Ephesians 2

Kamba (Mbivilia) 1956

← Chapter 1 Jump to: Chapter 3 →

1Nake nĩwamũthayũũkisye inyw’ĩ, yĩla mwai akw’ũ kwondũ wa mavĩtyo menyu na naĩ syenyu,

2ila mwaendie nthĩni wasyoĩvinda ya tene kwĩanana na mĩendele ya nthĩ ĩno, kwĩanana na mũnene wa mavinya ma yayaya, wa veva ũla wĩkaa wĩa yu nthĩnĩ wa ana ma ũlei;

3o naitũ ithyonthe tene twekalile katĩ woo mĩmeonĩ ya mĩĩ yaitũ, tũkĩka mawendi ma mĩĩ na ma mosũanĩo, na nũndu wa mwĩkalĩle witũ twaĩ syana sya ũthatu, o ta ala angĩ:—

4ĩndĩ Ngai, nĩkwĩthĩwa aĩ na tei mwingĩ, nũndũ wa wendo wake mũnene ũla watwendie naw’o,

5o na yĩla twaĩ akw’ũ kwondũ wa mavĩtyo maitũ, atũnengie thayũ vamwe na Klĩsto (nĩmũtangĩĩĩtwe nĩ mumo),

6naitũ nthĩnĩ wa Klĩsto Yesũ nĩwatũthayũũkisye vamwe nake, na kũtwĩkalya nthĩ vamwe nake ĩtunĩ:

7nĩ kana mavinda ala mokĩte atonye kwonan’ya ũthwii mwingĩ wa mumo wake kwondũ wa ũseo wake kwitũ nthĩnĩ wa Klĩsto Yesũ:

8nũndũ nĩmũtangĩĩĩtwe na mumo kwondũ wa mũĩkĩĩo; naw’o ndumĩte kwa inyw’ĩ ene, nĩ mũthĩnzĩo wa Ngai;

9ti ũndũ wa meko, kana kũikethĩwe mũndũ o na wĩva kwĩkathĩĩa.

10Nũndũ ithyĩ twĩ wĩa wake, twombiwe nthĩnĩ wa Klĩsto Yesũ twĩkae meko maseo, ala Ngai waseũvisye mbee nĩ kana tũendae nthĩnĩ wamo.

11Kwondũ wa ũu lilikanai, kana ĩvinda ya tene inyw’ĩ, Andũ‐ma‐mbaĩ‐ingĩ kwa mwĩĩ, ala mwĩtawa Mũtaĩkawa nĩ ala metawa Maĩkawa, nayo nĩ nzaĩko ya mwĩĩ, ĩla yaĩkawa na moko;

12kana inyw’ĩ ĩvinda yĩu mũtyaĩ na Klĩsto, mwavathũkenw’e na mbaĩ ya Isilaeli, na mwaĩ aeni, andũ mate na motianĩo ma ũla watho, mũtaĩ na wĩkwatyo na mũtaĩ na Ngai kũũ nthĩ.

13Ĩndĩ yu nthĩnĩ wa Klĩsto Yesũ inyw’ĩ ala mwaĩ kũasa nĩmũthengeew’e nĩ nthakame ya Klĩsto.

14Nũndũ nĩwe mũuo witũ, ũla watumie ithyelĩ tũtw’ika ũmwe, na nĩwaomboie ũvai wa mũvaka ũla waĩ katĩ,

15avetete na mwĩĩ wake ũla ũmaitha, naw’o nĩ ĩla mĩao ya wiaĩi yaandĩkĩtwe motw’ĩonĩ; nĩ kana ombe wa asu elĩ mũndũ ũmwe mweũ nthĩnĩ wake mwene, na kwondũ wa ũu aete mũuo;

16na nĩ kana amew’anĩthye na Ngai me elĩ mwĩĩnĩ ũmwe kwondũ wa ngelan’yo, oaĩte ũla ũmaitha nayo:

17nake ooka na atavan’ya ũvoo mũseo wa mũuo kwa inyw’ĩ ala mwaĩ kũasa, na mũuo kwa ala maĩ vakuvĩ:

18nũndũ kwondũ wake ithyelĩ twĩ na ũthei witũ wa kũthengeea mbee wa Asa nthĩnĩ wa Veva ũmwe.

19Na kwondũ wa ũu mũti aeni na avĩti ĩngĩ, ĩndĩ mwĩ andũ ma kĩĩndĩ vamwe na atheu, na andũ ma nyũmba ya Ngai,

20nũndũ nĩmwakĩtwe ĩũlũ wa wambĩlĩlyo, naw’o nĩ atũmwa na athani, Klĩsto Yesũ mwene nĩwe yĩla ĩvia ĩnene ya kĩkotonĩ;

21na nthĩnĩ wake kĩla wako, ũithalanw’a nesa, nĩwĩanaa ũkethĩwa ĩkalũ nthĩnĩ wa Mwĩaĩi;

22na nthĩnĩ wake nĩmwakĩtwe vamwe mwĩthĩwe wĩkalo wa Ngai nthĩnĩ wa Veva.

← Chapter 1 Jump to: Chapter 3 →