Ephesians 4

Kamba (Mbivilia) 1956

← Chapter 3 Jump to: Chapter 5 →

1Na kwondũ wa ũu nyie, mwovwa nthĩnĩ wa Mwĩaĩi, nĩngũmwĩsũva mũendae o ũndũ waĩle wĩtano ũla mweetiwe naw’o,

2na wĩnyivyo w’onthe na ũuu, na wũmĩĩsyo, mũkyũmĩanĩsya inyw’ĩ kwa inyw’ĩ nthĩnĩ wa wendo;

3mũkĩthing’ĩĩsya kũsũvĩa wĩw’ano ũmwe wa Veva wovanonĩ wa mũuo.

4Mwĩĩ nĩ ũmwe, na Veva nĩ ũmwe, o ũndũ mweetiwe wĩkwatyonĩ ũmwe wa wĩtano wenyu;

5Mwĩaĩi ũmwe, mũĩkĩĩo ũmwe, ũvatiso ũmwe,

6Ngai ũmwe, nake ni Ĩthe wa onthe, ũla wĩ ĩũlũ wa onthe, na kũtũngana kwa onthe, na nthĩni wa onthe.

7Ĩndĩ kĩla ũmwe waitũ nũnengetwe ũla mumo kwĩanana na kĩthimo kya mũthĩnzio wa Klĩsto.

8Kwondũ wa ũu easya, Yĩla wambatie ĩũlũ, nĩwatavie mũtavo, Na anenga andũ mĩthĩnzĩo.

9(Na ndeto ĩno, Nĩwambatie, nata ate o kwasya kana nĩwatheeie alike kũndũ kũliku kwa nthĩ?

10Ũla watheeie niwe ũsu wambatie ĩũlũ mũno mbee wa matu onthe, nĩ kana ausũsye syĩndũ syonthe.)

11Nake anengie andũ amwe methĩwe atũmwa; na angĩ, athani; na angĩ, atavan’ya ma ũla ũvoo mũseo; na angi, aĩthi, na amanyisya;

12nĩ kana atheu meanĩwe, ũndũ wa wĩa wa kũthũkũma, nĩ kana mwĩĩ wa Klĩsto wakwe:

13mũvaka ithyonthe tũvikĩe wĩw’ano ũmwe wa mũĩkĩĩo, na wa kũmũmanya Mwana wa Ngai, kũvikĩa mũndũ mwĩanĩu, kũvikĩa kĩthimo kya ũtũlu wa wĩanĩu wa Klĩsto;

14nĩ kana kuma yu tũikethĩwe syana nini, tũkĩluutangwa kũũ na kũũ na kũkuwa nĩ kĩla kĩseve kya ũmanyĩsyo, na maũĩ ma andũ, na ũsesengano, kũatĩĩa nzĩa ya ũkengani wa kwasya andũ;

15ĩndĩ tũkĩneena w’o nthĩnĩ wa wendo, twĩane maũndũnĩ onthe tũmũvikie we, nake nĩwe mũtwe, Klĩsto;

16na kuma kwake mwĩĩ w’onthe, ũikomanw’a nesa na kũkwatanw’a, nĩwĩanaa nũndũ wa ũtethyo wa kĩla ũleenyũ, kwĩanana na kĩthimo kya wĩa wa kĩla mutha, ũmwe na ũmwe, ũkiyaka e w’o wendonĩ.

17Na ĩndĩ nĩneena ũu, na kũkũsĩĩa nthĩnĩ wa Mwĩaĩi, kana kuma yu inyw’ĩ mũikaende ũndũ Andũ‐ma‐mbaĩ‐ingĩ maendaa, na ũtumanu wa ilĩko syoo,

18nũndũ ũmanyi woo nĩwĩkĩĩtwe kĩvindu, mavathĩtwe kũasa na thayũ wa Ngai, nũndũ wa kũlea kũmanya kũla kwĩ nthĩnĩ woo, nũndũ wa wũmũ wa ngoo syoo;

19nao mavĩtũkĩte kwĩw’a, meenenganie mĩmeonĩ mĩthũku, meke ũvuku w’onthe na wendi.

20Ĩndĩ inyw’ĩ tiw’o mweemanyĩsye Klĩsto;

21ethĩwa nĩw’o nĩmwamwĩwie, na kũmanyĩw’a nthĩnĩ wake, o ũndũ w’o ũilyĩ nthĩnĩ wa Yesũ:

22ũndũ wa mwĩkalĩle wenyu wa tene, mumyei mwĩkye kũasa mũndũ wa tene, ũla wanangĩkaa kwa ũvikĩlaa mĩmeo ya ũkengani;

23mũtw’ĩkithw’e eũ vevani wa ilĩko syenyu.

24Na mwĩvw’ĩke mũndũ mweũ, ũla wombiwe na mũvw’ano wa Ngai nthĩnĩ wa ũlũngalu na ũtheu wa w’o.

25Kwondũ wa ũu, mũkĩveta ũvũngũ, neenai w’o kila mũndũ na ũla ũngĩ: nĩkwĩthiwa twĩ mamutha ene kwa ene.

26Thatai, na mũikeke naĩ: mũikaeke syũa vĩthũe mwi na ũthilĩku:

27o na mũikamũnenge Satani ũthei.

28Ũla woyie ndakoye ingi: ĩndĩ kavaa atethye wĩa, akĩkaa na moko make ũndũ waĩlĩte, ni kana ethĩwe na kĩndũ kya ũmũnenga ũla wi na vata.

29Ndeto nthũku itikaume makanyw’anĩ menyu, ĩndĩ no ila nzeo sya kwaka o ũndũ vata wĩana, nĩ kana imanenge mumo ala mekwiw’a.

30Na mũikew’ĩthye Veva Mũtheu wa Ngai woo, nake nthĩnĩ wake mwĩkĩĩtwe ũsiĩlo kũvika mũthenya wa wovosyo.

31Ĩndĩ ũũ, na ũthilĩku, na ũthatu, na ĩteta, na moumano, mavetwe kwenyu, vamwe na kĩla ũthũku:

32na mwĩthĩwe mũkyaĩlan’ya ene kwa ene, mũkĩw’anĩa tei, mũkĩekanĩa inyw’ĩ kwa inyw’ĩ, o ũndũ Ngai nake wamũekeie inyw’ĩ nthĩnĩ wa Klĩsto.

← Chapter 3 Jump to: Chapter 5 →