1 Timothy 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1Ndũkakandĩe mũtumĩa, ĩndĩ neenanasya nake ũndũ ũtonya kũneenany'a na ĩthe waku. Ĩkalanasya na anake ta ana-a-inyia maku,

2aka akũũ ta makũsyaĩte, aka ma mũika ta eĩtu-a-inyia maku, wĩ na mwĩkalo mũseo mũno wa ũtheu.

3Tetheeasya ndiwa ila kwa w'o syĩ na vata wa ũtethyo.

4Ĩndĩ ethĩwa ndiwa yĩna syana kana esũkũũe, nĩsyaĩlĩte mbee vyũ kwambĩĩa kwĩmanyĩsya kũtethya wĩa wa Ngai kwa kũsũvĩa andũ ma mĩsyĩ yoo, o vamwe na kũsũvĩa asyai o tondũ mo mamasũvĩie, nĩkwĩthĩwa ũndũ ũũ nĩ w'o ũmwendeeasya Ngai.

5Ndiwa ĩla ĩtiĩtwe yĩ yoka, ĩte na mũndũ wa kũmĩsũvĩa, yĩkwatasya Ngai na yĩkalaa ĩkĩmũvoya na kũmwĩtya ũtethyo ũtukũ na mũthenya.

6Ĩndĩ ndiwa ĩla yĩkalaa thayũ wa kũtanĩa maũndũ ma nthĩ, nĩ ngw'ũ o na kau yĩ thayũ.

7Tavya andũ onthe maũndũ asu, nĩ kana mũndũ o na wĩva ndakaneenee ndiwa naĩ.

8Ĩndĩ ethĩwa mũndũ o na wĩva ndasũvĩaa andũ ma mũsyĩ, na mũno mũno ala ma mũsyĩ wake mwene, mũndũ ũsu nũleanĩte na ũla mũĩkĩĩo, na nĩ mũthũku kwĩ ũla ũte mũĩkĩĩi.

9Ndiwa nĩtonya kũandĩkwa ĩvukunĩ ya ndiwa ethĩwa ũkũũ wayo ndwĩ ĩtheo wa myaka mĩongo thanthatũ, ĩndĩ no nginya ethĩwe aĩ kĩveti kya mũũme o ũmwe,

10na e na nguma ya meko maseo; mũndũ mũka ũeete syana syake nesa, wendete andũ, ũtetheeasya andũ e na wĩnyivyo, ũtetheeasya andũ ala me na thĩna, na wĩyumĩtye mwene kwĩka maũndũ angĩ maingĩ maseo.

11Ĩndĩ ndũkaandĩke ndiwa sya mũika ĩvukunĩ yĩu, nũndũ yĩla mekĩlw'a vinya nĩ mawendi ma mwĩĩ na mayenda kũtwawa, makaeka kũmũĩkĩĩa Klĩsto,

12na kwoou maitw'ĩka avĩtany'a nũndũ wa kũlea kwĩanĩsya wĩvĩto ũla meevĩtĩte mbeenĩ.

13Ũu wĩ o vo, nĩmakwatawa nĩ kĩmanyĩo kya kwĩthĩwa andũ atulu, na kya kũlikangaa mĩsyĩnĩ ya andũ. Na ti ũtulu w'oka ũmakwataa, ĩndĩ nĩmatw'ĩkaa andũ ma nzukũ, na mayambĩĩa kwĩlikya maũndũnĩ mate moo, makĩneenaa ndeto ila itamakonetye.

14Kwoou nyie nĩona wĩ ũseo ndiwa sya mũika ikatwawa, ikwate syana, na kũsũvĩaa mĩsyĩ yoo, nĩ kana tũikanenge amaitha maitũ mwanya wa kũtũneenea ndeto nthũku.

15Nũndũ kũvika vau, ndiwa imwe nitiĩte nzĩa ikalika maũndũnĩ ma Satani.

16Ĩndĩ ethĩwa mũndũ mũka Mũklĩsto e na ndiwa sya mũsyĩ woo wĩkalaa nasyo, nĩwaĩlĩte kwitethasya; ndakaĩkye ĩkanisa mũio ũsu, nĩ kana yĩtetheesye ndiwa ila ite na mũndũ wa kũitetheesya.

17Atumĩa ala matongoeasya ĩkanisa nesa nĩmaĩlĩte kũtuvwa nesa, na mũno mũno ala matethasya wĩa mũito wa kũtavany'a na kũmanyĩsya.

18Nũndũ Maandĩko Matheu maĩtye, “Ndũkove ng'ombe mũnuka yĩla ũũmĩtũmĩa ĩkũvũĩe nganũ kwa kũkinyanga,” na ĩngĩ makasya, “Mũthũkũmi nĩwaĩlĩte kũnengwa ĩtuvi yake.”

19Ndũkethukĩĩsye ndeto sya mũndũ ũkũweta mavĩtyo ma mũtongoi ũngĩ, vate ũkũsĩ wa andũ elĩ kana atatũ.

20Andũ ala maendeeaa na kwĩka naĩ waĩlĩte kũmakanĩsya mbee wa andũ ala angĩ, nĩ kana namo makĩe ũndũ ũsu.

21Nĩkwĩaĩa mbee wa Ngai na Klĩsto Yesũ na alaĩka atheu, ũatĩĩae mĩao ĩno. Ndũkethĩwe na kyende kana kwendeesya andũ.

22Ndũkasembeae kũtw'ĩkĩthya andũ atongoi wĩanĩ wa Ngai. Ndũkalikw'e mũambanĩ wa naĩ nĩ mũndũ; ĩyĩkalasye we mwene wĩ mũtheu.

23Ndũkanyusae o kĩw'ũ kĩ kyoka, ĩndĩ nyusaa ndivai nini ĩkaũtetheeasya mathĩnanĩ maku ma ĩvu, nũndũ wĩkalaa ũtekwĩw'a nesa mavinda kwa mavinda.

24Naĩ sya andũ amwe syĩ ũtheinĩ, iyonany'a ũsilĩlo woo o na mbee wa mũthenya wa ũsilĩlo ũtanamba kũvika; naĩ sya andũ angĩ nasyo syĩsaa kumĩla o ĩtina.

25O ta ũu meko maseo o namo nĩmonekaa ũtheinĩ, na o na ala matanamba kwoneka mayĩkalaa mũno mataumĩlĩte.

← Chapter 4 Jump to: Chapter 6 →