Ezra 6

Kamba (MBIVILIA ŨVOO MŨSEO)

← Chapter 5 Jump to: Chapter 7 →

1Nĩvo ĩndĩ Mũsumbĩ Ndalio waumisye mwĩao kũmanthwe nyũmbanĩ ĩla yaiawa mavuku ĩla yaĩ Mbavilonĩ, na yaĩ mavuku maandĩkĩtwe maũndũ ma Kĩ-ũsumbĩ.

2Nĩveethĩiwe ĩvuku ĩkũnze ndũanĩ nene ya Ekivatana ĩla yĩ kĩsionĩ kya nthĩ ya Metia. Ĩvuku yĩu yaandĩkĩtwe ũũ:

3“Mwakanĩ wa mbee wa kũsumbĩka kwa Mũsumbĩ Kulusu, mũsumbĩ nĩwaumisye mwĩao Ĩkalũ ya Yelũsalemu yakwe ĩngĩ, na yĩyĩthĩwa neyo vandũ va kumĩsya na kũvĩvĩsya nthembo. Ĩkalũ yĩu nĩyĩthĩwe na ũasa wa mita mĩongo ĩlĩ na mũonza na ũthanthau wa mita mĩongo ĩlĩ na mũonza.

4Ngũta sya Ĩkalũ yĩu syĩakwa ta ũũ: Mũthĩa ũmwe wa mbwaũ nũatĩĩwe nĩ mĩthĩa ĩtatũ ya mavia. Mbesa sya kwaka Ĩkalũ yĩu nĩsyumw'e kĩnandũnĩ kya kĩ-ũsumbĩ.

5O ta ũu mĩio yonthe ya thaavu na ya silĩva, ĩla Mũsumbĩ Nevukatinesa waetie Mbavilonĩ kuma Ĩkalũnĩ ya Yelũsalemu, no nginya ĩtũngwe Ĩkalũnĩ Yelũsalemu. Kĩla mũio nĩwiwe vala waĩlĩte kwiwa.”

6Mũsumbĩ Ndalio nĩwasũngĩie ũũ: “Kwa Tatenai ngavana wa kĩsio kya nthĩ kĩla kĩ ngalĩko ya ũthũĩlonĩ wa syũa ya Ũsĩ wa Euvalati, vamwe na Sethali-mbosenai na ala mwĩ ngwatanĩo namo ma kĩsio kya nthĩ kĩla kĩ ngalĩko ya ũthũĩlonĩ wa syũa ya Ũsĩ wa Euvalati, “Ĩvetangei vaasa.

7Mũikatate kũthokoa wĩa wa kwaka nyũmba ĩsu ya Ngai. Ekai ngavana wa Yuta na atongoi ma Ayuti make ĩngĩ nyũmba ĩsu ya Ngai.

8Yu nĩngũmwĩaĩa mũmatetheesye kwaka Ĩkalũ ĩngĩ. Maĩvwe mbesa ila meũtũmĩa syonthe kuma kĩnandũnĩ kya kĩ-ũsumbĩ; kotinĩ ũla wumĩtw'e nĩ andũ ala matwĩe ngalĩko ya ũthũĩlonĩ wa syũa ya Ũsĩ wa Euvalati nĩ kana wĩa ũsu ndũkaũngame.

9Kĩla mũthenya vate kũtĩĩa no nginya mũnenge athembi ala me Yelũsalemu kĩndũ kyonthe kĩla mamwĩa nĩmekwenda: Tũsalũ, ndũũme kana malondu ma nthembo sya kũvĩvw'a sya Ngai wa Ĩtunĩ. O ta ũu manengwe nganũ, mũnyũ, ndivai na mauta.

10Ũndũ ũsu ũkeekawa nĩ kana athembi maumye nthembo syĩtĩkĩlĩtwe nĩ Ngai wa Ĩtunĩ, na maimboyea Ngai angathime, na aiathima ana makwa.

