1 Timothy 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Mbee wa maũndũ onthe, nĩngũũkũlya nĩ kana kwĩsũvana, kũvoya, kũvoyea, na kũtũnga mũvea syĩkawe kwa Ngai kwondũ wa andũ onthe;

2kwondũ wa asumbĩ na andũ ala angĩ onthe me na ũkũmũ, nĩ kana twĩthĩwe na thayũ mũuu na mũuo, na twĩ na kĩkĩo kyonthe kya Ngai na mwĩkalo ũla waĩlĩte.

3Ũndũ ũsu nĩ mũseo na nũmwendeeasya Ngai Mũtangĩĩi waitũ,

4ũla wendaa andũ onthe matangĩĩwe na maivikĩa ũmanyi wa ũla w'o.

5Nũndũ ve Ngai o ũmwe, na no ũmwe ũla wĩw'anĩthasya Ngai na andũ, nake nĩ mũndũ, Klĩsto Yesũ,

6ũla weenenganie ta nthembo ovosye andũ onthe. Ũkũsĩ ũũ wookie ĩvinda yaw'o yavika.

7Kĩu nĩkyo kyatumie nĩnyuvwa ta mũtũmwa na mũmanyĩsya wa Andũ-ma-mbaĩ-ingĩ, nĩmatavye ĩũlũ wa mũĩkĩĩo na ũw'o. Nyie ndiũneena ũvũngũ; nĩneena w'o.

8Syathĩnĩ syonthe sya ũthaithi wendi wakwa nĩ aũme mavoyae mokĩlĩtye moko, mate na ũthatu kana ngananĩo.

9O ta ũu nĩngwenda aka methĩwe mayĩkĩa ngũa ila imaĩlĩte, na mayĩthĩwa na kĩlĩko kya kwĩkĩa ngũa nesa, na ti kwa kwĩyanakavya na mĩseũvĩlye ya nzw'ĩĩ, kana na syĩndũ iseũvĩtw'e na thaavu, kana na ingĩ iseũvĩtw'e na mavia ma thooa mũnene, kana na ngũa sya thooa mũnene;

10ĩndĩ nĩ kwa meko maseo ala maĩlĩte kũwetanĩw'a na aka ala maasya kana nĩmamũthaithaa Ngai.

11Mũndũ mũka aĩlĩte kwĩmanyĩasya avindĩtye na e na wĩnyivyo w'onthe.

12Ndikwĩtĩkĩlya aka kũmanyĩsya kana kwĩthĩwa na ũkũmũ ĩũlũ wa aume; mũndũ mũka aĩlĩte kwĩkalaa avindĩtye.

13Nũndũ Atamu oombiwe mbee, na ĩndĩ ĩtina Awa.

14Atamu ndaakengwa, ĩndĩ mũndũ mũka nĩwakengiwe na atw'ĩka mũvĩtany'a.

15Ĩndĩ mũndũ mũka akatangĩĩawa kwa kũsyaa ethĩwa akaendeeaa kwĩthĩwa e na mũĩkĩĩo, wendo, e mũtheu, na kwĩyĩkalya nesa.

← Chapter 1 Jump to: Chapter 3 →