Ezra 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1Ĩvindanĩ yĩu, mwathani Akai na mwathani Nzekalia mwana wa Ito, nĩmathanĩie Ayuti ala matwĩe Yuta na Yelũsalemu ĩsyĩtwanĩ ya Ngai wa Ĩsilaeli, ũla waĩ vamwe namo.

2Yĩla Nzelũvaveli mwana wa Sealitieli, na Yesua mwana wa Yosataki meewie wathani ũsu, nĩmambĩĩie kwaka ĩngĩ Ĩkalũ yĩla yaĩ Yelũsalemu. Athani asu elĩ nĩmamatetheeisye.

3Ũu ũendee, ngavana Tatanai wa kĩsio kya nthĩ kĩla kĩ ngalĩko ya ũthũĩlonĩ wa syũa ya Ũsĩ wa Euvalati, Sethali-mbosenai na andũ ala maĩ ngwatanĩo namo, nĩmaendie Yelũsalemu na mamakũlya atĩĩ, “Mwĩaĩiwe nũũ mwake ĩngĩ Ĩkalũ yĩĩ na kũyĩminũkĩlya?”

4O ta ũu nĩmamakũlilye masyĩtwa ma aũme ala maakaa mwako ũsu.

5Ĩndĩ Ngai nĩwasũvĩaa atongoi ma Ayuti, na kwoou atongoi asu ma Velisia mayaamavata kũendeea kwaka. Atongoi asu ma Velisia matwie kana meamba kũandĩkĩa Mũsumbĩ Ndalio valũa, na mayeteela amasũngĩe.

6Ũũ nĩw'o valũa ũla Tatanai mũtongoi wa kĩsio kĩla kĩ mũingo wa Ũsĩ wa Euvalati, Sethali-mbosenai na andũ ala maĩ ngwatanĩo nake, na maĩ kĩsionĩ kĩla kĩ mũingo wa Ũsĩ wa Euvalati maandĩkĩie Mũsumbĩ Ndalio;

7nĩmamũtũmĩie ũtũmani ũandĩkĩtwe ũũ: “Mũsumbĩ Ndalio, mũuo nĩwĩthĩwe naku.

8Mũnene, manya kana nĩtũnaendie kĩsionĩ kya nthĩ ya Yuta na tweethĩa Ĩkalũ ya Ngai ũla wĩ ũtonyi yĩendee kwakwa ĩngĩ na mavia manene, na ituĩ sya mĩtĩ ikaũngamw'a ngũtanĩ. Wĩa ũsu wĩtethw'a na ũĩ mwingĩ na nũendee nesa mũno.

9Nĩtũnakũlilye atongoi ma andũ asu matũtavye ũla ũnameaĩie make Ĩkalũ yĩu ĩngĩ na maiyĩminũkĩlya.

10O ta ũu nĩtũnamakũlilye masyĩtwa moo nĩ kana tũkũtavye atongoi ma wĩa ũsu nĩ aaũ.

11“Manatũsũngĩie matwĩa atĩĩ, ‘Twĩ athũkũmi ma Ngai wa ĩtu na nthĩ, na twĩaka ĩngĩ Ĩkalũ yĩla yaakiwe na yaminwa myaka mingĩ mĩthelu nĩ mũsumbĩ wĩ nguma wa Ĩsilaeli.

12Ĩndĩ nũndũ aaũmae maitũ nĩmathatisye Ngai wa Ĩtunĩ, nĩwatumie masindwa nĩ Mũsumbĩ Nevukatinesa wa Mbavilonĩ, ũla waĩ Mũkalitei. Ĩkalũ yĩu nĩyaanangiwe na andũ matwawa nthĩ ya Mbavilonĩ me atave.

13Ĩndĩ Mũsumbĩ Kulusu wa Mbavilonĩ nĩweeaie Ĩkalũ yĩu yakwe ĩngĩ mwakanĩ wa mbee wa kũsumbĩka kwake.

14O na nĩwatũngie mĩio ya Ĩkalũ ya thaavu na Silĩva. Mĩio ĩsu nĩ ĩla Nevukatinesa waumĩtye Ĩkalũnĩ ya Yelũsalemu, na akamia ĩkalũnĩ ya Mbavilonĩ. Mũsumbĩ Kulusu aumisye mĩio ĩsu ĩkalũnĩ yĩla yaĩ Mbavilonĩ, na amĩnenga mũndũ ũmwe weetawa Sesivasali, ũla wanyuvĩte atw'ĩke ngavana wa kĩsio kya Yuta.

15Kulusu eeie Sesivasali ose mĩio ĩsu amĩtũnge Ĩkalũnĩ ya Yelũsalemu na ayaka Ĩkalũ yĩu ĩngĩ vala yaĩ mbeenĩ.

16Kwoou Sesivasali nĩwookie na aaka mũsingi wa Ĩkalũ. Wĩa wa kwaka wĩthĩĩtwe ũendee kuma ĩvinda yĩu kũvika ũmũnthĩ, na o na yĩinamba kũthela.’

17“Yu ĩndĩ we mũsumbĩ, ethĩwa nũkwona wĩ waĩlu nĩkũmanthwe mavukunĩ ma kĩ-ũsumbĩ Mbavilonĩ, kana Kulusu nĩwaumisye mwĩao Ĩkalũ yĩĩ ya Yelũsalemu yakwe ĩngĩ, na ĩndĩ ũitũtavya wĩenda kwĩkwe ata ũndũnĩ ũsu.”

← Chapter 4 Jump to: Chapter 6 →