1 Timothy 6

Kamba (MBIVILIA ŨVOO MŨSEO)

← Chapter 5 Jump to:

1Ngombo syonthe nĩsyaĩlĩte kũnenga anene moo ndaĩa nene, nĩ kana mũndũ o na wĩva ndakaaneene ndeto nthũku ĩũlũ wa ĩsyĩtwa ya Ngai na momanyĩsyo maitũ.

2Ngombo sya anene Aklĩsto iyaĩlĩte kũmavũthya atĩ nĩkwĩthĩwa nĩmasyaanĩw'e mũĩkĩĩonĩ. Ĩndĩ nĩsyaĩlĩte kũmathũkũma nesa mbeange, nĩkwĩthĩwa ala maunawa nĩ ũthũkũmi ũsu wasyo nĩ aĩkĩĩi ala syo syendete. Manyĩsya andũ na kũmatavya maũndũ aa.

3Mũndũ ũla ũmanyĩasya ũmanyĩsyo wĩ kĩvathũkany'o, na ndekwĩtĩkĩlana na ndeto sya w'o sya Mwĩai waitũ Yesũ Klĩsto, na ũmanyĩsyo wa andũ ala me na kĩkĩo kya Ngai,

4ũsu ausũĩtwe nĩ ngathĩĩo na nde kĩndũ wĩsĩ. Mũndũ ũsu e na wendi mũthũku wa kũkananĩa, na kũkũlangya ĩũlũ wa ndeto, na ũu nũtumaa andũ makwatwa nĩ kĩwĩu, ngananĩo, kũumangana, kwĩw'anĩa woo,

5na kũkananĩsya kũtathelaa kuma kwa andũ ala me na ilĩko mbuku na mate na ũla w'o. Masũanĩaa kana mũndũ kwĩthĩwa e mũĩkĩĩi nĩ nzĩa ya kũkwata ũthwii.

6Kwa w'o mũĩkĩĩo nũtumaa mũndũ ethĩwa mũthwii, ethĩwa nĩwĩanĩawa nĩ kĩla wĩ nakyo.

7Nũndũ vai kĩndũ twaaete kũũ ĩũlũ wa nthĩ, na vai kĩndũ tũkauma kw'o nakyo.

8Kwoou ethĩwa twĩ na kya ũya na kya kwĩvw'ĩka, syĩndũ isu nĩsyaĩlĩte kũtwĩanĩa.

9Ĩndĩ ala mendaa kwĩthĩwa me athwii, nĩmalikaa motatonĩ na mailika mawendinĩ maingĩ ma kĩ-ũtumanu na mathũku, ala malikasya andũ thĩnanĩ na wanangĩkonĩ.

10Nĩkwĩthĩwa wendi wa mbesa nĩ wumo wa mĩthemba yonthe ya mothũku. Kwondũ wa kwĩthĩwa na wendi mwingĩ mũno wa mbesa, andũ amwe nĩmaekete kwĩthĩwa me aĩkĩĩi, na makalikya mathayũ moo mathĩnanĩ maingĩ.

11Ĩndĩ we mũndũ wa Ngai, ĩvathane na maũndũ asu onthe. Manthaa mũno kwĩthĩwa na ũlũngalu, kĩkĩo kya Ngai, mũĩkĩĩo, wendo, wũmĩĩsyo na wĩnyivyo.

12Ũkitaa kaũ ũla mũseo wa mũĩkĩĩo, na kwĩmanthĩa we mwene mũthĩnzĩo wa thayũ ũtathela. Nũndũ ũũ nĩw'o thayũ ũla Ngai wakwĩtĩie yĩla waneenie we mwene, wasya nĩwatw'ĩka mũĩkĩĩi ve ngũsĩ mbingĩ.

13Nĩkwĩaĩa mbee wa Ngai ũla ũnengae syĩndũ syonthe thayũ, na mbee wa Klĩsto Yesũ, ũla mwene waumisye ũkũsĩ wake mbee wa Vilato:

14Kwataa momanyĩsyo aa na kwĩkaa ũndũ mekwasya wĩ na kĩthito, nginya mũthenya wa kũka ĩngĩ kwa Mwĩai waitũ Yesũ Klĩsto.

15Kũka kũu kwake ĩngĩ kũkeethĩwa ĩvindanĩ yĩla yaĩlu yĩvangĩtwe nĩ Ngai, ũla ũkathawa na ũla weka nĩwe Mũnene, Mũsumbĩ wa asumbĩ na Mwĩai wa eaĩi.

16Nowe e weka ũtesa kũkw'a; ekalaa kyeninĩ kĩtathengeeka. Vai mũndũ waamwona, na vai mũndũ o na ũmwe ũtonya kũmwona. Kwake nĩkwĩthĩwe ndaĩa na ũsumbĩko tene na tene! Ameni.

17Kany'a andũ ala me na ũthwii wa syĩndũ sya kũũ ĩũlũ wa nthĩ, maikekathĩĩe kana kwia wĩkwatyo woo syĩndũnĩ itekwatw'a ta isu, ĩndĩ mekwatye Ngai ũla ũtũnengae syĩndũ syonthe kwa wingĩ tũitanĩae.

18Mamanyĩasye kwĩkaa maũndũ maseo, methĩwe me athwii mekonĩ maseo, me alau, na meyũmbanĩtye kũtetheeasya ala angĩ na syĩndũ syoo.

19Kwa nzĩa ĩsu makeeyiĩa ene ũthwii ũla wĩĩthĩwa kwoo ta wambĩlĩĩlyo mũlũmu wa ĩvinda yĩla yũkĩte, na ĩndĩ makeethĩwa matonya kũkwata thayũ ũla wa w'o.

20Mwa Timotheo, ĩkalaa ũsũvĩĩte kĩla wanengiwe. Ĩvathane na ndeto sya andũ matena kĩkĩo kya Ngai na ngananĩo sya ũtumanu ila andũ metaa, “Ũmanyi,” ĩndĩ ti w'o.

21Andũ amwe nĩmaneenete makasya me na ũmanyi ũsu, na kwa kĩtumi kĩu nĩmathũkĩte makauma nzĩanĩ ya ũla mũĩkĩĩo. Mumo wa Ngai nĩwĩthĩwe nenyu.

← Chapter 5 Jump to: