Ezra 7

Kamba (MBIVILIA ŨVOO MŨSEO)

← Chapter 6 Jump to: Chapter 8 →

1Ĩvinda yĩana ũndũ mũna yavĩtũka, yĩla Alitasasita wasumbĩkĩte Velisia, kwaĩ mũndũ ũmwe weetawa Esala. Esala aĩ mwana wa Selaia, Selaia mwana wa Asalia, Asalia mwana wa Ilikia,

2Ilikia mwana wa Salumu, Salumu mwana wa Nzatoki, Nzatoki mwana wa Aituvu,

3Aituvu mwana wa Amalia, Amalia mwana wa Asalia, Asalia mwana wa Melaiothi,

4Melaiothi mwana wa Nzelaia, Nzelaia mwana wa Ũsisi, Ũsisi mwana wa Mbuki,

5Mbuki mwana wa Avisua, Avisua mwana wa Vineasi, Vineasi mwana wa Eleasali, Eleasali mwana wa Mũthembi Mũnene Alũni.

6Esala ookie Yelũsalemu aumĩte Mbavilonĩ. Aĩ mũmanyĩsya wa mĩao wĩsĩ nesa vyũ Mĩao ya Mwose ĩla Mwĩai Ngai, Ngai wa Ĩsilaeli wanenganĩte. Mũsumbĩ nĩwanengete Esala syĩndũ syonthe ila weetasya nũndũ Mwĩai Ngai, Ngai wa Esala nĩwamũathimĩte.

7O ta ũu amwe ma andũ ma Ĩsilaeli, ala nĩ vamwe na athembi, Alivai, aini, asikalĩ ala masungaa Ĩkalũ, na athũkũmi ma Ĩkalũnĩ o namo nĩmaendie Yelũsalemu mwakanĩ wa mũonza wa kũsumbĩka kwa Alitasasita.

8Esala avikie Yelũsalemu mweinĩ wa katano, wa mwaka wa mũonza wa kũsumbĩka kwa Alitasasita.

9Ambĩĩie kyalo kyake kuma mũthenyanĩ wa mbee wa mwei wa mbee, na avika Yelũsalemu mũthenyanĩ wa mbee mwei wa katano, nũndũ Ngai wake nĩwamũtetheeisye.

10Esala eeyumĩtye thayũnĩ wake w'onthe asome mĩao ya Mwĩai Ngai, ekae ũndũ ĩkwasya, na aimanyĩasya andũ ma Ĩsilaeli motw'ĩo na myamũlo yake.

11Ũũ nĩw'o valũa ũla Mũsumbĩ Alitasasita wanengie mũthembi Esala, ũla waĩ mũmanyĩsya wa mĩao, na weesĩ nesa vyũ mĩao na motw'ĩo ala Mwĩai Ngai wanengie Ĩsilaeli:

12“Kuma kũla nĩĩ nyie Mũsumbĩ Alitasasita, kwaku mũthembi Esala, mũmanyĩsya wa mĩao ya Ngai wa Ĩtunĩ, nĩnakũkethya.

13“Nĩngumya mwĩao kana nthĩnĩ wa ũsumbĩ wakwa, mũndũ o na wĩva wa Ĩsilaeli, kana athembi moo kana Mũlivai ũla wĩ nthĩnĩ wa ũsumbĩ wakwa, enda kũsyokany'a naku Yelũsalemu, nũtonya kwĩka ũu.

14Nyie vamwe na atai makwa mũonza twĩkũtũma ũthi ũkamanye kĩla kĩendee Yelũsalemu na Yuta, nĩ kana wone kana Mwĩao wa Ngai waku ũla ũnanengetwe kana nũendee kwĩanĩw'a.

15O ta ũu, kua thaavu na silĩva w'onthe ũla nyie na atai makwa, twaumĩisye Ngai wa Ĩsilaeli ũla ũtũaa Yelũsalemu. Twaumisye thaavu na Silĩva ũsu na ngoo ya kwenda.

16Kua thaavu na silĩva w'onthe ũla ũkwosa kĩsionĩ kya nthĩ ya Mbavilonĩ, o vamwe na nthembo syumĩtw'e na ngoo ya kwenda, ila andũ ma Ĩsilaeli na athembi mekumya kwondũ wa Ĩkalũ ya Ngai woo yĩla yĩ Yelũsalemu.

