1 Timothy 1

Kamba (MBIVILIA ŨVOO MŨSEO)

Jump to: Chapter 2 →

1Kuma vala nĩĩ nyie Vaũlo mũtũmwa wa Klĩsto Yesũ, kumana na mwĩao wa Ngai Mũtangĩĩi waitũ na Klĩsto Yesũ wĩkwatyo witũ.

2Valũa ũũ wakwa nĩ kwaku we mwana wakwa wa w'o, ũla tũkwatanĩe mũĩkĩĩo ũmwe. Mumo, tei, na mũuo nĩsyĩthĩwe naku kuma kwa Ngai Asa, na Klĩsto Yesũ Mwĩai waitũ.

3Nĩenda wĩkale Eveso o tondũ nakwĩsũvie yĩla naendete Masendonia, nĩ kana ũmakany'e andũ amwe me kũu maeke kũmanyĩsya momanyĩsyo ma ũvũngũ.

4Matavye maekane na ngewa sya mana, na kũtalany'a kwa moosyaanĩo ma aaũmae moo kũtathela, kũla kũetae ngananĩo vandũ va kũthũkũma Ngai mũvangonĩ wake ũla ũmanyĩkaa kwa mũĩkĩĩo.

5Kĩeleelo kya mũvango ũũ mũseo nĩ kũmanyĩsya andũ methĩwe na wendo wa w'o, ũla wumaa ngoonĩ ntheu, wasya mũseo wa ngoo na mũĩkĩĩo wa w'o.

6Andũ amwe nĩmatiĩte maũndũ asu na makalika ndetonĩ ite na ũtethyo.

7Nĩmekwenda methĩwe amanyĩsya ma mĩao ya Ngai, ĩndĩ maikũelewa nĩ ndeto isu syoo ene, kana maũndũ ala maneenaa ta mamesĩ vyũ.

8Nĩtwĩsĩ kana Mĩao nĩ mĩseo, ethĩwa mũndũ o na wĩva akamĩtũmĩa kwa nzĩa ĩla yaĩlĩte.

9O ta ũu nĩtwaĩlĩtwe nĩ kũmanya kwa w'o kana mĩao ndĩseũvaw'a kwondũ wa ala alũngalu, ĩndĩ nĩ kwa ala ang'endu na athe, ala mate atheu na ala avuku ngoo, ala mate na kĩkĩo kya Ngai na eki ma naĩ, ala moaa aaĩthe kana aainyia, kana mũaani o na wĩva,

10ilaalai, aũme ala mamanyanaa kĩ-mwĩĩ na aũme angĩ, kana aka na aka angĩ, ala moyaa andũ ala angĩ, ala makenganaa na kumya ũkũsĩ wa ũvũngũ kana kwĩka ũndũ ũngĩ o na wĩva ũtosanaa na ũmanyĩsyo ũla wa w'o.

11Ũmanyĩsyo ũsu wumaa nthĩnĩ wa Ũvoo Mũseo wa ũkumyo, ũla Ngai mũtheu wanengie nĩtavany'e.

12Nĩngũmũtũngĩa Mwĩai waitũ Klĩsto Yesũ mũvea, ũla ũnengete vinya wa kũthũkũma. Nĩmũtũngĩa mũvea kwondũ wa kwona naĩlĩte na akanyuva nĩmũthũkũme,

13o na kau navu mbeenĩ nĩnaneenaa ndeto nthũku ĩũlũ wake, kũmũthĩny'a na kũmũumanga. Ĩndĩ Ngai nĩwambĩw'ĩie tei nũndũ ndyeesĩ kĩla neekaa, nĩkwĩthĩwa ndyaĩ nĩnamba kũtw'ĩka Mũklĩsto.

14Mwĩai waitũ nĩwanengie mumo wake mwingĩ vamwe na mũĩkĩĩo na wendo, ila tũkwataa nthĩnĩ wa Klĩsto Yesũ.

15Ndeto ii nĩ sya w'o na nĩsyaĩlĩte kwĩtĩkĩlwa na kũĩkĩĩwa vyũ, kana Klĩsto Yesũ ookie kũũ nthĩ kũtangĩĩa eki ma naĩ. Na nyie naĩ mũvĩtany'a kũvĩtũka ala angĩ onthe,

16ĩndĩ Ngai nĩwambĩw'ĩie tei nĩ kana Klĩsto Yesũ onany'e wũmĩĩsyo wake mwingĩ kwakwa, nyie ũla mũthũku kũvĩtũka onthe, nĩ kana nĩthĩwe ngelekany'o kwa onthe ala makamũĩkĩĩa, ĩtina na kũkwata thayũ ũtathela.

17Nayu kwa Mũsumbĩ wa tene na tene, ũtesa kũkw'a na ũtonekaa, na nĩwe weka Ngai, nĩkwĩthĩwe ndaĩa na ũkumyo tene na tene! Ameni.

18Mwana wakwa Timotheo, nĩkũnenga mwĩao ũũ kwĩanana na ndeto sya wathani ila syaneeniwe tene ĩũlũ waku. Ndeto isu syĩthĩwe kwaku ta mĩio ya kaũ, nĩ kana wũkite kaũ mũseo,

19wĩlũmĩtye mũĩkĩĩonĩ na wĩ na wasya mũseo wa ngoo. Kwa kũlea kwĩthukĩĩsya wasya wa ngoo, andũ amwe nĩmaĩtye mũĩkĩĩo woo.

20Amwe katĩ woo nĩ Aimenaũsi na Alekisanda ala nĩmanenganĩte ũtonyinĩ wa Satani, nĩ kana mamanye kana mayaĩlĩte kũuma Ngai.

Jump to: Chapter 2 →