Nehemiah 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Mũthembi Mũnene Eliasivu nĩwookĩlile e na ana-a-ĩthe athembi, mathi kwaka ĩngĩ Mũvĩa wa Malondu. Nĩmaũvathie na maũngamya mĩomo yaw'o. Mavathie ũkũta waw'o nginya Mwakonĩ Mũtũlu wa Ĩana, kũthi kũvika Mwakonĩ Mũtũlu wa Ananeli.

2Andũ ma Yeliko nĩmaakie kĩlungu kĩla kyaatĩĩe kya ũkũta, nake Nzakuli mwana wa Imili aaka kĩlungu kĩla kyaatĩĩe kĩu kyoo.

3Ana ma Asenaa nĩmo maakie Mũvĩa wa Makũyũ. Nĩmeekĩie mĩamba yaw'o, na meekĩa mĩomo, syĩndũ sya kũlũlũmĩĩlya, na syũma sya kũvinga. Meekĩie syĩndũ isu vala syaaĩlĩte kwĩkĩwa.

4Melemothi mwana wa Ulia, mwĩsũkũũe wa Akosi nĩwe waakie ĩngĩ kĩlungu kĩla kyaatĩĩe. O ta ũu Mesulamu mwana wa Mbelekia, mwĩsũkũũe wa Mesesaveli nĩwe waakie ĩngĩ kĩlungu kĩla kyaatĩĩe kĩu. Nzatoki mwana wa Mbaana nĩwaakie ĩngĩ kĩlungu kĩla kyaatĩĩe.

5Andũ ma kuma Tekoa nĩmaakie ĩngĩ kĩlungu kĩla kyaatĩĩe kĩu, ĩndĩ atongoi ma ndũa syoo nĩmaleile kũtethya wĩa ũla manengiwe nĩ aũngamĩi moo.

6Yeoiata mwana wa Vasea e na Mesulamu mwana wa Mbesoteia nĩmo maakie ĩngĩ Mũvĩa wa Yesana. Nĩmeekĩie mĩamba yaw'o, na meekĩa mĩomo na syĩndũ sya kũmĩlũlũmĩĩlya vamwe na syũma. Nĩmeekĩie mĩamba yaw'o, na meekĩa mĩomo na syĩndũ sya kũvinga vamwe na syũma.

7Melatia kuma Ngiveoni, Yatoni kuma Melonothi, na andũ kuma Ngiveoni na Misiva nĩmo maakie ĩngĩ kĩlungu kya ũkũta kĩla kyaatĩĩe. Kĩlungu kĩu kyaĩ kĩsionĩ kyonthe kĩla kyatongoew'e nĩ ngavana wa Kĩsio kya Ũthũĩlonĩ wa Syũa kya Ũsĩ wa Euvalati.

8Usieli mwana wa Aliaia, ũla ũseũvasya syĩndũ sya thaavu, nĩwaakie ĩngĩ kĩlungu kĩla kyaatĩĩe kĩu. Aanania ũla waseũvasya mauta me mũuke mũseo nĩwaakie kĩlungu kĩla kyaatĩĩe kũthi kũvika Ũkũta Mũthanthau.

9Lavaia mwana wa Uulu, ũla wasumbĩkĩte nyusu ya kĩsio kya Yelũsalemu, nĩwaakie ĩngĩ kĩsio kĩla kyaatĩĩe kĩu.

10Yetaia mwana wa Alumavu nĩwaakie ĩngĩ kĩlungu kya ũkũta kĩla kyaatĩĩe, kĩla kyaĩ vakuvĩ na nyũmba yake. O ta ũu Atusi mwana wa Asavineia nĩwaakie ĩngĩ kĩlungu kĩla kyaatĩĩe kĩu.

11Malikiya mwana wa Alimu, na Asuvu mwana wa Vaathi-moavi nĩmaakie kĩlungu kĩla kyaatĩĩe, na maaka Mwako Mũtũlu wa Maiko Manene.

12Salumu mwana wa Aloesi, ũla wasumbĩkĩte kĩsio kĩla kĩngĩ kya Yelũsalemu, nĩwaakie kĩlungu kĩla kyaatĩĩe, atetheanĩsye na eĩtu make.

13Anuni e na andũ ma ndũa ya Nzanoa nĩmaakie ĩngĩ Mũvĩa wa Mwandanĩ. Nĩmeekĩie mĩomo yaw'o, syĩndũ sya kũvinga, na syũma sya kũvinga mũvĩa. Nĩwaakie ũkũta ĩngĩ mita maana ana na mĩongo ĩna kũthi kũvika Mũvĩanĩ wa Kumĩlya Vũũ. Nĩweekĩie mĩomo yaw'o, syĩndũ sya kũvinga, na syũma sya kũvinga mũvĩa.

14Malikiya mwana wa Lekavi, ũla nĩwe wasumbĩkĩte kĩsio kya Mbethi-akelemu nĩwaakie ĩngĩ Mũvĩa wa Kumĩlya Vũũ. Nĩweekĩie mĩomo yaw'o, syĩndũ sya kũvinga, na syũma sya kũvinga mũvĩa.

15Saluni mwana wa Koli-osa, ũla wasumbĩkĩte kĩsio kya Misiva nĩwaakie ĩngĩ Mũvĩa wa Nthongo ya Kĩw'ũ. Nĩwavw'ĩkie nthongo ĩsu, na eekĩa mĩomo ya yo, syĩndũ sya kũvinga, na syũma sya kũvinga mũvĩa. Nĩwaakie ĩngĩ ũkũta wa Ndia ya Siela vakuvĩ na mũũnda wa kĩ-ũsumbĩ, kũthi kũvika ngasinĩ ila syumĩte Ndũanĩ ya Ndeviti.