11O vamwe na ũu nĩngwĩaa kana ethĩwa ve mũndũ o na wĩva ũkũalyũla ũtw'ĩo ũũ, kĩtuĩ kya mũtĩ kĩkũwe nyũmbanĩ yake, kyasũvw'e mũthya ũmwe na ĩndĩ aitonyeew'a vo. Nũndũ wa ĩvĩtyo yĩu nyũmba ya mũndũ ũsu ĩtw'ĩkĩthw'e kĩvumbu kya mavuti.

12Ngai ũla wanyuvie Yelũsalemu vethĩwe vandũ vake va kũthaithĩawa, nĩavalũkye mũsumbĩ kana nthĩ ĩla yĩleana na ũtw'ĩo ũũ, na kũtata kwananga Ĩkalũ yĩu yĩ Yelũsalemu. Nyie Ndalio nĩneeyĩaa. Mwĩao wakwa nĩwĩanĩw'e vyũ.”

13Nĩvo ĩndĩ ngavana Tatenai, Sethali-mbosenai na ala maĩ ngwatanĩo namo, meekie maũndũ onthe ala mũsumbĩ weeaĩte.

14Kwoou atongoi ma Ayuti nĩmaakie Ĩkalũ na maendeeaa nesa, maithangaaw'a nĩ wathani wa mwathani Akai na wa mwathani Nzekalia mwana wa Ito. Nĩmaminie kwaka Ĩkalũ o tondũ meeaĩwe nĩ Ngai wa Ĩsilaeli na makeaĩwa nĩ Kulusu, Ndalio na Alitasasita ala maĩ asumbĩ wa Velisia.

15Maminie kwaka Ĩkalũ mũthenyanĩ wa katatũ, mweinĩ wa ĩkũmi na ilĩ, ũla nĩw'o wĩtawa Atali, mwakanĩ wa thanthatũ wa kũsumbĩka kwa Ndalio.

16Nĩvo ĩndĩ andũ ma Ĩsilaeli, athembi, Alivai na andũ onthe ala masyokie kuma kũla matavĩtwe makatwawa, matanĩie kũvathwa kwa nyũmba ya Ngai.

17Kwondũ wa kũvatha nyũmba ĩsu ya Ngai nĩmathembie tũsalũ ĩana, ndũũme maana elĩ, na tũtena twa malondu maana ana. O ta ũu nĩmathembie nthenge ĩkũmi na ilĩ syĩthĩwe nthembo kwondũ wa ũekeo wa naĩ; nthenge ĩmwe kwondũ wa kĩla mbaĩ ya Ĩsilaeli.

18O ta ũu nĩmavangie athembi na Alivai kwondũ wa kũthũkũma Ĩkalũnĩ Yelũsalemu, maatĩĩe motw'ĩo ala maandĩkĩtwe ĩvukunĩ ya Mwose.

19Andũ ala masyokie kuma kũla matavĩtwe makatwawa, nĩmatanĩie Mboka ya Vasaka mũthenyanĩ wa ĩkũmi na inya mweinĩ wa mbee.

20Athembi na Alivai onthe nĩmeetheetye na makethĩwa me atheu kwĩanana na mĩao ya kĩ-ũthaithi. Alivai nĩmooaie kalondu ka Vasaka kwondũ wa andũ onthe ala masyokete kuma kũla matavĩtwe makatwawa, kwondũ wa athembi, na kwondũ woo ene.

21Kwoou andũ ma Ĩsilaeli onthe ala masyokie kuma kũla matwaĩtwe me atave nĩmaĩe nthembo ĩsu. Mamĩĩe me vamwe na andũ onthe ala maekanĩte na mwĩkalo wa andũ ma mbaĩ ingĩ, ala matwĩe nthĩ ĩsu na makambĩĩa kũthaitha Mwĩai Ngai, Ngai wa Ĩsilaeli.

22Nĩmatanĩie Mboka ya Mĩkate ĩte Mbota vandũ va ĩvinda ya mĩthenya mũonza. Maĩ na ũtanu mwingĩ nũndũ Mwĩai Ngai nĩwatumĩte mũsumbĩ wa Asuli ethĩwa e mũseo kwoo, nĩ kana amatetheesye wĩanĩ wa kwaka ĩngĩ Ĩkalũ ya Ngai wa Ĩsilaeli.

← Chapter 5 Jump to: Chapter 7 →