Ephesians 6

Kamba (Mbivilia) 1956

← Chapter 5 Jump to:

1Syana, mew’ei ala mamũsyaie nthĩnĩ wa Mwĩaĩi: nũndũ ũu nĩw’o waĩle.

2Taĩa au na mwenyu (naw’o nĩ mwĩao wa mbee wĩ na watho),

3nĩ kana kwĩthĩwe ũseo kwaku, na wĩkale mũno kũũ nthĩ.

4Na, inyw’ĩ aaĩthe, mũikathatye syana syenyu: ĩndĩ ieei na mosilĩlo na motao ma Mwĩaĩi.

5Ngombo, mew’ei mavwana menyu kwondũ wa mwĩĩ, na w’ĩa na kũtetema, na ũthalĩku wa ngoo syenyu, ta kũmwĩw’a Klĩsto;

6ti kwa ũthũkũmi wa kũsyaĩĩw’a, ta endeesya ma andũ; ĩndĩ ta ngombo sya Klĩsto, mũkĩka na ngoo ũndũ wendetwe nĩ Ngai;

7mũkĩthũkũma na kwenda kũseo, ta mũũthũkũma Mwĩaĩi, na ti andũ:

8mũkĩmanya kana ũndũ ũseo o na wĩva ũla mũndũ wĩkaa, akoosa o w’o ĩngi kuma kwa Mwĩaĩi, e ngombo, kana ate ngombo.

9Na inyw’ĩ mavwana, mekei maũndũ o asu, na ekai kũmakandĩa: mũkĩmanya kana Vwana woo, nowe wenyu, e ĩtunĩ, na kwake kũi wendeesyo wa andũ.

10Kũminũkĩlya, ithiwai na vinya nthĩnĩ wa Mwĩaĩi, na vinyani wa ũtonyi wake.

11Ĩkĩai mĩio yonthe ya kaũ ya Ngai, nĩ kana mũtonye kũsiĩĩa maũĩ ma Satani.

12Nũndũ kũkĩlan’ya vinya kwitũ ti kũkĩlan’ya na mwĩĩ na nthakame, ĩndĩ ni kũkĩlan’ya na monene, na mokũmũ, na ala masumbĩkĩte kĩvindunĩ kĩĩ, na nguthu sya maveva ma ũthũku ĩtunĩ.

13Kwondũ wa ũu osai mĩio yonthe ya kaũ ya Ngai, nĩ kana mũtonye kũkĩlya vinya mũthenya ũla mũthũku, na, mweeka ũu w’onthe, kũũngama.

14Ũngamai ĩndĩ, mwĩvotoete inyunyunĩ syenyu na w’o, na mwĩkĩĩte ngao ya kĩthũi ya ũlũngalu,

15na maũũnĩ menyu mwĩkĩĩte iatũ sya kwĩyũmban’ya sya ũvoo mũseo wa mũuo;

16na vamwe na mĩio ĩsu yonthe mũkyosa ngao ya mũĩkĩĩo, ĩla kwondũ wayo mũkatonya kũvosya mĩsyĩ yonthe yĩ na mwaki ya ũla mũthũku.

17Na osai ngovia ya ũtangĩĩo, na ũvyũ wa Veva, naw’o nĩ ndeto ya Ngai:

18mũkĩvoya nthĩnĩ wa Veva mavinda onthe na mboya syonthe na kwĩsũva, na mũkĩsyaĩisya ũndũni ũsu na kĩthing’ĩĩsyo na kwĩsũvana kw’onthe kwondũ wa atheu onthe,

19na kwondũ wakwa nyie, nĩ kana nĩnengwe kũneena, nathamye kanyw’a wakwa na ũkũmbaũ, nonan’ye nzama ya ũvoo mũseo,

20ũla kwondũ waw’o nĩ mũtũmwa mĩnyololonĩ; nĩ kana nthĩnĩ waw’o nĩneene na ũkũmbaũ, o ũndũ naĩlwe nĩ kũneena.

21Ĩndĩ nĩ kana nenyu mũmanye maũndũ makwa, ũndũ ndilyĩ, Tikiko, ũla mwana‐a‐asa mwendwa, na mũthũkũmi wĩ kĩthito nthinĩ wa Mwĩaĩi, akamũtavya maũndũ onthe:

22ũla nĩmũtũmĩte kwenyu kwondũ wa kĩtumi kĩĩ, kana mũmanye ũndũ tũilyĩ, na nĩ kana akiakisye ngoo syenyu.

23Mũuo nĩwĩthĩwe na ana‐a‐asa, na wendo vamwe na mũĩkĩĩo, kuma kwa Ngai Asa na Mwĩaĩi Yesũ Klĩsto.

24Mumo nĩwĩthĩwe na onthe ala mamwendaa Mwĩaĩi waitũ Yesũ Klĩsto na wendo ũtanangĩkaa.

← Chapter 5 Jump to: