1 Timothy 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Ndeto ii nĩ sya w'o: Ethĩwa mũndũ nũkwenda kũtw'ĩka mũsyaĩĩsya wa ĩkanisa, mũndũ ũsu eenda wĩa mũseo.

2Mũsyaĩĩsya wa ĩkanisa nĩwaĩlĩte kwĩthĩwa atawetanĩw'a na ũndũ mũthũku, na no nginya akethĩwa e mũũme wa kĩveti o kĩmwe. O ta ũu no nginya akethĩwa e mũndũ wĩ wĩting'o, wĩ mosũanĩo maseo, wĩ mĩvango mĩseo, wendete andũ, na wĩsĩ kũmanyĩsya.

3Ndaĩlĩte kwĩthĩwa e mũthengi kana mũndũ wa kaũ, ĩndĩ aĩlĩte kwĩthĩwa na wĩnyivyo, ate ĩteta, na ate mwendi wa mbesa.

4O ta ũu nĩwaĩlĩte kwĩthĩwa mũndũ ũsũvĩaa mũsyĩ wake nesa, na ũmanyĩasya syana syake kũmwĩw'a na kũmũnengae ndaĩa ĩla yaĩlĩte.

5Nũndũ ethĩwa mũndũ ndatonya kũsũvĩa andũ ma mũsyĩ wake mwene, akatonya ata kũsũvĩa ĩkanisa ya Ngai?

6Mũndũ ũsu nĩethĩwe e na ũima wa mũĩkĩĩo, ndakese ũkwatwa nĩ mĩkathĩĩo na kũlika ũsilĩlonĩ o tondũ Satani weekie.

7O ta ũu nĩwaĩlĩte kwĩthĩwa mũndũ ũnengetwe ndaĩa nĩ andũ ala mate aĩkĩĩi, ndakekĩĩthw'e nthoni nĩ andũ na akĩlika mũteonĩ wa Satani.

8Ndikoni o namo nĩmaĩlĩte kwĩthĩwa me andũ ma kwĩkwatw'a, na maneenaa ũla w'o. Mayaĩlĩte kwĩthĩwa me athengi, kana kwĩthĩwa na wendi wa mbesa.

9Maĩlĩte kũkwata maũndũ ma kĩ-nthĩnĩ ma mũĩkĩĩo me na wasya mũtheu wa ngoo.

10Nĩmaĩlĩte kwamba kũow'a, na ĩndĩ ethĩwa nĩmooneka me aĩlu, nĩmatonya kũlika ũthũkũminĩ.

11Aka moo o namo maĩlĩte kwĩthĩwa andũ ma kwĩkwatw'a, na mayaĩlĩte kwĩthĩwa andũ ma nzukũ; maĩlĩte kwĩthĩwa me na wĩting'o, na me ma kũĩkĩĩwa maũndũnĩ onthe.

12Ndikoni aĩlĩte kwĩthĩwa e mũũme wa kĩveti o kĩmwe, na aisũvĩa syana syake na mũsyĩ wake w'onthe nesa.

13Andũ ala matethasya wĩa nesa me ndikoni me nguma nzeo, na methĩawa na ũkũmbaũ wa kũneena ĩũlũ wa mũĩkĩĩo woo nthĩnĩ wa Klĩsto Yesũ.

14Nĩkũandĩkĩa valũa ũũ nĩ na wĩkwatyo wa kũka kũu ũĩ o mĩtũkĩ ngwone.

15Ĩndĩ ethĩwa nĩngwĩkalanga, valũa ũũ nũũkũmanyĩthya mwĩkalo ũla mũndũ waĩlĩte kwĩthĩwa naw'o e andũnĩ ma Ngai, namo nĩyo ĩkanisa ya Ngai ũla wĩ thayũ, yĩla yĩũngamĩaa na kũsũvĩa ũla ũw'o.

16Vate nzika nĩtũkwĩtĩkĩla kana kĩmbithĩ kya mũĩkĩĩo witũ nĩ kĩnene: Klĩsto oonaniw'e e na wũmbo wa mũndũ, nĩwatalĩlwe kwĩthĩwa mũlũngalu nĩ Veva, na ooneka nĩ alaĩka. Nĩwatavaniw'e kwa Andũ-ma-mbaĩ-ingĩ, andũ nĩmamũĩkĩĩie kĩla vandũ ĩũlũ wa nthĩ, na nĩwambatie ũkumyonĩ ĩtunĩ.

← Chapter 2 Jump to: Chapter 4 →