump to: Chapter 2 →

1Vaulo, mũtũmwa wa Klĩsto Yesũ kwondũ wa kwenda kwa Ngai, valũa ũũ wakwa ũmavikĩe atheu ala me Eveso, na ala me na kĩthito nthĩnĩ wa Klĩsto Yesũ:

2Mumo nĩwĩthĩwe nenyu na mũuo kuma kwa Ngai Asa waitũ na Mwĩaĩi Yesũ Klĩsto.

3Nakathwe Ngai, Ĩthe wa Mwĩaĩi waitũ Yesũ Klĩsto, ũla ũtũathimĩte na kĩla ũathimo wa veva nthĩnĩ wa Klĩsto ĩtunĩ:

4o ũndũ watũnyuvie nthĩnĩ wake nthĩ ĩtanambĩlĩlw’a, nĩ kana twĩthĩwe atheu tũte na ũndũ ũtaĩle mbee wake nthĩnĩ wa wendo:

5ũndũ watũnyuvie kuma tene tũtuwe ana kwake kwondũ wa Yesũ Klĩsto, kwĩanana na ũndũ wendie na kwenda kwake,

6nĩ kana ũtheu mũtisu wa mumo wake ũkathwe, ũla watũnengie mana nthĩnĩ wa ũla Mwendwa:

7nake nthĩnĩ wake twĩ na wovosyo witũ kwondũ wa nthakame yake, ũekeo wa mavĩtyo maitũ, kwĩanana na ũthwii wa mumo wake,

8naw’o atwingĩvĩsye na ũĩ w’onthe na ũmanyi,

9akĩtũmanyĩthya nzama ya kwenda kwake, kwĩanana na kwenda kwake kũseo kũla watwie nthĩnĩ wake

10kũvika walanyonĩ wa wĩanĩu wa mavinda, atũngĩanĩe syĩndũ syonthe nthĩnĩ wa Klĩsto, syĩndũ syi ĩtunĩ, na syĩndũ syĩ kũũ nthĩ; ĩĩ, nthĩnĩ wake we,

11na ingĩ nthĩnĩ wake ithyĩ nĩtwatwiwe ũtiĩwa wake, nĩkwĩthĩwa nĩtwanyuviwe kuma tene kwĩanana na kwenda kwake we ũla wĩkaa maũndũ onthe kwa ũtw’ĩo wa kwenda kwake;

12nĩ kana ithyĩ twĩthĩwe ma kũtuma ũtheu wake mũtisu ũkathwa, ithyĩ ala twambie kwĩkwatya Klĩsto;

13na nthĩnĩ wake o nenyu, mweew’a ndeto ya ũla w’o, nayo nĩ ũvoo mũseo wa ũtangĩĩo wenyu, — nake, mwamwĩtĩkĩla, nĩmwekĩiwe ũsiĩlo, naw’o nĩ Veva Mũtheu ũla wathaniwe,

14nake nĩ ngwatĩlĩlyo ya ũtiĩwa witũ, kũvika wovosyo wa ala make mwene ala wathooie, nĩ kana ũtheu wake mũtisu ũkathwe.

15Kwondũ wa ũu o nakwa, neew’a ũvoo wa mũĩkĩĩo ũla mwĩ naw’o nthĩnĩ wa Mwĩaĩi Yesũ, na wendo ũla mwonanasya kwa atheu onthe,

16ndiekaa kũtũnga mũvea kwondũ wenyu, ngĩmũweta mboyanĩ syakwa;

17kwa Ngai wa Mwĩaĩi waitũ Yesũ Klĩsto, Asa wa ũtheu mũtisu, amũnenge veva wa ũĩ na ũvuan’yo wa kũmũmanya we;

18metho ma ngoo syenyu mekĩwe kyeni, nĩ kana mũmanye ũndũ ũilyĩ wĩkwatyo wa wĩtano wake, na ũndũ ũilyĩ wingĩ wa ndaĩa wa ũtiĩwa wake nthĩnĩ wa atheu,

19na ũndũ ũilyĩ ũnene mũvĩtũku wa vinya wake kwondũ witũ ala twĩtĩkĩlaa, kwĩanana na kwĩka kwa vinya wa ũtonyi wake

20ũla wekie nthĩnĩ wa Klĩsto, yĩla wamũthayũũkisye kũmumya kwa akw’ũ, na kũmwĩkalya kw’okonĩ kwa aũme kwake kwake ĩtunĩ,

21ĩũlũ mũno mbee wa ũnene w’onthe, na ũkũmũ, na vinya, na ũsumbĩko, na kĩla syĩtwa yĩwetawa, ti ĩvinda yĩĩ yoka, ĩndĩ o na ĩvinda yĩla yĩkoka:

22na nĩwaiie syĩndũ syonthe ungu wa nyaĩĩ syake aisumbĩke, na amwia ethĩwe mũtwe ĩũlũ wa maũndũ onthe kwondũ wa ĩkanisa,

23nayo nĩ mwĩĩ wake, wĩanĩu wake ũla wusũasya maũndũ onthe nthĩnĩ wa onthe.

Jump to: Chapter 2 →