Hebrews 10

kumaoni

← Chapter 9 Jump to: Chapter 11 →

1मूसा का द्वारा दीईना का नियम-कानून केवल उन निकी चीजून की एक छाया मात्र छै जो भविष्य में ऊँन वाली छै, यो असली में नाहातिन। येक कारण, जो लोग नियम-कानून का अधीन रूनान उन हर साल एक जसो बलिदान चढ़ूना, लेकिन यो बलिदान उन लोगून कभै ले सिद्ध नै बना सकनो जो परमेश्वरा अराधना करून खिन उक नजदीक उनान।

2अगर नियम-कानून उनून सिद्ध बना सकना, त बलिदान चढ़ून पैलि बन्द हो जाना। अराधना करूनवाला पाप भटे सच्ची में शुद्ध कर दी जाना, त उन अपूनास दोषी नी मानना।

3लेकिन बलि चढाईना को खून पापून दूर नै कर सकनो। लेकिन हर साल उन लोगून उनार पापून याद दिलूछो जो उनूनले करिना छै।

5येक कारण जब मसीह संसार में आछ, त उले परमेश्वर थैं क्योछ, “तै नै चाँनै कि लोग तैंस बलिदान और भेंट चढ़ून, लेकिन तैले मैंस बलिदान करून खिन एक शरीर दी रैछ।

6तै, पुर जानवर स जलाभेरन करिना का बलिदानले और पापून दूर करना का बलिदान भटे खुश नै हुनै।

7तब मसीह ले परमेश्वर थैं क्योछ, ‘देख, मैं उई करून खिन आ गयूँ जो तै चाँछै। जसो म्यारा बारिमें यो बात पवित्रशास्त्र में लिखीना की छी’।”

8मूसा का नियम कानून सिखूनान कि “पाप का कारण भेंट और बलिदान चढ़ून चैछो। लेकिन मसीह ले इन बातुन क्याखिन क्योछ कि परमेश्वर स इनेरि जरूरत नाहातिन?”

9फिर उले क्योछ, “हे परमेश्वर देख, मैं उई करून खिन आरयूँ जो तै चाछै।” परमेश्वर बलिदानून की पैला नियम-कानून खत्म कर दीछो ताकि उ एक नय्या नियम-कानून स स्थापित कर सको। और येक कारण, हम उ बलिदान का द्वारा पवित्र कर दी ग्या जो यीशु मसीह ले अपून शरीराक द्वारा एक बार में हमेशा खिन चढ़ा दी ग्यो।

11हेरक याजक हर रोज वेदी का सामुनि ठाड़ हो भेरन लोगून का पापून दूर करून खिन नियमून पुर करछो। उ लगातार एक्कै जसो बलिदानून चढ़ूनै रूछो जो कभै ले उ आदिमी का पापून दूर नै कर सकनो, जो उनून खिन करि ग्यान।

12लेकिन हमार महायाजक यीशु मसीह ले हमार पापून की माफी खिन अपूनास हमेशा खिन सिर्फ एक बलिदान का रूप में चढ़ा दीछ। और अब उ पिता परमेश्वरा का दैन तरफ सिंहासन में सर्वोच्च सम्मान का जाग में हमेशा खिन बैठ ग्योछ।

13किलैकी मसीह ले अपूनास सिर्फ एक बार बलिदान का रूप में परमेश्वरेस दी दीछ और यो कारण उक लोगून पवित्र कर दी ग्योछ और उन सच्ची में हमेशा खिन धर्मी बन ग्यान। और वाँ एल उ अपून सब दुश्मनून पुर तरीका ले अपून अधीन करून खिन इंतजार करूनमर्योछ।

15पवित्र आत्मा ले हमून यो बताछ कि यो सच्ची छै। प्रभु परमेश्वरो को उ वादा स याद करा किलैकी उले पैलि कईना को छ्यो,

16फिर प्रभु कुंछो कि, जो नय्या वाचा मैं उन दिनून का बाद इस्राएल का लोगून का दगाड़ करूँलो, उ यो छै कि “मैं अपून नियम-कानून उनार दिलून में लिखूलो और मैं उनार जमीर में डाललो।”

17परमेश्वर यो ले कुंछो, “मैं उनार पापून, और उनार बुरा कामून फिर कभै याद नी करूँलो।”

18और परमेश्वर हमार पापून माफ करछो त अब कोई ले बलिदान दीना की जरूरत नाहातिन।

19येक कारण, म्यारा विश्वासी भाईयो, किलैकी यीशु ले हमून खिन अपून जीवन स बलिदान कर दी, अब हम हिम्मत का दगाड़ स्वर्ग में परम पवित्र जाग में पुज सकनू।

20जब मसीह मरछ्य त उले हमून खिन एक नय्या बाटो खोल दीछ ताकि हम इसो जीवन जी सकाँ जैको कोई अन्त नाहातिन। उले यो बाटो पर्दा भटे निकभेरन खोलछ्य, येको मतलब यो छै कि उले अपूनास एक बलिदानाक रूप में चढ़ाभेरन

