Ezra 9

Kamba (MBIVILIA ŨVOO MŨSEO)

← Chapter 8 Jump to: Chapter 10 →

1Ĩtina wa maũndũ asu, atongoi ma andũ ma Ĩsilaeli nĩmookie vala nĩĩ na mambĩa atĩĩ, “Andũ ma Ĩsilaeli, athembi na Alivai mayaaĩvathana na andũ ala matũanĩe namo, ala mekaa maũndũ ma kũthatya namo nĩ Akanaani, Aititi, Avelisi, Ayevusi, Aamimoni, Amoavi, andũ ma Misili na Aamoli.

2Nĩmatwaĩte amwe ma eĩtu moo na o ta ũu makatwaĩa ana moo eĩtu kuma andũnĩ asu. Kwa kwĩka ũu nĩmavulanĩtye mbaĩ ntheu na andũ ma nthĩ isu. Atongoi na anini moo nĩmo matongoesye andũ kwĩka ũthũku ũsu.”

3Yĩla neewie ũvoo ũsu, nĩnatembũie ngũa syakwa nũndũ wa kyeva, nakũanga nzw'ĩĩ sya mũtwe wakwa na kĩng'ew'a kyakwa na nekala nthĩ nĩsaanĩw'e mũno.

4Andũ onthe ala matelemile nũndũ wa maũndũ ala Ngai wa Ĩsilaeli waisye ĩũlũ wa naĩ sya andũ ala masyokie kuma kũla matwaĩtwe me atave nĩmanthyũlũlũkĩte. Nekalile vau nĩ na kyeva kingĩ nginya saa ila nthembo ya ĩa mawĩoo yumaw'a.

5Saa sya kũthemba nthembo ya ĩa mawĩoo syavika nĩnookĩlile nauma vala nekalĩte nĩ na kyeva, ngũa syakwa syĩ ndembũkangu. Nĩnatulilye ndu na natambũũkĩsya Mwĩai Ngai, Ngai wakwa moko makwa,

6na navoya ndyasya atĩĩ, “Ame Ngai wakwa, nĩĩw'a nthoni mbingĩ na nĩngũsonoka kũkĩlya ũthyũ wakwa nĩ mbee waku. Nũndũ naĩ sitũ nĩ ndũlu ikavĩtũka mĩtwe yaitũ, syambatĩte ikathi kũtina matunĩ.

7Kuma ĩvindanĩ ya aaũmae maitũ kũvika ũmũnthĩ, ithyĩ andũ maku nĩtũvĩtĩtye mũno. Nũndũ wa naĩ sitũ ithyĩ, asumbĩ maitũ, na athembi maitũ twĩthĩĩtwe twĩ ungu wa ũtonyi wa asumbĩ ma nthĩ ingĩ. Nĩtũaĩtwe, tũkoyĩwa, na tũkakwatwa tũkatwawa nthĩ ya ũeninĩ twĩ ove. Kũvika o na ũmũnthĩ, twĩkĩĩthĩtw'e nthoni mũno vyũ.

8Ĩndĩ yu, kwa kavinda kanini, ame Mwĩai Ngai, Ngai waitũ, nũtũnengete mumo na ũkatuma amwe maitũ mavonoka kuma ũkombonĩ, na tũkekala twĩ asũvĩĩku vandũnĩ vaa vatheu. Nũtwovoetye kuma ũkombonĩ na ũkatũnenga thayũ mweũ.

9Twaĩ ngombo ĩndĩ we Ngai waitũ ndwaatũeka ũkombonĩ; nũtwonetye wendo waku ũla ũtaolekaa. Nĩwatumie asumbĩ ma Velisia matwĩka nesa, na maeka tũendee kwĩthĩwa twĩ thayũ, na tũyaka ĩngĩ Ĩkalũ yaku yĩla yaĩ yanange, na o ta ũu nũtumĩte tũka kwĩvitha kũũ Yuta na Yelũsalemu.

10“Ĩndĩ yu ame Ngai waitũ, twĩasya ata ĩtina wa maũndũ asu onthe kwĩkĩka? Nĩtũleete ĩngĩ kũatĩĩa mĩao yaku,

11ĩla watũnengie kwĩsĩla kwa athũkũmi maku athani. Nĩmatũtavisye kana nthĩ ĩla twaendete kũtũa yaĩ nthĩ mbuku, nũndũ andũ ala matwĩe vo nĩmamyusũĩtye maũndũ mathũku ma ũvuku, kuma ngalĩko ĩmwe kũthi kũvika ĩla ĩngĩ.

12Nĩmatwĩie tũikaatate kwĩtĩkĩlya eĩtu maitũ matwawe nĩ ana moo, kana kwĩtĩkĩlya ana maitũ matwae eĩtu moo, na o ta ũu tũikaatate kũmatetheesya maendee nesa, nĩ kana twĩthĩwe na ũtonyi na tũiya ũsyao wa nthĩ ĩsu, na kũmĩtiĩa ana maitũ yĩthĩwe ng'ũndũ yoo tene na tene.

13O na ĩtina wa maũndũ onthe ala matũkwatĩte ta ũkany'o nũndũ wa naĩ na mothũku maitũ, nĩtwĩsĩ kana we Ngai waitũ ũtũkanĩtye vanini mbee wa ũndũ twaĩlĩte kũkanw'a, na nũekete amwe maitũ tũendee kwĩkala thayũ.

14Tũtonya ata kũlea kũatĩĩa mĩao yaku ĩngĩ, na kũtwaana na andũ aa mekaa maũndũ mathũkĩte ũu? Tweeka ũu, we Ngai ndũũthatw'a mũno nĩ ithyĩ na ũitwananga vyũ na kũlea kũeka mũndũ o na ũmwe atiale?

15Ame Mwĩai Ngai, Ngai wa Ĩsilaeli, wĩ mũlũngalu, ĩndĩ yu nũtũekete ithyĩ ala tũtaakw'ĩĩa nthĩ ya ũeninĩ. Twĩ vaa mbee waku twĩ na mavĩtyo maitũ, o na vala nũndũ wa mavĩtyo maitũ, vai mũndũ waĩlĩte kũũngama mbee waku.”

← Chapter 8 Jump to: Chapter 10 →