Ezra 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Yĩla mwei wa mũonza wavikie, na andũ ma Ĩsilaeli meethĩwa manamina kũtũa ndũanĩ syoo, onthe nĩmoombanie vamwe ndũanĩ ya Yelũsalemu.

2Nĩvo ĩndĩ Yesua mwana Yosataki, na athembi ala angĩ o vamwe na Nzelũvaveli mwana wa Sealitieli, vamwe na andũ ma mũsyĩ wake mambĩĩie kwaka kĩthembeo kya Ngai wa Ĩsilaeli. Meekie ũu nĩ kana mathembee nthembo sya kũvĩvw'a kĩthembeonĩ kĩu, o tondũ kũandĩkĩtwe mĩaonĩ ya Mwose mũndũ wa Ngai.

3Maakie kĩthembeo kĩu vandũnĩ o vala kyaĩ mbeenĩ, nũndũ nĩmakĩaa andũ ala matwĩe nthĩ ĩsu. Nĩvo ĩndĩ mambĩĩie kũthembea Mwĩai Ngai nthembo sya kũvĩvw'a kĩthembeonĩ kĩu kĩla mũthenya kwakya na wĩoo.

4Nĩmatanĩie Mboka ya Tũsũmba twa Matũ kwĩanana na motw'ĩo mayo; kĩla mũthenya mathembaa nthembo ila itw'ĩtwe ithembawe mũthenya ũsu.

5O vamwe na ũu nĩmathembaa nthembo sya kũvĩvw'a ila ithembawa mavindanĩ ala matw'ĩtwe, na ila ithembawa ĩvindanĩ ya Mboka ya Kũtisa kwa Mwei, na ila syumaw'a mavindanĩ onthe ala andũ ma Ĩsilaeli mathĩĩwe kũmbana nĩ kana mathaithe Ngai. O ta ũu nĩmathembeaa Mwĩai Ngai nthembo sya kumya na ngoo ya kwenda.

6Mũthenyanĩ wa mbee wa mwei wa mũonza nĩw'o mambĩĩie kumĩsya Mwĩai Ngai nthembo sya kũvĩvw'a, o na vala mũsingi wa Ĩkalũ ndwaĩ ũnamba kwambĩĩa kwakwa.

7Andũ nĩmanengie aki ma mavia na ala maseũvasya syĩndũ sya mbwaũ mbesa, na manenga andũ ma Sitoni na ma Tile lĩu, syĩndũ sya kũnyw'a, na mauta nĩ kana maete iting'ĩ sya mĩtĩ ya mĩkũũ kuma Levanoni nginya Yova, masyĩsĩlĩtye ũkanganĩ, o tondũ Kulusu mũsumbĩ wa Velisia wanenganĩte mwanya kwĩkwe.

8Kwoou mweinĩ wa kelĩ wa mwaka wa kelĩ, ĩtina wa andũ ma Ĩsilaeli masyoka vala Ĩkalũ yaakĩtwe, wĩa nĩwambĩĩie. Nzelũvaveli mwana wa Sealitieli, Yesua mwana wa Yosataki na andũ ala angĩ moo, athembi na Alivai na andũ onthe ala masyokete Yelũsalemu kuma kũla matavĩtwe makatwawa nĩmatetheanĩisye wĩa ũsu. Alivai onthe ala maĩ na ũkũũ wa myaka mĩongo ĩlĩ na mbee, nĩmo manengiwe wĩa wa kũũngamĩa kwakwa ĩngĩ kwa Ĩkalũ.

9Yesua na ana make vamwe na andũ ma mũsyĩ wake, Katimieli na ana make, ala nĩ nzyawa sya Otavia nĩmakwatanĩie wĩa wa kũũngamĩa kwakwa ĩngĩ kwa Ĩkalũ. Nĩmatetheeiw'e nĩ Alivai ma mũsyĩ wa Enatati me na ana moo na andũ ma mũsyĩ woo.

10Yĩla aki mambĩĩie kwaka mũsingi wa Ĩkalũ, athembi mekĩĩte ngũa ntheu sya kĩ-ũthaithi, nĩmeevangie mataĩe Ngai na masoo, namo Alivai na ana ma Asavu matũmĩa masaya mataĩe Mwĩai Ngai, kwĩanana na motw'ĩo ala manenganĩtwe tene nĩ Mũsumbĩ Ndeviti.

11Nĩmainĩie Mwĩai Ngai mbathi sya kũmũtaĩa na kũmũtũngĩa mũvea maisyokeleela kĩtĩkĩĩsyo kĩĩ: “Mwĩai Ngai nĩ mũseo, na wendo wake ũtaolekaa kwa andũ ma Ĩsilaeli nĩwĩkalaa tene na tene.” Andũ onthe nĩmataĩie Mwĩai Ngai na wasya mũnene nũndũ mũsingi wa Ĩkalũ nĩwambĩĩie kwakwa.

12Ĩndĩ aingĩ ma athembi ala akũũ na Alivai ala akũũ, vamwe na atongoi ala akũũ ma mĩsyĩ, ala moonete Ĩkalũ yĩla yaĩ ya mbee nĩmaĩie na wasya mũnene moona mũsingi wa Ĩkalũ yĩu ũyakwa, ĩndĩ angĩ aingĩ mookĩlya wasya wa ũtanu.

13Vai mũndũ waĩ atonya kũvathũkany'a wasya wa ũtanu na wasya wa ala maĩaa, nũndũ andũ malonzanĩtye mũno. Wasya ũsu nĩweew'ĩkaa vaasa mũno.

← Chapter 2 Jump to: Chapter 4 →