21येक कारण हमार पास एक इसो महायाजक छै जो परमेश्वरा का घर में राजा करछो।

22त आ हम, मसीह का खून का छिड़क भेरन अपून मनैस शुद्ध करभेरन और साफ पानि ले अपून शरीरून धोभेरन साफ करभेरन और सच्चा मन और मजबूत विश्वास का दगाड़ परमेश्वरा का नजिक जा।

23अब हम बिना कोई शक का अपूनी उ आश में अटल रौ, किलैकी हम परमेश्वर में उक वादा स पुर करून खिन भरोस कर सकनू।

24आ हम प्रेम ले और भल कामून में एक-दुसरा स हौंसला दीनै रौ।

25आ हम कुछ लोगून का नियाती, परमेश्वरै की अराधना करून खिन इकट्ठा हुनो बन्द जन करा। लेकिन हमून एक-दुसरा स हौंसला दीनै रून चैछो और चेतावनी दीनी चैछी, खास कर अब जब कि प्रभु का फिर वापस उनाक दिन नजदीक ऊँन मर्यान।

26हमून इन कामून करून चैछो, किलैकी जब हम सुसमाचारै की सच्चाई जाण ग्या, त हम जाणबूझ भेरन किलै पाप करनू, त इसो कोई बलिदान नाहातिन जो हमार पापून दूर कर सको।

27बल्कि, उनून सिर्फ परमेश्वरो को न्याय और भयानक आगा की आश करूनी चैछी जो उन लोगून नाश कर देली जो परमेश्वरो को बिरोध करनान।

28जब कि मूसा का नियम-कानून को नै मान्या वाला स द्वी या तीन आदिमीन की गवाई में, बिना दया का मार डाली जाछो।

29अगर मूसा का नियम-कानून का अनुसार तरीका की सजा छी, त उ आदिमी की सजा भौत ज्यादा होलि जो परमेश्वरा का च्याला को अपमान करछो। उले परमेश्वरा का च्याला स अपून खुटान ले कुचल दीछ किलैकी उले उक आदर-सम्मान नै कर्यो। उले मसीह का उ खून स पवित्र नै मान्यो जैका द्वारा परमेश्वरेले ऊस पवित्र बनून खिन नय्या वाचा शुरू करिना की छी। उले पवित्र आत्मा को अपमान करछ्य जैका द्वारा उस अनुग्रह मिलीना को छ्यो।

30ऊस भौत कड़ी सजा दी जालि, किलैकी हम जाणनू कि परमेश्वरेले कईना को छै, “बदला लीनो म्येरो काम छै, मैं ही बदला द्यूलो।” और फिर यो ले कईना को छै, कि “प्रभु अपून लोगून को न्याय करोलो।”

31जीवित परमेश्वरा का हातून भटे सजा पाना एक भौतै भयानक बात छै।

32लेकिन तुम उन दिनून का बारिमें सोचा जब तुमूले पैलि बार मसीह का बारिमें जाणछ्य। तुमूले भौत दुखून का दगाड़ कठिन मेहनत करछ्य, लेकिन तुम विश्वास में मजबूत बनिना का रैछा।

33कभै-कभै त इसो ले भ्योछ, कि तुम अपमान, और अत्याचार सह भेरन सबून का सामुनि तमाशा बनग्या, और कई बार तुम उन लोगून में शामिल हो गया जिनोरो अपमान करि जा छ्यो और जिनारा दगाड़ बुरा बरताव हुछ्यो।

34तुम कैदीन का दुख में ले दुखी भैछा, और अपूनी धन-दौलत ले खुशी ले लुटा दीछ; किलैकी तुम जाणछा कि तुमार पास एल ले उन सब चीज छन जिनोरो वादा परमेश्वरै करिना को छ्यो, जो कि भौत खास छै और जो हमेशा खिन बनिना को रूछो।

35येक कारण जब लोग तुमून सताला, त अपून विश्वास में मजबूत बनिना का रया ताकि तुमून परमेश्वरा तरफ भटे एक ठूलो फल मिलोलो।

36इसा बखत में तुमून धीरज ले सहन करना की जरूरत छै, ताकि तुम परमेश्वरै की इच्छा पुरी कर सका। तब तुमून उ सब मिलोलो जैको परमेश्वरेले वादा करिना को छै।

37उक बाद परमेश्वर तुमून उ द्योलो जैको उले वादा करिना को छै। किलैकी, पवित्रशास्त्र में लिखीना को छै, “अब भौतै कम बखत रै ग्योछ, जब कि ऊँनवालो आलो, और देर नी करोलो।

38लेकिन म्यारा लोग जो विश्वास ले धर्मी बनिना का छन, उन ज्यूना रौला। अगर जो परमेश्वर में विश्वास करून छोड़ दीनान, त म्येरो मन उनून है खुश नी होलो।”

39हम उन लोगून में भटे नाहातिन जो परमेश्वर में विश्वास करून छोड़ दीनान और नाश हो जानान, लेकिन हम उन लोगून में भटे छा जो अपून विश्वास का द्वारा जीवन पा लीनान।

← Chapter 9 Jump to: Chapter 11 →