Ezra 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Yĩla amaitha ma andũ ma mbaĩ ya Yuta na ma mbaĩ ya Mbengyameni meewie kana andũ ala masyokie kuma kũla matwaĩtwe me atave, nĩmekwakĩa Mwĩai Ngai, Ngai wa Ĩsilaeli Ĩkalũ,

2nĩmaendie kũla kwĩ Nzelũvaveli na kũla kwĩ atongoi ma mĩsyĩ na mamea atĩĩ, “Ekai tũmũtetheesye kwaka Ĩkalũ. Tũthaithaa Ngai wenyu o ũndũ mũmũthaithaa, na twĩthĩĩtwe tũithembea Ngai ũsu kuma ĩvinda ya Esaliatoni mũsumbĩ wa Asuli ũla watũetie vaa.”

3Nzelũvaveli, Yesua na atongoi ala angĩ ma mĩsyĩ ya andũ ma Ĩsilaeli nĩmamasũngĩie mamea atĩĩ, “Tũikwenda ũtethyo wenyu tũyakĩa Ngai waitũ Ĩkalũ; ithyĩ ene nĩtũkwakĩa Mwĩai Ngai, Ngai wa Ĩsilaeli Ĩkalũ kwĩanana na ũndũ Mũsumbĩ Kulusu wa Velisia watwĩaĩie.”

4Nĩvo ĩndĩ andũ ala matwĩe nthĩ ĩsu mambĩĩie kũaa andũ ma Yuta ngoo, na kũmatelemya maikaendee kwaka Ĩkalũ.

5Nĩmanengie atai ĩtuvi ya wendeesyo, nĩ kana maleane na andũ ma Yuta na mayananga mũvango woo, ĩvindanĩ yonthe yĩla Kulusu mũsumbĩ wa Velisia wasumbĩkĩte, kũthi kũvika ĩvinda ya Ndalio mũsumbĩ wa Velisia.

6Mwambĩlĩĩlyonĩ wa kũsumbĩka kwa Aasuelo, amaitha ma andũ ala matwĩe Yuta na Yelũsalemu nĩmaandĩkie ndeto sya kũmasikata.

7O ta ũu ĩvindanĩ ya kũsumbĩka kwa Alitasasita mũsumbĩ wa Velisia, Mbisimilamu, Mithiletathi, Taveeli na ala maĩ ngwatanĩo namo, nĩmaandĩkĩie Mũsumbĩ Alitasasita valũa. Valũa ũsu waandĩkĩtwe na kĩthyomo kya Kĩalamaiki, na nĩwaalyũlawa yĩla ũũsomwa.

8O nake Leumu ũla waĩ ngavana na Simusai mũandĩki wa kĩsio nĩmaandĩkĩie Mũsumbĩ Alitasasita valũa ũũ masikatĩte andũ ma Yelũsalemu:

9“Kuma kũla kwĩ ngavana Leumu, mũandĩki Simusai me vamwe na ala me ngwatanĩo namo, asili, na ala maũngamĩe andũ kuma Taliveli, Velisia, Eleki, Mbavilonĩ na Aelamu kuma Susa,

10vamwe na andũ ala angĩ, ala Osinavali mũnene wĩ nguma walũngilye kuma nthĩ yoo na matũa ndũanĩ ya Samalia na kũndũ kũngĩ nthĩ ila syĩ mũingo wa Ũsĩ wa Euvalati.

11Valũa ũsu waĩtye ũũ: “Kwaku Mũsumbĩ Alitasasita kuma kũla kwĩ athũkũmi maku ala matwĩe ngalĩko ya ũthũĩlonĩ wa syũa ya Ũsĩ wa Euvalati.

12Mũnene waitũ, twĩenda we ũmanye kana Ayuti ala maumie isionĩ ila ingĩ sya ũsumbĩ waku nĩmaminĩte kũtũa Yelũsalemu, na maendee kwaka ĩngĩ ĩla ndũa nthũku na ng'endu. Nĩmambĩĩie kwaka ngũta syayo ĩngĩ na makilĩlye kũmina kũsyaka.

13Mũnene waitũ, ndũa ĩsu yaakwa ĩngĩ na ngũta syayo iimina kwakwa, andũ nĩmekũeka kumya koti, maelo na mĩvothi na kwa nzĩa ĩsu mbesa ila syumaw'a sya kĩ-ũsumbĩ nikũoleka.

14Kwoou, Mũnene waitũ, nũndũ twĩ ungu waku, tũikwenda kwona ũivũthw'a, na nĩkyo kĩtumi twoona nĩ ũseo tũkũtavye,

15nĩ kana wĩyĩae kũsiw'e mavukunĩ ma ũlilikany'o ma asumbĩ ala maĩ mbee waku. Nthĩnĩ wamo nũkwĩthĩa kana kuma tene ndũa ya Yelũsalemu yĩthĩĩtwe yĩ ng'endu, na nĩyathĩnisye asumbĩ na atongoi ma isio sya nthĩ mũno, na kana kuma tene andũ mayo me kĩthokoo mũno; nĩkyo kĩtumi ndũa ĩsu yaanangiwe.

16Kwoou twĩkũmanyĩthya kana ndũa ĩsu yaakwa ĩngĩ na ngũta syayo iyakwa ĩngĩ ithele, ndũkethĩwa ũtonya kũsumbĩka kĩsio kya nthĩ kĩla kĩ ngalĩko ya ũthũĩlonĩ wa syũa ya Ũsĩ wa Euvalati.”

17Mũsumbĩ nĩwasũngĩie valũa ũsu ta ũũ: “Kwa ngavana Leumu, mũandĩki Simusai na andũ onthe ala mwĩ ngwatanĩo namo, ala matwĩe Samalia na ala matwĩe kũndũ kũngĩ kĩsionĩ kya nthĩ kya ngalĩko ya ũthũĩlonĩ wa syũa ya Ũsĩ wa Euvalati, nĩnamũkethya.

18Valũa ũla mũnaandĩkie nũnaalyũlilwe na wasomwa nĩvo.

19Nĩnĩnaumisye mwĩao ũw'o ũmanthwe, na nĩkũmanyĩkĩte kana kuma tene ndũa ya Yelũsalemu nĩyĩthĩĩtwe ĩileana na motw'ĩo ma kĩ-ũsumbĩ, na nĩyĩthĩĩtwe yĩna andũ aingĩ ang'endu na andũ me kĩthokoo.

20Ndũa ya Yelũsalemu nĩyĩthĩĩtwe na asumbĩ me ũtonyi, ala masumbĩkĩte kĩsio kyonthe kya nthĩ kĩla kĩ ngalĩko ya ũthũĩlonĩ wa syũa ya Ũsĩ wa Euvalati, na nĩmaumĩaw'a koti, maelo na mĩvothi.

21Yu umyai mwĩao ũkwasya kana andũ asu nĩmaĩlĩte kũeka kwaka ndũa ĩsu ĩngĩ nginya yĩla nĩĩyĩaa.

22Ĩkai ũu mĩtũkĩ, nĩ kana vaikethĩwe ũndũ mũthũku ũendeea ũndetee wasyo.”

23Valũa ũsu waumĩte kwa Mũsumbĩ Alitasasita wamina kũsomewa Leumu, Simusai na ala maĩ ngwatanĩo namo, nĩmaendie Yelũsalemu mĩtũkĩ na malasimĩthya Ayuti maeke kwaka ndũa ĩsu.

24Kwoou wĩa wa kwaka Ĩkalũ Yelũsalemu nĩwaũngamie nginya mwakanĩ wa kelĩ wa kũsumbĩka kwa Ndalio mũsumbĩ wa Velisia.

← Chapter 3 Jump to: Chapter 5 →