Nehemiah 8

Kamba (MBIVILIA ŨVOO MŨSEO)

← Chapter 7 Jump to: Chapter 9 →

1Andũ onthe me vamwe nĩmoombanĩie Yelũsalemu kĩwanzanĩ kĩla kĩ vakuvĩ na Mũvĩa wa Kĩw'ũ, na makũlya Esala ũla waĩ mũmanyĩsya wa mĩao, aete Ĩvuku ya Mĩao ĩla Mwĩai Ngai wanengie andũ ma Ĩsilaeli kwĩsĩla vala ve Mwose.

2Kwoou mũthenyanĩ wa mbee wa mwei wa mũonza, mũthembi Esala nĩwaetie Ĩvuku yĩu ya Mĩao vala andũ ma Ĩsilaeli moombanĩe. Andũ asu maĩ aũme, aka na andũ ala angĩ onthe maĩ matonya kwĩw'a na kũelewa nĩ mĩao ĩsu.

3Nĩwasomie ĩvuku yĩu na wasya mũnene kuma kwakya kũvika saa sita asyaĩtye kĩwanza kĩla kĩ vakuvĩ na Mũvĩa wa Kĩw'ũ. Ayĩsomie e mbee wa aũme, aka, na andũ ala angĩ maĩ matonya kwĩw'a na kũelewa nĩ mĩao. Andũ onthe nĩmeethukĩĩisye mĩao ĩsu na kĩthito.

4Esala alĩsĩte kĩtaanĩ kya mĩtĩ kĩla kyaseũvĩtw'e kwondũ wa ũndũ ũsu. Matithia, Sema, Anaia, Ulia, Ilikia na Maaseia maũngamĩte ngalĩko ya Kw'oko kwake kwa aũme, na Malikiya, Asumu, Asivatana, Nzekalia na Mesulamu makaũngama kw'okonĩ kwake kwa aka.

5Esala aũngamĩte vandũ andũ onthe matonya kũmwona. Yĩla wavingũie ĩvuku yĩu oou, andũ onthe nĩmaũngamie.

6Esala nĩwaneenie asya atĩĩ, “Nĩataĩwe Mwĩai Ngai, Ngai ũla mũnene!” Andũ onthe nĩmookĩlilye moko na masũngĩa masya, “Ameni! Ameni!” Nĩvo ĩndĩ matulilye ndu mathaithe Mwĩai Ngai makumanĩte, mothyũ moo makatina nthĩ.

7Kĩla mũndũ nĩwaũngamie vandũ vake na Alivai aa maelesya andũ mĩao ĩsu: Yesua, Mbani, Selevia, Yamini, Akuvu, Savethai, Otia, Maaseia, Kelita, Asalia, Yosavati, Aananu na Velaia.

8Nĩmasomie Ĩvuku yĩu ya Mĩao ya Ngai, mayĩelesya na manengane ũalyũlo wayo nĩ kana andũ maelewe nĩ kĩla kyasomwa.

9Yĩla andũ meewie maũndũ ala Ĩvuku ya Mĩao yaandĩkĩtwe, nĩmakiitiwe mũno nginya mambĩĩa kũĩa. Kwoou Neemia, ũla waĩ ngavana, mũthembi Esala ũla waĩ mũmanyĩsya wa mĩao, na Alivai ala maeleasya andũ mĩao nĩmaneenie na andũ onthe mamea atĩĩ, “Ũmũnthĩ nĩ mũthenya mũtheu kwondũ wa Mwĩai Ngai, Ngai wenyu, kwoou mũyaĩlĩte kwĩthĩwa na kyeva kana kũĩa.”

10Neemia nĩwameie atĩĩ, “Ĩnũkai mũkaye lĩu mũseo na mũinyw'a ndivai yĩ mũyo, na mũitwaĩa ala mate na kĩndũ. Ũmũnthĩ nĩ mũthenya mũtheu kwondũ wa Mwĩai Ngai; mũikamake nĩkwĩthĩwa ũtanu wa Mwĩai Ngai nĩw'o vinya wenyu.”

11Alivai nĩmavindĩthisye andũ onthe na kũmea atĩĩ, “Vindyai, nĩkwĩthĩwa ũmũnthĩ nĩ mũthenya mũtheu. Ekai kwĩthĩwa na kyeva.”

12Nĩvo ĩndĩ andũ onthe menũkie mathi kũya na kũnyw'a me na ũtanu, na maana syĩndũ ila maĩ nasyo na andũ angĩ, nũndũ nĩmaeleiwe nĩ ndeto ila masomeiwe.

13Mũthenyanĩ ũla waatĩĩe, atongoi ma mĩsyĩ, vamwe na athembi na Alivai, nĩmaendie kũla kwĩ Esala nĩ kana makasome ndeto sya mĩao.

14Nĩmeethĩie mĩaonĩ ĩla Mwĩai Ngai wanengie Mwose vaandĩkĩtwe kana andũ ma Ĩsilaeli maĩlĩte kwĩkala tũsũmbanĩ twa matũ, ĩvindanĩ ya mboka ya mwei wa mũonza.

15Kwoou nĩmatũmanie Yelũsalemu, ndũanĩ na mĩsyĩnĩ yoo yonthe nĩ kana ndeto ii itavanw'e: “Umaalai mũthi iĩmanĩ, na mũitũla mbonge sya mĩtĩ ya mĩthata, mĩtĩ mĩthungu, mĩkĩndũ, na mĩtĩ ĩngĩ yĩ matũ, na mũiseũvya tũsũmba kwĩanana na ũndũ mĩao yaĩtye.”

16Kwoou andũ nĩmaumaalile mathi kũete mathanzu na maaka tũsũmba ialanĩ syoo ila syaĩ ndindimalu, iwanzanĩ syoo, na kĩwanzanĩ kya Ĩkalũ, kĩwanzanĩ kĩla kyaĩ vakuvĩ na Mũvĩa wa Kĩw'ũ na vakuvĩ na Mũvĩa wa Evalaimu.

17Andũ onthe ala masyokie kuma kũla matavĩtwe makatwawa, nĩmaakie tũsũmba na mekala nthĩnĩ watw'o. Kuma ĩvindanĩ ya Yosua mwana wa Nuni kũvika ũmũnthĩ, andũ ma Ĩsilaeli mayaatanĩa Mboka ya Tũsũmba twa Matũ ĩilyĩ ũu. Andũ onthe maĩ na ũtanu mwingĩ.

18Kuma mũthenyanĩ wa mbee wa mboka kũvika mũthenyanĩ wa mũthya, nĩmasomaa kĩlungu kya Mĩao ya Ngai kĩla mũthenya. Nĩmatanĩie mboka vandũ va mĩthenya mũonza, na mũthenya wa nyanya meethĩwa na wũmbano kwĩanana na ũndũ mĩao yaĩtye.

← Chapter 7 Jump to: Chapter 9 →