17“Tũmĩa mbesa isu nesa na ũithooa tũsalũ, ndũũme na tũtena tũũme twa malondu, nthembo ya ngetha ya mbaa mbeke, na nthembo ya kũnyuwa ya ndivai, na ũyĩithembea kĩthembeonĩ kya Ĩkalũ ya Ngai wenyu yĩla yĩ Yelũsalemu.

18Nũtonya kũtũmĩa thaavu na silĩva ũla ũũtiala kwĩka ũndũ we wĩ na andũ maku mũkwona wĩ waĩlu, kwĩanana na kwenda kwa Ngai wenyu.

19Twaĩa Ngai waku ũla wĩ Yelũsalemu mĩio yonthe ĩla wanengwa ya kũtũmĩwa kwondũ wa kũthũkũma Ĩkalũnĩ.

20Osa syĩndũ ila ingĩ ũkwĩthĩwa ũyenda kwondũ wa Ĩkalũ ya Ngai waku kuma kĩnandũnĩ kya kĩ-ũsumbĩ.

21“Nĩngwĩaĩa aii ma inandũ, ala me kĩsionĩ kya nthĩ kĩla kĩ ngalĩko ya ũthũĩlonĩ wa syũa ya Ũsĩ wa Euvalati manenge mũthembi Esala, mũmanyĩsya wa Mĩao ya Ngai ũla wĩ Ĩtunĩ syĩndũ syonthe ila ũkwenda.

22Kĩla mũũmũnenga kĩikavĩtũke silĩva wa kĩlo ngili itatũ na maana ana, nganũ kĩlo ngili ĩkũmi, ndivai lita ngili ilĩ, mauta lita ngili ilĩ. Mũnengei mũnyũ wĩana ũndũ ũkwenda.

23No nginya mũnenge Ngai wa Ĩtunĩ kĩla ũkwenda kwondũ wa Ĩkalũ yake. Kwoou sisyai ndakese kũthata nũndũ wakwa, kana nũndũ wa asumbĩ ala makethĩwa ĩtina wakwa.

24Nĩmwavatwa kwosa koti, mũvothi kana ĩelo kuma kũla kwĩ athembi, Alivai, aini, asikalĩ ma mĩomonĩ ya Ĩkalũ, athũkũmi ma Ĩkalũ kana mũthũkũmi ũngĩ o na wĩva ũla wĩ Ĩkalũnĩ yĩu ya Ngai.

25“Naku we Esala, ũitũmĩa ũĩ ũla Ngai waku ũkũnengete, nyuva andũ ma kumya ũtw'ĩo na asili, ala matonya kũsilany'a andũ onthe ala me kĩsionĩ kya nthĩ kĩla kĩ ngalĩko ya ũthũĩlonĩ wa syũa ya Ũsĩ wa Euvalati, na maatĩĩaa Mĩao ya Ngai waku. Manyĩsya mĩao ĩsu andũ onthe ala matamĩsĩ.

26Mũndũ o na wĩva ũla ũtekũatĩĩa mĩao ya Ngai waku na mĩao ya mũsumbĩ, nĩakanw'e kwa kũawa, kana kumw'a nthĩ yake, kana kwosewa ũthwii wake kana kwovwa yela.”

27Esala nĩwaneenie asya atĩĩ, “Nĩataĩwe Mwĩai Ngai, Ngai wa aaũmae maitũ, ũla ũtumĩte ũndũ ta ũsu wa kũnenga Ĩkalũ ya Mwĩai Ngai yĩla yĩ Yelũsalemu ndaĩa wĩthĩwa ngoonĩ ya mũsumbĩ.

28Mumo wa Ngai nĩwatuma mũsumbĩ, atai make, vamwe na anini make ala me ũtonyi mambĩka nesa. Mwĩai Ngai, Ngai wakwa nũtumĩte nĩthĩwa na ũkũmbaũ, na ngethĩwa nĩtonya kwĩsũva atongoi aingĩ ma mbaĩ sya Ĩsilaeli tũsyokany'e.”

← Chapter 6 Jump to: Chapter 8 →