Nehemiah 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1Ĩtina wa ĩvinda ĩna, andũ aingĩ, aũme na aka nĩmambĩĩie kũnyungunyĩsya ĩũlũ wa Ayuti ala angĩ.

2Amwe maneenaa mayasya atĩĩ, “Ithyĩ vamwe na ana na eĩtu maitũ twĩ aingĩ; nĩ kana tũye na kũendeea kwĩkala thayũ, no nginya twĩthĩwe na lĩu wa ngetha ya mbaa mbeke.”

3Andũ angĩ nĩmaneenaa mayasya atĩĩ, “Nĩtũnenganĩte mĩũnda yaitũ, mĩũnda yaitũ ya mĩsavivũ na mĩsyĩ yaitũ yĩthĩwe ngwatĩlĩĩlyo, nĩ kana tũkwate ngetha ya mbaa mbeke nũndũ wa yũa.”

4O ta ũu namo angĩ maneenaa mayasya atĩĩ, “Nĩtũkovete mbesa tũĩve koti wa mũsumbĩ, na nĩtwiĩte mĩũnda yaitũ, na mĩũnda yaitũ ya mĩsavivũ yĩthĩwe ngwatĩlĩĩlyo.

5O na kau ithyĩ nĩtũileny'e ũndũ kĩ-nthakame na Ayuti ala angĩ, na ana maitũ nĩ aseo ta ala moo, no nginya tũnengane ana na eĩtu maitũ matw'ĩke ngombo. Amwe ma eĩtu maitũ nĩmatw'ĩkĩte ngombo, ĩndĩ tũi ũndũ tũtonya kwĩka, nũndũ mĩũnda yaitũ, na mĩũnda yaitũ ya mĩsavivũ nĩminĩte kwoswa nĩ andũ angĩ.”

6Yĩla neewie kĩĩo kyoo na ndeto isu, nĩnathatie mũno.

7Nĩnaisũanĩie mũno na natũla atongoi na andũ ala me ndaĩa mũtĩ. Nĩnameie atĩĩ, “Nĩmwosete ũtandĩthyo kuma andũnĩ ma nthĩ yenyu ene!” Kwoou nĩnoombanisye andũ aingĩ vamwe nĩ kana nĩmanye ĩũlũ wa ũndũ ũsu,

8na nasya atĩĩ, “Kwĩanana na ũtonyi witũ, nĩtũtũngĩte ana-a-ĩthe maitũ Ayuti ala mathooetw'e kwa andũ ma mbaĩ ingĩ. Yu mũendee na kũthoosya ana-a-ĩthe menyu, nĩ kana mathoow'e ĩngĩ kũla tũĩ!” Atongoi asu nĩmavindisye, nũndũ mayaĩ na ũndũ wa kũneena.

9Nĩvo ĩndĩ naneenie nasya atĩĩ, “Ũndũ ũũ mũkwĩka ti mũseo; mwaĩlĩte kwĩw'a Ngai na kwĩka ũla waĩlu. Nĩvo ĩndĩ mwĩĩthĩwa mũtatonya kũtuma amaitha maitũ, ala nĩ andũ ma mbaĩ ingĩ methĩwa na kĩtumi kya kũtũvũthya.

10Nyie na ana-a-asa makwa na athũkũmi makwa nĩtũmakovethasya mbesa, na ngetha ya mbaa mbeke. Tũekane na ũtandĩthyo ũũ.

11Matũngĩei mĩtũkĩ mĩũnda yoo, mĩũnda yoo ya mĩsavivũ, mĩũnda yoo ya mĩthata na nyũmba syoo. O ta ũu matũngĩei kĩlungu kya ĩana kya mbesa syoo, ngetha ya mbaa mbeke, ndivai na mauta ala mwosete kuma kwoo.”

12Nĩvo ĩndĩ atongoi asu maisye atĩĩ, “Nĩtũũmatũngĩa; tũimetya kĩndũ kĩngĩ. Nĩtũkwĩka ũndũ wasya.” Nĩvo ĩndĩ neetie athembi na natuma andũ asu me nguma na atongoi mevĩta kwĩka ũndũ mathanie.

13O ta ũu nĩnavuunzie ngũa yakwa na nasya atĩĩ, “Ngai nĩavuunze nyũmba, na syĩndũ sya mũndũ ũla ũtekwĩanĩsya wĩvĩto ũũ. Ngai eosa syĩndũ sya mũndũ ũsu syonthe na aimũtia ate na kĩndũ.” Andũ onthe nĩmasũngĩie masya, “Ameni,” na mataĩa Mwĩai Ngai. Nĩmeekie ũndũ mathanie kwĩka.

14Ĩvindanĩ yonthe ya myaka ĩkũmi na ĩlĩ yĩla naĩ ngavana wa Yuta, kuma mwakanĩ wa mĩongo ĩlĩ wa kũsumbĩka kwa Alitasasita, kũvika mwaka wa mĩongo ĩtatũ na ilĩ wa kũsumbĩka kwake, vai ũmwe wa ana-a-asa makwa kana nyie mwene waaya lĩu ũla naaĩlĩte kũya ta ngavana.

15Makavana onthe ala maĩ mbee wakwa maĩ mũio kũla kwĩ andũ, na kĩla mũthenya nĩmametasya lĩu, ndivai na o ta ũu silĩva mĩongo ĩna. O na athũkũmi moo nĩmathĩnasya andũ, ĩndĩ nyie naĩ kĩvathũkany'o nũndũ nĩnakĩaa Ngai.

16Neenenganie wĩanĩ wa kwaka ũkũta na ndyaaĩyosea mũũnda o na ũmwe. Andũ onthe ala maĩ athũkũmi makwa matethasya wĩa wa kwaka ũkũta.

17Kĩla ĩvinda nĩnanengae Ayuti ĩana na mĩongo ĩtano na atongoi moo lĩu, o vamwe na andũ ala angĩ onthe ala maumaa nthĩ ingĩ.

18Nĩnathĩnzaa nzaũ ĩmwe, malondu thanthatũ ala maseo na ngũkũ mbingĩ kĩla mũthenya, na nĩnanenganae ndivai ya kĩla mũthemba vandũ va mĩthenya ĩkũmi. Maũndũ asu onthe me o vo, ndyaaĩtya lĩu ũla waĩlĩte kũnengwa ngavana, nũndũ syĩndũ ila andũ mendaa syaĩ mbingĩ.

19Ame Ngai, nĩngũũvoya ũlilikane kũmbĩka nesa nũndũ wa maũndũ ala nĩkĩte andũ.

← Chapter 4 Jump to: Chapter 6 →