Ephesians 3

Kamba (Mbivilia) 1956

← Chapter 2 Jump to: Chapter 4 →

1Kwondũ wa ũu nyie Vaulo, mwovwa wa Klĩsto Yesũ kwondũ wenyu Andũ‐ma‐mbaĩ‐ingĩ,—

2ethĩwa nĩmwĩw’ĩte ũvoo wa walan’yo wa mumo wa Ngai ũla nanengiwe kwondũ wenyu;

3kana kwondũ wa kũvuanĩw’a nĩnamanyĩthiw’e ĩla nzama, o tondũ nambie kũandĩka na ndeto mbũthũ,

4na kwondũ wa ũu, yĩla mũũsoma, mũkoona ũmanyi wakwa wa ĩla nzama ya Klĩsto;

5nayo ndyaamanyĩthw’a ana ma andũ ma nzyawa ĩngĩ, o ũndũ atũmwa make atheu na athani mavuanĩw’e yu nthĩnĩ wa Veva;

6atĩ Andũ‐ma‐mbaĩ‐ingĩ nĩ atiĩwa vamwe naitũ, na mamutha ma ũla mwĩĩ vamwe naitũ, na osi vamwe naitũ ma watho ũla wĩ nthĩnĩ wa Klĩsto Yesũ kwondũ wa ũvoo mũseo,

7ũla nyie natwiwe mũthũkũmi waw’o, kwĩanana na mũthĩnzĩo wa mumo wa Ngai ũla nanengiwe kwĩanana wa kwĩka kwa vinya wake.

8Nyie ũla nĩ mũnini kwĩ ũla mũnini mbee kati wa atheu onthe, nĩnanengiwe mumo ũũ, kũtavan’ya kwa Andũ‐ma‐mbaĩ‐ingĩ ũthwii wa Klĩsto ũla ũtatalĩka;

9na kũtuma andũ onthe mamanya ũndũ ũilyĩ ũla walan’yo wa nzama ĩla kuma tene tene yavithiwe nthĩnĩ wa Ngai ũla wombie syĩndũ syonthe;

10nĩ kana yu kwa nzĩa ya ĩkanisa, ũĩ wa Ngai wa mĩthemba mingĩ ũmanyĩke kwa monene na mokũmũ ma ĩtunĩ,

11kwĩanana na ũtw’ĩo wa tene na tene ũla watwie nthĩnĩ wa Klĩsto Yesũ Mwĩaĩi waitũ:

12na nthĩnĩ wake twĩ na ũkũmbaũ na ũthei wa kũthengeea na wĩkwatyo, kwondũ wa mũĩkĩĩo witũ nthĩnĩ wake.

13Kwondũ wa ũu nĩngũmwĩsũva mũikaleele nũndũ wa mathĩna makwa kwondũ wenyu, namo nĩ ũtaĩo wenyu.

14Kwondũ wa ũu nĩtulya ndu mbee wa Asa,

15o ũla mĩvĩa yonthe ya ĩtunĩ na ya nthĩ nĩyĩtanĩawa nake.

16Nĩ kana amũnenge inyw’ĩ, kwĩanana na wingi wa ndaĩa yake, kana mwongeleelwe vinya mũndũ wa nthĩnĩ kwondũ wa Veva wake;

17nĩ kana Klĩsto ekalae ngoonĩ syenyu kwondũ wa mũĩkĩĩo; nĩ kana inyw’ĩ mũtambũũkĩtye mĩi na kũlũlũmĩlw’a nthĩnĩ wa wendo.

18Mwĩthĩwe na vinya wa ũkwata vamwe na atheu onthe ũndũ ũilyĩ ũthanthau na ũasa na ũtũlu na ũliku,

19na kũmanya wendo wa Klĩsto ũla ũvĩtũkĩte ũmanyi, nĩ kana mũtonye kusũwa kũvikĩa wusũu w’onthe wa Ngai.

20Na yu we ũla ũtonya kwĩka mũno mbee kũvĩta onthe ala tũvoyaa kana kũlilikana, kwĩanana na vinya ũla wĩkaa nthĩnĩ waitũ,

21ndaĩa nĩyĩthĩwe yake ĩkanisanĩ na nthĩnĩ wa Klĩsto Yesũ nzyawanĩ syonthe tene na tene. Ameni.

← Chapter 2 Jump to: Chapter 4 →