16Neemia mwana wa Asivuki, ũla wasumbĩkĩte nyusu ya kĩsio kya Mbethi-suli nĩwaakie kĩlungu kĩla kyaatĩĩe, kũthi kũvika mbũanĩ sya Ndeviti, ndianĩ ya kũseũvw'a, na kũvika Nyũmba ya Ngũmbaũ.

17Alivai aa nĩmo maakie ĩngĩ ilungu ila syaatĩĩe sya ũkũta: Leumu mwana wa Mbani nĩwaakie kĩlungu kĩla kyaatĩĩe; Asavia, ũla wasumbĩkĩte nyusu ya kĩsio kya Keila nĩwaakie kĩlungu kĩla kyaatĩĩe kĩu; eekie ũu vandũ va andũ ma kĩsio kya nthĩ yake.

18Mbavai mwana wa Enatati, ũla wasumbĩkĩte nyusu ĩla ĩngĩ ya kĩsio kya Keila nĩwaakie kĩlungu kĩla kyaatĩĩe.

19Eseli mwana wa Yesua, mũsumbĩ wa Misiva, nĩwaakie kĩlungu kĩla kyaĩ mbee wa vala vaiawa mĩio ya kaũ, kũthi kũvika vala ũkũta wĩkotete.

20Mbaluku mwana wa Nzavai nĩwaakie kĩlungu kĩla kyaatĩĩe, kũthi kũvika ũlikĩlonĩ wa nyũmba ya Eliasivu Mũthembi Mũnene.

21Melemothi mwana wa Ulia, mwĩsũkũũe wa Akosi nĩwaakie kĩlungu kĩla kyaatĩĩe, kũthi kũvika mũthyanĩ wa nyũmba ya Eliasivu.

22Athembi aa nĩmaakie ĩngĩ ilungu ila syaatĩĩe sya ũkũta: Athembi ma kĩsio kĩla kĩthyũlũlũkĩte Yelũsalemu nĩmaakie kĩlungu kĩla kyaatĩĩe;

23Mbengyameni na Asuvu nĩmaakie kĩlungu kĩla kyaatĩĩe kĩu, kĩla kyaĩ mbee wa nyũmba syoo. Asalia mwana wa Maaseia, mwĩsũkũũe wa Anania nĩwaakie kĩlungu kĩla kyaatĩĩe, kĩla kyaĩ mbee wa nyũmba yake.

24Mbinui mwana wa Enatati nĩwaakie kĩlungu kĩla kyaatĩĩe kĩu, kuma nyũmba kwa Asalia kũthi kũvika konanĩ ya ũkũta.

25Kĩlungu kĩla kyaatĩĩe, kuma konanĩ ya ũkũta na mwako mũtũlu wa nyũmba ya kĩ-ũsumbĩ ya ĩũlũ, vakuvĩ na kĩwanza kya asyaĩĩsya, kyaakiwe ĩngĩ nĩ Valali mwana wa Usai. Vetaia mwana wa Valosi,

26aitetheanĩsya na athũkũmi ma Ĩkalũ ala mekalaa Oveli, nĩmaakie ĩngĩ kĩlungu kĩla kĩ vakuvĩ na Mũvĩa wa Kĩw'ũ, ngalĩko ya wumĩlonĩ wa syũa, kwelekela mwakonĩ mũtũlu.

27Andũ ma Tekoa nĩmaakie ĩngĩ kĩlungu kĩla kyaatĩĩe kya Ĩkalũ kuma mwakonĩ mũtũlu kũthi kũvika ũkũtanĩ wa Oveli.

28Kĩkundi kya athembi nĩkyaakie ĩngĩ kĩlungu kĩla kyaatĩĩe kĩu, kũthi ngalĩko ya ĩũlũ kuma Mũvĩa wa Mbalasi. Kĩla ũmwe aakaa mbee wa nyũmba yake mwene.

29Nzatoki mwana wa Imeli nĩwaakie ĩngĩ kĩlungu kĩla kyaatĩĩe, kĩla kyaĩ mbee wa nyũmba yake. Semaia mwana wa Sekania, mũsũvĩi wa Mũvĩa wa Wumĩlonĩ wa Syũa nĩwaakie kĩlungu kĩla kyaatĩĩe kĩu.

30Aanania mwana wa Selemia na Anuni mwana wa thanthatũ wa Nzalavi, nĩmaakie ĩngĩ kĩlungu kĩla kyaatĩĩe. Kĩu nĩkyo kyaĩ kĩlungu kyoo kya kelĩ kwaka. Mesulamu mwana wa Mbelekia nĩwaakie kĩlungu kĩla kyaatĩĩe kĩu, kĩla kyaĩ mbee wa nyũmba yake.

31Malikiya, ũla ũseũvasya syĩndũ sya thaavu, nĩwaakie kĩlungu kĩla kyaatĩĩe kũthi kũvika mwakonĩ ũla watũmĩawa nĩ athũkũmi ma Ĩkalũ na athoosya. Kĩlungu kĩu nĩ kĩla kyaĩ vakuvĩ na Mũvĩa wa Kũmbanĩa Andũ, vakuvĩ na nyũmba ĩla yaakĩtwe ĩũlũ wa kona ya ũkũta.

32Atwii ma thaavu na athoosya ma syĩndũ nĩmo maakie ĩngĩ kĩlungu kya mũthya, kuma nyũmbanĩ ĩla yaakĩtwe konanĩ ya ũkũta ĩũlũ, kũthi kũvika Mũvĩanĩ wa Malondu.

← Chapter 2 Jump to: Chapter 4 →