Nehemiah 13

Kamba (MBIVILIA ŨVOO MŨSEO)

← Chapter 12 Jump to:

1Mũthenya ũsu, Ĩvuku ya Mwose nĩyasomiwe andũ onthe methukĩĩsye. Nĩveethĩiwe vandũ vaandĩkĩtwe kana vai Mũmoavi kana Mũamimoni waĩlĩte kwĩtĩkĩlw'a kwĩthĩwa ĩkomanonĩ ya andũ ma Ngai,

2nũndũ mayaanenga andũ ma Ĩsilaeli lĩu kana kĩw'ũ; vandũ va ũu, matuvie Mbalaamu nĩ kana aumanĩe andũ ma Ĩsilaeli, ĩndĩ nake Mwĩai Ngai aalyũla kĩumo kĩu kyatw'ĩka ũathimo.

3Yĩla andũ ma Ĩsilaeli meewie mwĩao ũsu wasomwa, nĩmavathie andũ ma nthĩ ingĩ kuma vala maĩ.

4Mũthembi Eliasavu ũla waũngamĩe nyũmba sya Ĩkalũ sya kwiwa syĩndũ nĩweethĩĩtwe vandũ va ĩvinda ĩasa ayĩw'ana na Tovia.

5Eliasavu nĩwanengie Tovia mwanya wa kũtũmĩa nyũmba ĩmwe nene, ĩla vata wayo waĩ kwiwa nthembo sya ngetha ya mbaa mbeke, ũvani wa thooa mũnene wĩtawa ũvumba, mĩio ya kũtũmĩwa Ĩkalũnĩ, o vamwe na kĩlungu kya ĩkũmi kya ngetha ya mbaa mbeke, ndivai na mauta ila syaaĩlĩte kũnengwa Alivai, aini na asikalĩ ma mũvĩanĩ wa Ĩkalũ, o vamwe na syĩndũ ila syaumĩaw'a athembi.

6Maũndũ asu onthe maendee kwĩkwa, nyie ndyaĩ Yelũsalemu nũndũ mwakanĩ wa mĩongo ĩtatũ na ilĩ wa kũsumbĩka kwa Alitasasita mũsumbĩ wa Mbavilonĩ naĩ nĩnasyoka ngathi kũla ũĩ. Ĩtina wa ĩvinda yĩana ũndũ mũna, nĩwanengie mwanya

7na nasyoka Yelũsalemu. Nĩ Yelũsalemu nĩw'o namanyie ũthũku ũla Eliasavu weekie kwa kũnenga Tovia nyũmba ĩla yaĩ Ĩkalũnĩ.

8Ũndũ ũsu nĩwambĩw'ĩthisye woo mũno na nekangya syĩndũ sya Tovia syonthe nza.

9Nĩnaumisye mwĩao nyũmba isu ithew'e, na ĩtina wa ũu natũngĩa mĩio ya Ĩkalũ, nthembo ya ngetha ya mbaa mbeke na ũvani wĩ thooa mũnene wĩtawa ũvumba.

10Nĩnasyokie namanya kana aini ma Ĩkalũnĩ na Alivai, nĩmaumĩte Yelũsalemu makasyoka mĩũndanĩ yoo ene, nũndũ andũ nĩmaekete kũmanenga kĩlungu kyoo.

11Nĩnaneenie na atongoi ma Yuta nĩ na woo namakũlya atĩĩ, “Mũekanĩte na Ĩkalũ ya Ngai nĩkĩ?” Nĩvo ĩndĩ namombanĩisye vamwe na natũnga kĩla mũndũ wĩanĩ wake.

12Nĩvo ĩndĩ andũ onthe ma Ĩsilaeli mambĩĩie kũete kĩlungu kyoo kya ĩkũmi kya ngetha ya mbaa mbeke, ndivai na mauta nyũmbanĩ sya kwia syĩndũ Ĩkalũnĩ.

13Nĩnanyuvie andũ aa wĩanĩ wa kũũngamĩa kĩnandũ kya nyũmba isu sya kwiwa syĩndũ: Mũthembi Selemia, Nzatoki Mũmanyĩsya wa Mĩao, Mũlivai Vetaia, na nanyuva Aananu mwana wa Nzakuli, mwĩsũkũũe wa Matania amatetheeasye. Andũ asu maĩ aĩkĩĩku na wĩa woo waĩ kũaĩa andũ ala angĩ syĩndũ.

14Ame Ngai wakwa, ndilikane maũndũnĩ aa, na ndũkolwe nĩ maũndũ maseo ala nĩkĩte kwondũ wa Ĩkalũ yaku na kwondũ wa wĩa waku.

15Ĩvindanĩ yĩu, nĩnoonie andũ Yuta maiviva nzavivũ mũthenyanĩ wa Savato, na kũete ngetha ya mbaa mbeke na kũmilĩĩla mang'oinĩ. Angĩ nĩmailĩĩlaa mang'oinĩ ndivai, nzavivũ, ũsyao wa makũyũ na syĩndũ ingĩ itwawe Yelũsalemu. Nĩnamakanisye maĩkatate kũthoosya kĩndũ mũthenyanĩ wa Savato.

