1 Timothy 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Veva wa Ngai aneenete vyũ kana andũ amwe makauma ũla mũĩkĩĩonĩ ĩvindanĩ ya mũminũkĩlyo; makaeka kwĩthĩwa na mũĩkĩĩo nũndũ wa kwĩthukĩĩsya maveva ala makenganaa, na kwĩthukĩĩsya momanyĩsyo ma maimũ.

2Momanyĩsyo ma mũthemba ũsu manyaĩĩkaw'a nĩ andũ me ũvũngũ, ala wasya wa ngoo syoo nĩ mũkw'ũ ta mũvĩvye na kyũma kĩ mwaki.

3Andũ asu mamanyĩasya kana nĩ mavĩtyo kũtwaana na kũya mĩthemba mĩna ya malĩu. Ĩndĩ Ngai oombie malĩu asu nĩ kana ĩtina wa mboya sya kũtũnga mũvea, maĩsawe nĩ ala maminĩte kũĩkĩĩa na kũmanya ũla w'o.

4Nũndũ syĩndũ syonthe ila Ngai woombie nĩ nzeo, na vai kĩmwe kyaĩlĩte kũlewa, ethĩwa nĩkĩkwoswa na mboya sya kũtũnga mũvea.

5Nĩkwĩthĩwa ndeto ya Ngai vamwe na mboya ĩsu nikĩtheasya kĩkethĩwa kĩ kyaĩlu kwa kũĩwa.

6Ethĩwa ũkamanyĩsya aĩkĩĩi maũndũ asu, ũkeethĩwa wĩ mũthũkũmi mũseo wa Klĩsto Yesũ, ũendee kwakĩka mwene kĩ-veva na ndetonĩ sya mũĩkĩĩo, na momanyĩsyo ma w'o ala wĩthĩĩtwe ũiatĩĩa.

7Ekana na ngewa ite sya kĩkĩo kya Ngai. Ĩmanyĩsye mwene kwĩkalaa mwĩkalo wĩ na kĩkĩo kya Ngai.

8Momanyĩsyo ma kwaka mwĩĩ me vata wamo, ĩndĩ momanyĩsyo ma kwakĩka kĩ-veva me vata mũno maũndũnĩ onthe, nũndũ matwathaa maũndũ ma ĩvinda yĩĩ na yĩla yĩkoka.

9Ndeto ii nĩ sya w'o na nĩsyaĩlĩte kwĩtĩkĩlwa na kũĩkĩĩwa vyũ.

10Kwoou nĩtũtethasya wĩa mũito na wĩ mĩnoo mũno, nĩkwĩthĩwa twiĩte wĩkwatyo witũ vala ve Ngai ũla wĩ thayũ, ũla nĩwe Mũtangĩĩi wa andũ onthe, na mũno mũno ala mamũĩkĩĩaa.

11Matavye na kũmamanyĩsya maũndũ asu.

12Ndũketĩkĩle kũvũthw'a nĩ mũndũ o na wĩva nĩkwĩthĩwa we wĩ mũndũ wa mũika, ĩndĩ ĩthĩwa wĩ ngelekany'o kwa aĩkĩĩi mũneenelenĩ waku, mwĩkalonĩ, wendonĩ, mũĩkĩĩonĩ, na ũtheunĩ.

13Ĩyumye ũtũmĩae ĩvinda yaku kwa kũsomeaa andũ Maandĩko Matheu, kũtavany'a, na kũmanyĩsya kũvika yĩla nĩũka.

14Ndũkaeke kũtũmĩa mũthĩnzĩo wa kĩ-veva ũla wĩ nthĩnĩ waku, naw'o wanengiwe kwa nzĩa ya wathani na atumĩa makwilĩĩla moko moo.

15Ĩkaa maũndũ asu wĩnenganĩte we mwene na kũmeanĩsya vyũ, nĩ kana andũ onthe mone ũendee nesa.

16Ĩsũvĩe mwĩkalonĩ waku mwene na momanyĩsyonĩ maku. Kwataa maũndũ asu onthe kĩla ĩvinda, nũndũ ethĩwa we ũkeekaa ũu, ũkeetangĩĩa we mwene o vamwe na andũ ala makwĩthukĩĩasya.

← Chapter 3 Jump to: Chapter 5 →