Ephesians 5

Kamba (Mbivilia) 1956

← Chapter 4 Jump to: Chapter 6 →

1Nũndũ wa ũu, ĩthĩwai mũkĩelekan’ya na Ngai, ta twana twendetwe;

2na mũkĩendaa nthinĩ wa wendo, o ũndũ Klĩsto nake wamwendie inyw’ĩ, na eeyumya mwene kwondũ witũ, mũthĩnzĩo na nthembo kwa Ngai, yi na mũuke mũseo.

3Ĩndĩ ũlaalai, na ũvuku w’onthe, na wendi, maikawetwe kati wenyu, o ũndũ kwaĩle atheu;

4o na ũla wĩ nthoni, o na kũneena na ũtumanu, kana kũvũa ngũĩ, maũndũ asu mataĩle: ĩndĩ kavaa ni kũtũnga mũvea.

5Nũndũ nĩmwĩsĩ ũũ vyũ, atĩ kĩlaalai, kana mũndũ mũvuku, kana mũndũ wĩ na wendi, nake ni mũthaithi wa mĩvw’anano, asu mati na ũtiĩwa o na wiva ũsumbĩnĩ wa Klĩsto na Ngai.

6Mũndũ ndakamũkenge na ndeto sya mana: nũndũ kwondũ wa maũndũ aa ũthatu wa Ngai nũmokiaa ana ma ũlei.

7Mũikethĩwe mwĩ mũamba nao;

8nũndũ inyw’ĩ tene mwai kĩvindu, ĩndĩ yu mwĩ kyeni nthĩni wa Mwĩaĩi: endaai ta syana sya kyeni

9(nũndũ ũsyao wa kyeni wĩ nthĩnĩ wa ũseo w’onthe na ũlũngalu na w’o),

10mũkĩthima maũndũ ala mamwendeeasya Mwĩaĩi;

11na mũikethĩwe na mũamba na mawĩa ma kĩvindu mate na ũsyao, ĩndĩ kavaa nĩ kũmakan’ya;

12nũndũ maũndũ ala mekawa nĩmo kĩmbithĩ nĩ nthoni o na kũmaweta.

13Ĩndĩ maũndũ onthe makanw’a nĩmonananw’a nĩ kyeni: nũndũ kĩla ũndũ wonanĩtw’e no kyeni.

14Kwondũ wa ũu easya, Amũka, we ũla ũkomete, noithayũũka kuma kwa akw’ũ, na Klĩsto akakũtisĩa.

15Ĩsũvĩei ĩndĩ nesa ũndũ mũendaa, ti ta ala mate na ũĩ, ĩndĩ ta ala oĩ;

16mũkĩtangĩĩa ĩvinda, nĩkwĩthĩwa mĩthenya nĩ myathe.

17Kwondũ wa ũu mũikethĩwe atumanu, ĩndĩ manyai kwenda kwa Mwĩaĩi ũndũ kũilyĩ.

18Na mũikatoonw’e nĩ mbinyu, nayo ĩ mĩkwa mĩthũku, ĩndĩ usũwai nĩ Veva;

19mũkĩneena ene kwa ene na savuli na mbathi sya kũmũkumya Ngai na mbathi sya veva, mũkĩmwinĩa Mwĩaĩi na kũmũtaia ngoonĩ syenyu;

20mũkĩmũtũngĩa Ngai Asa mũvea, mavinda onthe kwondũ wa maũndũ onthe, syĩtwanĩ ya Mwĩaĩi waitũ Yesũ Klĩsto;

21mũkĩnyivanĩsya ene kwa ene nũndũ wa kũmũkĩa Klĩsto.

22Inyw’i iveti, ĩnyivĩsyei aũme menyu ta mwinyivĩsye Mwĩaĩi.

23Nũndũ mũndũ mũũme nĩ mũtwe wa kĩveti, o tondũ Klĩsto nake nĩ mũtwe wa ikanisa, nake nĩ mũtangĩĩi wa mwĩĩ.

24Ĩndĩ o ũndũ ikanisa yimwinyivĩasya Klĩsto, o ta ũu iveti nasyo nĩsyinyiviasye aũme masyo maũndũni onthe.

25Aũme, endai iveti syenyu, o ũndũ Klĩsto wendie ĩkanisa, na enengane mwene kwondũ wayo;

26nĩ kana ayĩvathan’ye, ayĩtheetye ũndũ wa kũthambya na manzĩ nthinĩ wa ndeto,

27nĩ kana atonye kwĩnenga mwene ĩkanisa ĩtaie, yĩte na ilanga kana ũkũnzanu kana ũndũ ũngĩ ta asu; ĩndĩ nĩ kana yĩthĩwe itheu yĩte na ũndũ ũtaĩle.

28O ta ũu aũme namo nĩmaĩlwe nĩ kũsyenda iveti syoo o ũndũ mendete mĩĩ yoo ene. Ũla wendaa kĩveti kyake eyendaa mwene:

29nũndũ vai mũndũ waamena mwĩĩ wake o na ĩndĩĩ; ĩndi nĩwũnengae lĩu na kũũsũvĩa, o tondũ Klĩsto ũyĩsũvĩaa ikanisa;

30nũndũ twĩ mamutha ma mwĩĩ wake.

31Kwondũ wa ũu mũndũ akatia ĩthe na inyia, na akalũman’ya na kĩveti kyake; na me elĩ makatw’ĩka mwĩĩ ũmwe.

32Nzama ino nĩ nene: ĩndĩ nĩneena ũvoo wa Klĩsto na ĩkanisa.

33Ĩndĩ kĩla mũndũ wenyu nakyende kĩveti kyake o ũndũ wĩyendete mwene; na kĩveti nĩkĩmũkĩe mũũme.

← Chapter 4 Jump to: Chapter 6 →