16Andũ amwe kuma ndũanĩ ya Tile ala matwĩe Yelũsalemu nĩmaetie makũyũ, na mĩio ya mĩthemba ĩngĩ ndũanĩ nĩ kana mathooesye andũ ma Yuta na ala me Yelũsalemu mũthenyanĩ wa Savato.

17Nĩnaneenie na atongoi ma Yuta nĩ na woo namea atĩĩ, “Sisyai ũthũku ũla mũkwĩka! Nĩmũvukĩtye mũthenya wa Savato.

18Aaũmae maitũ nĩmeekie ũthũku ũilyĩ ta ũũ, na matuma Ngai waitũ atũetee ithyĩ na ndũa yaitũ mothũku. Ũu wĩ o vo, mũendee kũete ũthatu ũngĩ Ĩsilaeli kwa kũvukya mũthenya wa Savato.”

19Kwoou nĩnaumisye mwĩao mĩvĩa ya ndũa ĩvingawe ĩa mawĩoo Savato ĩyambĩĩa kĩla ĩvinda, na mĩomo ĩsu ĩyĩkala yĩ mbinge nginya Savato ĩthele. Nĩnaiie amwe ma athũkũmi makwa mĩvĩanĩ, nĩ kana masiĩĩe vaikatate kũetwe kĩndũ o na kĩmwe ndũanĩ mũthenyanĩ wa Savato.

20Ĩvinda yĩmwe kana mavinda elĩ, atandĩthya na athoosya ma mĩthemba yonthe ya syĩndũ nĩmakomie nza wa ndũa ya Yelũsalemu.

21Nĩnamakanisye namea atĩĩ, “Mwĩkoma mwĩ ũtee wa ngũta sya ndũa nĩkĩ? Mweeka ũu ĩngĩ, ngatũmĩa vinya kũmũlũngya.” Kuma mũthenya ũsu, andũ asu mayaaũka mũthenyanĩ wa Savato ĩngĩ.

22Nĩneeaĩie Alivai methesye, na maithi makasunge mĩvĩa ya ndũa, nĩ kana mũthenya wa Savato wĩkalw'e wĩ mũtheu. Ame Ngai wakwa ndilikane o ta ũu nũndũ wa ũndũ ũũ, na ũindekea nũndũ wa wendo waku mwingĩ ũtaolekaa.

23Ĩvindanĩ yĩu, O ta ũu nĩnamanyie kana Ayuti amwe nĩmatwaĩte aka kuma Asitoti, Amoni na Moavi.

24Nyusu ya Syana syoo yaneenaa kĩthyomo kya Asitoti kana ithyomo ingĩ, ĩndĩ iyaĩ itonya kũneena kĩthyomo kya Ayuti.

25Nĩnatetanisye namo, namaumanĩa, nakũna amwe moo na nakũanga nzw'ĩĩ syoo. Nĩvo ĩndĩ natumie mevĩta ĩsyĩtwanĩ ya Ngai kana maiketĩkĩlya eĩtu moo matwawe nĩ ana ma andũ ma nthĩ ingĩ, kana ana moo matwae eĩtu ma nthĩ isu, kana mo matwae eĩtu asu.

26Nĩkũlya, nũndũ Solomoni Mũsumbĩ wa Ĩsilaeli ũtaavĩtya kwa kũtwaa aka ta asu? Katĩ wa nthĩ mbingĩ vai mũsumbĩ wailyĩ take. Nĩwendetwe nĩ Ngai, na Ngai amũtw'ĩkĩthisye mũsumbĩ wa Ĩsilaeli yonthe, ĩndĩ ũu wĩ o vo, aka ma nthĩ ingĩ nĩmatumie o nake eka naĩ.

27Yu ĩndĩ mwĩenda tũatĩĩe ngelekany'o yenyu, na tũilea kũatĩĩa mĩao ya Ngai waitũ, na kũtwaa aka ma nthĩ ingĩ?

28Ũmwe wa ana ma Yeoiata mwana wa Eliasavu Mũthembi Mũnene nĩwatwaie mwĩĩtu wa Sanavalati kuma ndũanĩ ya Mbethi-oloni. Nũndũ wa ũu nĩnalũngilye Yeoiata auma vala nĩĩ.

29Ame Ngai wakwa lilikana andũ asu, nũndũ nĩmavukisye wĩa wa ũthembi, na ũtianĩo ũla waseũvisye na athembi na Alivai.

30Nĩnatheisye andũ nũndũ wa syĩndũ syonthe ila syaumĩte nthĩ ingĩ; nĩnaseũvisye motw'ĩo ma kũatĩĩwa nĩ athembi na Alivai, nĩ kana kĩla ũmwe amanye wĩa wake.

31Nĩnaseũvisye mũvango wa ngũ ila itũmĩawa ĩvinda ya kũthemba nthembo sya kũvĩvw'a, ietawe ĩvindanĩ yĩla yaĩlĩte na andũ maietae nthembo ya ũsyao wa mbee. Ame Ngai wakwa, ndilikane na kũmbĩka nesa nũndũ wa ũu.

← Chapter 12 Jump to: